Ri kqabʼan che kitoʼik ri qas ta kekun che usikʼixik uwach ri wuj
1. ¿Jasche kʼax ukʼutik ri utzij ri Dios chkiwach ri qas ta kekunik kkisikʼij uwach ri wuj?
1 Jujun chke ri winaq che kqatzijoj wi ri utzij ri Dios kkaj kketaʼmaj chrij ri Dios, are kʼu qas ta kekun che usikʼixik uwach ri wuj, rumal laʼ kkixibʼij kibʼ chiʼ kkisikʼij uwach ri Biblia xuqujeʼ nikʼaj chik wuj. Rumal laʼ, weneʼ utz taj we kqatzujuj chke ri wuj Su qas kukʼut, pa ri nabʼe mul che keqasolij. ¿Jas kqabʼan che kitoʼik ri winaq riʼ rech kketaʼmaj chrij ri Dios? Taʼom chke kʼi publicadores che kʼi chi junabʼ kkitzijoj ri utzij ri Dios rech más veinte tinamit, e areʼ xkibʼij ri pixabʼ che kqil na pa wajun kʼutunem riʼ.
2. ¿Jas wuj utz kqakoj kukʼ ri winaq che qas taq kekunik kkisikʼij uwach ri wuj?
2 We ri ajtijoxel qas ta kkunik kusikʼij uwach ri wuj, o kkun taj, utz che kqakoj ri wuj Chanimaj ri Ajawaxel o Chanimaj ri Ajawaxel rech kʼo akʼaslemal che kʼot ukʼisik. Jun precursor rech Estados Unidos kukʼut ri kebʼ wuj riʼ chuwach ri winaq tekʼuriʼ kutaʼ che jachin chke ri kebʼ kraj. Ri qachalal che kechakun pa ri sucursal rech Kenia kkibʼij che ri e wuj riʼ are utz taq chakubʼal, rumal che pa ri tinamit África, ri winaq are utz kkilo che xa ktzijox jun kʼutunem chke are ta kbʼan preguntas o kkiya ubʼixik chrij ri ktaʼ chke. We ri winaq bʼenaq pa tijobʼal kkun riʼ kusikʼij uwach ri wuj xuqujeʼ kutzalij uwach ri ktaʼ che, are kʼu ri winaq che kʼi ta junabʼ bʼenaq pa tijobʼal, weneʼ kkun taj. We ri ajtijoxel xa jubʼiqʼ kkunik kusikʼij uwach ri wuj, kʼi chke ri qachalal kkikoj ri wuj Kbʼix utz jastaq rech ri Ajawaxel o Kojkunik kqabʼan urachiʼl ri Ajawaxel, o Ri xebʼantaj ojer tzʼibʼatal pa Loqʼalaj Wuj.
3. ¿Jas rajawaxik knaʼtaj chqe chiʼ kqakʼut ri utzij ri Dios chkiwach ri qas ta kekunik kkisikʼij uwach ri wuj?
3 Chabʼij utz taq tzij. Ri winaq che kekun taj kkisikʼij uwach wuj weneʼ kekʼixik xuqujeʼ kkinaʼo che kʼo ta kipatan. Rajawaxik kqatoʼ rech utz krilo chiʼ kretaʼmaj rumal che are jun nabʼe jastaq rech kretaʼmaj ri qastzij. Kʼi chke ri winaq che kekun taj kkisikʼij uwach wuj kʼo kinoʼj xuqujeʼ kʼax taj kketaʼmaj kʼi jastaq. Rumal laʼ, nim cheqilaʼ wi (1 Ped. 3:15). Kekikot ri tijoxelabʼ chiʼ kkilo che ri kichuqʼabʼ che tajin kkikoj che retaʼmaxik kʼo kel wi xuqujeʼ tajin knimar ri kikojonik. Rumal laʼ amaqʼel chabʼij utz taq tzij chke.
Ri winaq che kekun taj kkisikʼij uwach wuj weneʼ kekʼixik xuqujeʼ kkinaʼo che kʼo ta kipatan. Rajawaxik kqatoʼ rech utz krilo chiʼ kketaʼmaj rumal che are jun nabʼe jastaq rech kretaʼmaj ri qastzij
4. ¿Jas kqabʼan che kitoʼik ri qas ta kekunik kkisikʼij uwach ri wuj rech kkaj kkitijoj kibʼ chrij ri kʼutunem?
4 Pa neʼ ri ajtijoxel qas ta kkunik kusikʼij uwach ri wuj, chabʼij che, che kutijoj ribʼ chrij ri kʼutunem. Jujun publicadores rech Sudáfrica kkibʼij chke ri ajtijoxelabʼ che kutaʼ toqʼobʼ chke kifamilia o jun kachiʼl che kkunik kusikʼij uwach ri wuj. Rech kkaj ri ajtijoxelabʼ kkitijoj kibʼ, jun publicador rech Gran Bretaña kuya ri uwuj chke ri ajtijoxelabʼ chiʼ kkil jujun párrafos rech kkilo che kʼax ta uriqik ri ktaʼ che we juchʼum chi ri uwuj. Jun qachalal rech India kubʼij chke ri ajtijoxelabʼ che kkil ri wachbʼal rech ri kʼutunem che kkil pa ri jun chi semana xuqujeʼ utz kechoman chrij chiʼ majaʼ kkil ri kʼutunem.
5. ¿Jas kqabʼano rech kqakʼutu che kʼo qapaciencia rukʼ ri ajtijoxel?
5 Chkʼol apaciencia. Chawilaʼ ri utz taq pixabʼ rech ri wuj che tajin kakojoʼ xuqujeʼ chatoʼ ri ajtijoxel rech qas kuchʼobʼ ri kretaʼmaj. Chiʼ kamajij, weneʼ utz taj che naj kattzijonik utz xa diez o quince minutos. Mawil kʼi párrafos, utz che xa kebʼ oxibʼ kiwil pa jumul. Chkʼol apaciencia we ri ajtijoxel nojim kusikʼij uwach ri wuj. Qastzij wi che kraj kubʼan utz che usikʼixik chiʼ kubʼan nim ri uloqʼoqʼenik che ri Jehová. Rech ri uloqʼoqʼenik knimarik, utz che pa ri nabʼe mul kabʼij che ri ajtijoxel che kbʼe pa ri riqbʼal ibʼ.
6. ¿Jas kqabʼan che ukʼutik chuwach jun winaq rech kretaʼmaj usikʼixik uwach wuj?
6 Ri ajtijoxel más chanim knimar ri ukojonik we qas kretaʼmaj usikʼixik uwach wuj (Sal. 1:1-3). Kʼi qachalal kkitoʼ ri ajtijoxelabʼ rukʼ ri wuj Chawetaʼmaj utzʼibʼaxik xuqujeʼ usikʼixik ri wuj kkikoj kebʼ oxibʼ minutos chiʼ kʼisnaq chi rilik ri kʼutunem. We kubʼan kebʼ ukʼuʼx ri ajtijoxel, weneʼ utz kattzijon chrij ri nikʼaj chi jastaq che are kunaq che ubʼanik. Chabʼij che, che Jehová utz krilo che kukoj uchuqʼabʼ che retaʼmaxik xuqujeʼ kuya kabʼij che, che kutaʼ tobʼanik pa chʼawem (Prov. 16:3; 1 Juan 5:4, 15). Jujun qachalal rech Gran Bretaña kkitoʼ ri ajtijoxelabʼ rech kkibʼan jastaq che kekun che ubʼanik xuqujeʼ che kubʼano che knimar ri ketaʼmanik, jun kʼutbʼal, kketaʼmaj kibʼiʼ konojel ri letras, kkichʼobʼ jujun texto rech ri Biblia xuqujeʼ usikʼixik uwach ri wuj che bʼanom rukʼ tzij che kʼax ta uchʼobʼik. Kʼi mul, are rajawaxik kqakoj qachuqʼabʼ che ubʼixik che ri winaq che kraj kretaʼmaj usikʼixik uwach wuj.
7. ¿Jasche rajawaxik kqakʼut chkiwach ri winaq che qas ta kekunik kkisikʼij uwach wuj ri qastzij chrij ri Dios?
7 Ri Jehová man keʼuxutuj ta ri qas ta ketaʼm kkisikʼij uwach wuj (Job 34:19). Ri areʼ are kril ri kʼo pa qanimaʼ (1 Crón. 28:9). Rumal laʼ rajawaxik kqakʼut chkiwach ri winaq che qas ta kekunik kkisikʼij uwach wuj ri qastzij chrij ri Dios. Kʼo kʼi wuj che kuya kqakojo rech keqatoʼ. Weneʼ chiʼ kqʼax ri qʼij, utz kqakoj ri wuj Su qas kukʼut rech ri ajtijoxel kretaʼmaj más chrij ri Biblia.