Cien junabʼ chik tajin ktzijox ri Ajawbʼal
1. ¿Jas xbʼix chke ri utinamit ri Dios cien junabʼ kanoq che kkibʼano?
1 ¡«Chiwilaʼ, ri Ajawinel tajin chi kuqʼat tzij! Ix kiyaʼ ubʼixik. Rumal laʼ, chitzijoj, chitzijoj, chitzijoj ri Ajawinel xuqujeʼ ri rajawbʼal.» Rukʼ ri tzij riʼ che nim ubʼanik xbʼix kan ojer xa jubʼiqʼ kraj che ktzʼaqat cien junabʼ, ri qachalal Rutherford xubʼij chke ri utinamit ri Jehová che kkitzijoj ri utzalaj taq tzij rech ri Ajawbʼal pa ronojel ri uwach Ulew. ¡Qastzij kqilo che tajin kqabʼano! Junam kukʼ ri kojonelabʼ rech ri nabʼe siglo, qatzijom ri utzalaj taq tzij rech ri Ajawbʼal pa «ronojel kʼolbʼal cho ri uwach Ulew» (Col. 1:23). ¿Jas qabʼanom che utzijoxik ri Rajawbʼal ri Dios pa we cien junabʼ riʼ? ¿Jas kqabʼan che utzijoxik rumal che tajin ktzʼaqat cien junabʼ che tajin kuqʼat tzij?
2. ¿Jas ubʼanom ri qawuj che utzijoxik ri Rajawbʼal ri Dios?
2 Chojchoman chrij ri qʼaxinaq chik. Kʼi chi junabʼ ri qawuj tajin kuya ubʼixik ri Rajawbʼal ri Dios. Xumaj lo pa ri junabʼ 1939, ri wuj che qas kqakojo ubʼiʼ La Atalaya. Anunciando el Reino de Jehová. Wajun revista riʼ amaqʼel kchʼaw chrij ri Ajawbʼal xuqujeʼ ri kubʼan na. Ri ¡Despertad! xuqujeʼ kukʼutu che xaq xiw ri Rajawbʼal ri Dios kuya kubʼsal kʼuʼx chke ri winaq. ¡Sibʼalaj kojkikotik che ri e kebʼ wuj riʼ bʼanom pa kʼi chʼabʼal xuqujeʼ kjabʼux pa ronojel uwach Ulew! (Apoc. 14:6.)
3. Chabʼij jujun chke ri jastaq che kojom che utzijoxik ri Ajawbʼal.
3 Ri utinamit ri Jehová ukojom kʼi taq jastaq che utzijoxik ri Ajawbʼal. Ojer xkoj chʼichʼ rukʼ bocinas, radio xuqujeʼ gramófonos portátiles. Rumal ri jastaq riʼ pa neʼ e kʼi ta ri publicadores xekunik xkitzijoj ri Ajawbʼal chke kʼi winaq (Sal. 19:4). Kimik tajin kkoj ri jw.org, rech ktzijox ri Ajawbʼal chke sibʼalaj kʼi winaq, xuqujeʼ chke ri e kʼo pa tinamit che qʼatem wi ri qachak.
4. ¿Jas nikʼaj chik ubʼanom ri utinamit ri Jehová che utzijoxik ri Ajawbʼal?
4 Ri utinamit ri Jehová xuqujeʼ kukoj kʼi jastaq che utzijoxik ri Ajawbʼal. Jun kʼutbʼal, pa taq ri junabʼ 1990, xqakoj qachuqʼabʼ rech xaq xiw ta cho taq ja kqatzijoj wi ri utzij ri Dios xuqujeʼ pa taq parques, pa taq kʼaybʼal xuqujeʼ pa taq kitakʼalibʼal chʼichʼ. Majaʼ naj xmajix utzijoxik pa taq lugares jachiʼ e kʼo wi kʼi winaq pa nimaʼq taq tinamit rech ronojel ri uwach Ulew. Xuqujeʼ, kʼi congregaciones tajin kkibʼan wariʼ pa ri kiterritorio kkikoj mesas rech kkikʼut wuj jachiʼ keʼokʼow wi kʼi winaq. Pa neʼ kbʼan wariʼ, are kʼu qas kqakoj qachuqʼabʼ che utzijoxik ri Ajawbʼal chuchiʼ taq ja (Hech. 20:20).
5. ¿Jas utz kqabʼan pa ri ikʼ septiembre?
5 Chojchoman chrij ri petinaq. Pa ri ikʼ septiembre kʼi chke ri qachalal kkimaj ri precursorado regular. ¿La katkun at kabʼano? We katkun taj, ¿la achomam che kabʼan jujun ikʼ ri precursorado auxiliar? We katkunik kabʼan ri precursorado o katkun taj, Jehová kutewchij ri achuqʼabʼ che kakoj che utzijoxik ri Ajawbʼal (Mal. 3:10).
6. ¿Jasche ri ikʼ octubre rech 2014 nim ubʼanik?
6 Pa ri ikʼ octubre rech 2014 ktzʼaqat cien junabʼ che umajim uqʼatik tzij ri Ajawbʼal. Rumal laʼ, ri wuj La Atalaya che kyaʼ chke ri winaq pa ri ikʼ riʼ kchʼaw chrij ri Rajawbʼal ri Dios. Chqakojoʼ qachuqʼabʼ rech kqaya kan wajun revista riʼ chke kʼi winaq. Chiʼ kojchoman chrij ri petinaq, qonojel kqaya ta kan utzijoxik «ri e utzalaj taq tzijol rech ri rajawibʼal ri Dios» chke ri kkaj kkitatabʼej (Hech. 8:12).