Alabʼom alitomabʼ, chikojoʼ ichuqʼabʼ rech kibʼan ri «utzalaj chak»

Pa ri wuj che xutzʼibʼaj Pablo che Tito, xubʼij che ri e alabʼom, junam rukʼ Tito rajawaxik kkikoj kichuqʼabʼ rech keʼux «jun utzalaj kʼutbʼal» pa ronojel ri jastaq (Tit 2:6, 7). Tekʼuriʼ, pa ri capítulo riʼ, xubʼij che kchʼajchʼobʼex na ri utinamit ri Jehová rech rukʼ ronojel animaʼ kkunik kubʼan ri «utzalaj chak» (Tit 2:14). Jun chke ri utzalaj chak are ri utzijoxik ri utzij ri Dios xuqujeʼ uyaʼik tijonik chrij ri uQʼatbʼal tzij ri Dios. Ala, ¿la kawaj kakoj ri akʼaslemal rech katux precursor auxiliar o regular? (Pr 20:29).

We kawaj katux precursor, rukʼ utz chomanik qas chachomaj ri rajawaxik kabʼano (Lu 14:28-30). Jun kʼutbʼal, ¿jas kabʼan che utojik ri jastaq awe are chiʼ at precursor chik? ¿Jas rajawaxik kabʼano rech katzʼaqatisaj ri hora rech jun precursor? Chabʼij che ri Jehová pa chʼawem ri kawaj kabʼano (Sl 37:5). Chattzijon kukʼ ri anan atat ri kawaj kabʼano xuqujeʼ kukʼ ri precursores che kʼi chi junabʼ tajin kkibʼano. Tekʼuriʼ, chamajij ubʼanik ri kajwatajik rech katkunik kabʼano. Ri Jehová qas katutewchiʼj na rumal che tajin kakoj achuqʼabʼ che upatanixik.

ARE CHIʼ AWILOM CHI RI VIDEO RI ALABʼOM ALITOMABʼ KKIYA UQʼIJ RI JEHOVÁ, CHATZALIJ UWACH RI E PREGUNTAS RIʼ:

• ¿Jas e kʼax xkiqʼaxej e jujun qachalal rech xeʼux precursores, xuqujeʼ jas xkibʼan che ubʼanik?

• ¿Jas kkibʼan ri e nan tat che kitoʼik ri e kalkʼwal rech keʼux precursores regulares?

• ¿Jasche rajawaxik kbʼan jun horario che utzijoxik ri utzij ri Dios?

• ¿Jas rajawaxik kkibʼan ri e qachalal rech kekitoʼ xuqujeʼ kkiya kichuqʼabʼ ri e precursores?

• ¿Jas e tewchibʼal kkiriq ri e precursores?