Chqabʼanaʼ sibʼalaj utz che ri qachak: cheʼatoʼ ri ajtijoxelabʼ rech kkijach ri kikʼaslemal che ri Dios xuqujeʼ kkibʼan kiqasanjaʼ

RI RUMAL CHE RAJAWAXIK. Rech kkiriq ri utoqʼobʼ ri Jehová, ri ajtijoxelabʼ re ri Biblia rajawaxik kkijach ri kikʼaslemal che ri Dios xuqujeʼ kkibʼan ri kiqasanjaʼ (1Pe 3:21). Ri winaq che kkibʼan pa kikʼaslemal ri xkibʼij are chiʼ xkijach ri kikʼaslemal che ri Dios kchajix ri kikojonik (Sl 91:1, 2). Ri oj cristianos kqajach ri qakʼaslemal che ri Jehová, man che ta jun winaq, jun chak o jun jupuq winaq. Rumal laʼ, ri ajtijoxelabʼ rajawaxik kkiloqʼoqʼej xuqujeʼ nim kkil wi ri Jehová (Ro 14:7, 8).

RI KQABʼANO:

• Are chiʼ kaya etaʼmanik, chaqʼalajisaj ri kukʼut ri wuj chrij ri Dios. Chakʼutuʼ che nim ubʼanik ri usikʼixik uwach ri Biblia ronojel taq qʼij xuqujeʼ kyaʼ ta kan ubʼanik ri chʼawem che ri Jehová (1Te 5:17; Snt 4:8).

• Chatoʼ ri ajtijoxel rech kuchomaj ujachik ri ukʼaslemal che ri Dios xuqujeʼ kubʼan ri uqasanjaʼ. Xuqujeʼ chatoʼ rech kkunik kubʼan chi nikʼaj jastaq rech ri ukojonik, jun chke are kuya ubʼixik chrij ri ukojonik pa ri e riqbʼal ibʼ o kutzijoj chke ri ukʼulja xuqujeʼ chke ri e rachiʼl pa ri chak ri tajin kretaʼmaj. Chnaʼtaj chawe che Jehová kutaqchiʼj ta jun winaq rech kpatanin che xuqujeʼ pa ranimaʼ ri winaq kpe wi we kujach ri ukʼaslemal che ri Dios (Dt 30:19, 20).

• Rukʼ utz taq tzij chabʼij chke ri ajtijoxelabʼ che kkikʼex jujun jastaq pa ri kikʼaslemal rech kkikot ri Jehová kukʼ xuqujeʼ kekunik kkibʼan ri kiqasanjaʼ (Pr 27:11). Rumal che kʼo jujun jastaq xuqujeʼ naqʼatisabʼal che kʼax resaxik, weneʼ rajawaxik kyaʼ ta kan kitoʼik rech kkiya kan ri nabʼe kikʼaslemal xuqujeʼ rech kkʼojiʼ jun chʼajchʼoj kikʼaslemal (Ef 4:22-24). Chakʼutuʼ jujun chke ri e kʼutunem «La Biblia les cambió la vida», rech ri wuj La Atalaya.

• Chabʼij che ri ajtijoxel ri kikotemal ariqom rumal che tajin kapatanij ri Jehová (Isa 48:17, 18).