Chqakojoʼ qachuqʼabʼ rech utz kqabʼan che ubʼixik ri nabʼe taq tzij
1. ¿Jasche sibʼalaj rajawaxik kqachomaj ri nabʼe taq tzij kqabʼij?
1 Chiʼ kqabʼij che jun winaq che kutijaʼ uwa qukʼ, rajawaxik kqakoj qachuqʼabʼ rech utz kqabʼan che ri wa rech ri winaq chiʼ kunaʼo kraj kutij más. Junam rukʼ, rech ri winaq kkaj kkita ri kqaya ubʼixik chike rajawaxik kqakoj qatiempo xuqujeʼ qachuqʼabʼ che uchomaxik ri nabʼe taq tzij kqabʼij (Prov. 15:28). Xaq xiw ta ri tiempo o ri kqabʼan che ubʼixik ri nabʼe taq tzij kubʼano che utz kelik. Rumal laʼ chiʼ tajin kqachomaj ri kqabʼan che ubʼixik ri nabʼe taq tzij, ¿jas rajawaxik knaʼtaj chaqe?
2. ¿Jas kqabʼano rech utz kel ri nabʼe taq tzij kqabʼij?
2 Ri kkaj ri winaq kketaʼmaj. We ri nabʼe taq tzij che kqabʼij kʼo ta upatan chkiwach ri winaq, weneʼ kubʼano che kkaj ta chik kojtzijon qukʼ. Rumal laʼ utz che kojtzijon chirij ri kkaj ri winaq che e kʼo pa ri qaterritorio che kketaʼmaj. ¿La kkaj jun utz ajqʼat tzij? ¿La kkaj che kʼo kikotemal pa ri kifamilia? ¿La kkaj kkʼis ri chʼoj? Rumal che kʼi winaq kkaj kkibʼij ri kkichomaj, utz che kqabʼij chike che kkibʼij ri kkichomaj. Weneʼ kojkunik kqakoj jujun kʼutbʼal che kʼo pa ri wuj Ri Qachak che ri Dios. Utz che pa ri Qʼijilanik pa ri familia kqil ri kqabʼan che ukojik.
3. ¿Jas kqabʼano rech ri nabʼe taq qatzij kukʼut ri e naqʼatajinaq wi ri winaq che ubʼanik, xuqujeʼ kchʼaw chirij ri kikojonik?
3 Ri ubʼanik ri kikʼaslemal xuqujeʼ ri kikojonik ri e winaq. Pa jujun tinamit ri winaq kkaj che chanim kqabʼij ri qataqkil. Are kʼu, pa nikʼaj chik rajawaxik kqabʼij na jujun tzij chiʼ majaʼ kqabʼij ri rumal che keqasolij ri winaq, jun kʼutbʼal weneʼ rajawaxik kqataʼ che we utz uwach xuqujeʼ kojtzijon jubʼiqʼ rukʼ. Pa ri lugares che ri winaq nim kkil wi ri kubʼij ri Biblia, weneʼ kojkunik kqakojo chiʼ kqamaj ri tzijonik (Hech. 2:14-17). Are kʼu pa nikʼaj chik tinamit che ri e winaq kekojon ta chirij ri Jesús o kʼo ta kikojonik, weneʼ utz che kʼateʼ kqakoj ri Biblia chiʼ kqasolij chi jumul (Hech. 17:22-31).
4. ¿Jas rajawaxik knaʼtaj chaqe chiʼ kqabʼij ri nabʼe taq tzij?
4 Ri kqabʼij nabʼe. Rajawaxik qas kqachomaj ri kqabʼij nabʼe. Utz che xa kebʼ oxibʼ tzij kqabʼij xuqujeʼ kʼax ta uchʼobʼik. Xuqujeʼ ri kqabʼan che ubʼixik sibʼalaj rajawaxik. Chojtzijon rukʼ kikotemal xuqujeʼ chqakʼutuʼ che qas kqaj kqatoʼ ri winaq. Chnaʼtaj chaqe che we kojtzeʼnik kubʼano che ri winaq kuxibʼij ta ribʼ. We kqabʼan waʼ kojutoʼ rech kqakoj nabʼe taq tzij che kubʼan che ri winaq kraj kretaʼmaj chirij ri kʼo «pa ri umexa ri Ajawaxel» (1 Cor. 10:21).