Cheqakʼamaʼ che kʼutbʼal ri e ajqʼaxal tzij: Sofonías
1. ¿Jas tajin kbʼan pa ri tinamit chiʼ Sofonías xux qʼaxal tzij, xuqujeʼ jasche are jun utz kʼutbʼal chqe?
1 Pa taq ri unikʼajil ri uwuq siglo nabʼe chuwach ri uqʼij ri Jesús, sibʼalaj e kʼi winaq rech ri tinamit Judá kkiqʼijilaj ri Baal. Ri itzelalaj ajawinel ubʼiʼ Amón majaʼ naj xkamisaxik rumal laʼ ri alaj ubʼiʼ Josías are chi ajawinel (2 Crón. 33:21–34:1). Pa taq ri qʼij riʼ Jehová xuchaʼ ri Sofonías rech kutzijoj chke ri winaq che kkʼajisax na kiwach. Pa neʼ Sofonías weneʼ kʼo chkixoʼl ri winaq che kechakun rukʼ ri ajawinel rech Judá, xubʼan ta chʼuchʼuj che ri utzij ri Jehová rech kʼajisabʼal wachaj chke ri kʼamal taq bʼe re ri tinamit (Sof. 1:1; 3:1-4). Oj, junam rukʼ ri Sofonías, kqakoj qachuqʼabʼ rech kqakowirisaj ri qanimaʼ junam rukʼ ri xubʼan ri ajqʼaxal tzij xuqujeʼ kqaya ta chke ri qafamiliares che kkiqʼatej ri qaqʼijilanik che ri Jehová (Mat. 10:34-37). ¿Jas xutzijoj ri Sofonías, xuqujeʼ jas xukʼam loq?
2. ¿Jas rajawaxik kqabʼano rech kojkolotaj kan pa ri qʼij rech ri royowal ri Jehová?
2 Chqatzukuj ri Jehová. Xaq xiw ri Jehová kkunik keʼukol ri winaq pa ri qʼij re ri royowal. Rumal laʼ, Sofonías xubʼij chke ri winaq rech Judá che kkitzukuj ri Jehová, kkitzukuj ri sukʼilal xuqujeʼ kkitzukuj utzilal chiʼ kʼo na tiempo che (Sof. 2:2, 3). Ri qʼij riʼ kjunamataj rukʼ ri uqʼij ri Sofonías, kqabʼij chke ri winaq che kkitzukuj ri Dios, are kʼu oj xuqujeʼ rajawaxik kqatzukuj, qas chqakojoʼ pa ri qachomanik che kqaya ta kan upatanixik ri Jehová (Sof. 1:6). Kqatzukuj ri Jehová chiʼ kqasikʼij uwach ri Utzij xuqujeʼ chiʼ kukʼam qabʼe. Kqatzukuj sukʼilal chiʼ kqabʼan saq che ri qakʼaslemal. Kqatzukuj utzilal chiʼ kqaya qibʼ chuxeʼ ri taqanik xuqujeʼ chiʼ rukʼ ronojel qanimaʼ kqanimaj ri kubʼij ri utinamit ri Jehová.
3. ¿Jasche rajawaxik che utz ri qachomanik chrij ri utzijoxik ri utzij ri Dios?
3 Ri utz kuya utzukuxik ri Jehová. Ri xuya ubʼixik ri Sofonías xuya utzilal pa kikʼaslemal jujun chke ri winaq rech Judá, are kʼu qas xuya utzilal che ri Josías, che xumajij utzukuxik ri Jehová chiʼ kʼa akʼal na. Chiʼ qʼaxinaq chi ri tiempo, Josías xumajij resaxik ri kiqʼijilaxik ri e tyox pa Judá (2 Crón. 34:2-5). Pa taq ri qʼij riʼ, pa neʼ kʼo jujun ijaʼ rech ri Ajawbʼal kqaj kan chuchiʼ taq ri bʼe, chuxoʼl taq ri abʼaj o pa taq ri kʼix, nikʼaj chik kqaj pa utzalaj ulew xuqujeʼ uwachinik (Mat. 13:18-23). Qas qetaʼm che ri Jehová kuya ta kan utewchixik ri chuqʼabʼ kqakoj che ujabʼuxik ri ijaʼ rech ri Ajawbʼal (Sal. 126:6).
4. ¿Jasche rajawaxik kqeyej ri uqʼij ri Jehová?
4 Jujun chke ri winaq rech ri tinamit Judá xkichomaj che kopan ta jun qʼij che Jehová kubʼan ri uchomam. Are kʼu Jehová xubʼij che ri nimalaj uqʼij naqaj chik kʼo wi (Sof. 1:12, 14). Xaq xiw kekolotaj ri kkitzukuj ri utobʼanik (Sof. 3:12, 17). Are taq kqeyej ri uqʼij ri Jehová chojkikot che ubʼanik ri uchak ri Dios kukʼ ri nikʼaj chik rajpataninel ri nimalaj Dios (Sof. 3:8, 9).