Ri qaloqʼoqʼebʼal y ri qamaltyoxinik che Jehová kubʼano che kqabʼan qaqasanjaʼ

1, 2. Junam rukʼ ri kubʼij Hechos 8:27-31, 35-38, ¿jasche xubʼan uqasanjaʼ ri achi re Etiopía?

¿LA KAWAJ kabʼan aqasanjaʼ xuqujeʼ katok tereneʼl rech ri Jesús? Ri loqʼoqʼebʼal xuqujeʼ ri maltyoxinik ubʼanom che e kʼi winaq kibʼanom kiqasanjaʼ. Chatchoman chrij jun pataninel re ri reina re Etiopía.

² Are chiʼ ri achi xretaʼmaj ri kubʼij ri Biblia che rajawaxik kubʼan uqasanjaʼ, xubʼano (chasikʼij uwach Hechos 8:27-31, 35-38). ¿Jasche xubʼan wariʼ? Rumal che nim kril wi ri kubʼij ri uTzij ri Dios, are chiʼ bʼenaq pa ri bʼe tajin kusikʼij uwach ri wuj rech Isaías. Are chiʼ ri Felipe xukʼut chuwach ri tojbʼal mak che xuya ri Jesús, qas xunaʼ maltyoxinik pa ranimaʼ. Xuqujeʼ, ri achi kʼo chi uloqʼoqʼebʼal che Jehová, ¿jasche kqabʼij wariʼ? Rumal che xtzalij lo pa Jerusalén che uqʼijilaxik ri Jehová. Rumal laʼ, xuya kan ri ojer ukojonem xuqujeʼ xok pa ri qastzij kojonem. Ri uloqʼoqʼebʼal che ri Jehová xubʼano che xkunik xubʼan uqasanjaʼ xuqujeʼ xux tereneʼl re ri Jesús (Mat. 28:19).

3. ¿Jas kbʼanowik che jun winaq kubʼan ta ri uqasanjaʼ? (Chawilaʼ ri recuadro «¿Jas ulew kjunamataj wi ri awanimaʼ?»).

³ Ri loqʼoqʼebʼal che ri Jehová kubʼano che kqaj kqabʼan qaqasanjaʼ. Are kʼu kʼo nikʼaj chi loqʼoqʼebʼal kojuqʼatej rech kqabʼan ri qaqasanjaʼ. Jun kʼutbʼal, we qas kaloqʼoqʼej ri a familiares xuqujeʼ ri awachiʼl che e testigos taj weneʼ kachomaj che we kabʼan ri aqasanjaʼ weneʼ katkiloqʼoqʼej ta chik (Mat. 10:37). Weneʼ kʼo nikʼaj anaqʼatisabʼal che awetaʼm che utz ta kril ri Dios are kʼu kʼax kabʼan che uyaʼik kanoq (Sal. 97:10). O rumal che xatkʼiy pa jun familia che sibʼalaj kkibʼan nimaqʼij che kʼo ubʼanik rukʼ ri kojonem che qastzij taj xuqujeʼ che katchoman chrij ri utz jastaq che abʼanom pa ri nimaqʼij riʼ, rumal laʼ kachomaj che katkun taj kaya kan ri e nimaqʼij riʼ che utz ta kril ri Jehová (1 Cor. 10:20, 21). Rumal laʼ rajawaxik kachomaj jachin ri más kaloqʼoqʼej.

RI LOQʼOQʼEBʼAL CHE MÁS NIM UBʼANIK

4. ¿Jas ri rumal che kabʼan aqasanjaʼ?

⁴ Qastzij riʼ che, kʼo jastaq che utz kawilo xuqujeʼ nim kawilo, awas ta ubʼanik wariʼ. Jun kʼutbʼal, weneʼ nim kawil ri Biblia are chiʼ majaʼ kawetaʼmaj chrij ri Biblia kukʼ ri testigos rech Jehová. Xuqujeʼ weneʼ nim kawil ri Jesús. Are kʼu kimik che awetaʼm chi kiwach ri Testigos qastzij riʼ che utz kawil ri kachilanik. Are kʼu ri kanaʼ kubʼan ta chawe che kajach ri akʼaslemal che ri Jehová xuqujeʼ kabʼan aqasanjaʼ. Ri kbʼanowik are ri aloqʼoqʼebʼal che ri Dios. Are chiʼ más kaloqʼoqʼej ri Dios chuwach apachike jastaq katutoʼ rech kʼo ta katqʼatenik rech kapatanij. Wariʼ kukʼutu che ri qaloqʼoqʼenik che ri Dios xaq xiw ta kubʼano che kqabʼan qaqasanjaʼ xaneʼ kojutoʼ rech amaqʼel kqapatanij rukʼ sukʼilal.

5. ¿Jas kqil na pa wajun kʼutunem riʼ?

⁵ Ri Jesús xubʼij che rajawaxik kqaloqʼoqʼej ri Jehová rukʼ ronojel qanimaʼ, qakʼaslemal, qachomanik xuqujeʼ qachuqʼabʼ (Mar. 12:29, 30). ¿Jas rajawaxik kabʼano rech katkunik kabʼan wariʼ? Are uchomaxik che Jehová kojuloqʼoqʼej (1 Juan 4:19). Wajun kʼutunem riʼ kuya kʼi taq pixabʼ che katutoʼ che ukʼutik ri aloqʼoqʼebʼal che ri Dios. Xuqujeʼ, kukʼutu jas nikʼaj chi jastaq kabʼano xuqujeʼ kanaʼo are chiʼ kanaʼ ri loqʼoqʼenik che sibʼalaj nim ubʼanik.b

6. Junam rukʼ ri kubʼij Romanos 1:20, ¿jas kojutoʼ rech kqetaʼmaj más uwach ri Jehová?

⁶ Chawetaʼmaj chrij ri Jehová rukʼ ri e jastaq che ubʼanom (chasikʼij uwach Romanos 1:20; Apoc. 4:11). Chatchoman chrij ri unojibʼal ri Dios are chiʼ kawil ri kibʼanik ri e chikop xuqujeʼ ri e nikʼaj chi jastaq. Chawetaʼmaj más ri ubʼanom ri Jehová che ri ucuerpo ri winaq (Sal. 139:14). Xuqujeʼ chatchoman chrij ri chuqʼabʼ che Jehová xukoj pa ri Qʼij paneʼ xa are jun chke ri miles de millones re chʼumil (Is. 40:26).c Are chiʼ kabʼan wariʼ katutoʼ rech más nim kawil ri Jehová. Uchʼobʼik che Jehová sibʼalaj kʼo unoʼj xuqujeʼ kʼo nimalaj uchuqʼabʼ are jun chke ri jastaq che katutoʼ rech kkʼojiʼ jun utzalaj awachilanik rukʼ. Rech qas kaloqʼoqʼej rukʼ ronojel awanimaʼ, rajawaxik kawetaʼmaj más uwach.

7. Rech kaloqʼoqʼej ri Jehová rukʼ ronojel awanimaʼ, ¿jas rajawaxik kachʼobʼo?

⁷ Rajawaxik kakojo che ri Jehová qas katraj. ¿La kakojo che ri xbʼanow ri kaj xuqujeʼ ri uwach Ulew retaʼm awach xuqujeʼ che nim abʼanik chuwach? Chnaʼtaj chawe che Jehová «naj ta kʼo wi chqe chqajujunal» (Hech. 17:26-28). Junam che xubʼij ri David che Salomón, ri Dios «keʼunikʼoj konojel taq ri etaʼmabʼal taq kʼuxaj». Jehová kubʼij we at katzukuj kariq kʼu na (1 Crón. 28:9). We ri at tajin kawetaʼmaj chrij ri Biblia, are rumal che Jehová xatutzukuj, junam rukʼ ri kubʼij Jeremías 31:3. Are chiʼ katchoman chrij ri uyaʼom ri Jehová chawe, más kkʼiy ri aloqʼoqʼenik che.

8. ¿Jas kabʼan che ukʼutik che kamaltyoxij ri uloqʼoqʼebʼal ri Jehová?

⁸ Chiʼ kabʼan achʼawem che ri Jehová kakʼutu che kamaltyoxij ri uloqʼoqʼebʼal. Ri aloqʼoqʼebʼal kkʼiy más che are chiʼ kabʼij che ri kabʼisoj xuqujeʼ kamaltyoxij ronojel ri uyaʼom chawe. Kkowir más ri awachilanik rukʼ are chiʼ kawilo che kuya ri kataʼ che (Sal. 116:1). Qas kawil riʼ che ri Dios qas kuchʼobʼ ri katriqitaj wi. Rech katqebʼ más rukʼ ri Jehová, rajawaxik kachʼobʼ ri uchomanik xuqujeʼ ri kraj kabʼano, rumal laʼ rajawaxik kawetaʼmaj más chrij ri Biblia.

9. ¿Jas kabʼan che ukʼutik che nim kawil wi ri Biblia?

⁹ Nim chawilaʼ wi ri uTzij ri Dios. Xaq xiw pa ri Biblia kqetaʼmaj wi ri qastzij chrij ri Jehová xuqujeʼ ri kraj kqariqo. ¿Jas kabʼan che ukʼutik che nim kawil ri Biblia? Are usikʼixik uwach ronojel taq qʼij, utijoxik awibʼ che ri etaʼmanik re ri Biblia xuqujeʼ ukojik pa akʼaslemal ri tajin kawetaʼmaj (Sal. 119:97, 99; Juan 17:17). ¡Utz che amaqʼel kasikʼij uwach ri Biblia!

10. ¿Jas jun chke ri jastaq kbʼanowik che ri Biblia sibʼalaj utz?

¹⁰ ¿Jas jun chke ri jastaq kbʼanowik che ri Biblia sibʼalaj utz? Are che e kʼo bʼantajik chupam che bʼim kumal winaq che qas xkil uwach ri Jesús. Xaq xiw ri Biblia kuya ubʼixik rukʼ tzʼaqatil ri xubʼan ri Jesús rumal qech. Are chiʼ kawetaʼmaj chrij ri xubʼij ri Jesús xuqujeʼ ri xubʼano kawaj riʼ katux rachiʼl.

11. ¿Jas kattowik rech kaloqʼoqʼej más ri Jehová?

¹¹ Chawetaʼmaj uloqʼoqʼexik ri Jesús. Wariʼ katutoʼ rech kaloqʼoqʼej más ri Jehová, rumal che ri Jesús rukʼ tzʼaqatil kukʼut ri ubʼantajik ri uTat (Juan 14:9). Are chiʼ kawetaʼmaj más chrij ri Jesús, más kawetaʼmaj chrij ri ubʼantajik ri Jehová xuqujeʼ más kaloqʼoqʼej. Chatchoman chrij ri utzilal xukʼut ri Jesús chke ri e winaq che itzel xkil ri e nikʼaj chik, junam kukʼ ri e mebʼaʼ, ri e yawabʼ xuqujeʼ ri kekun taj kkitoʼ kibʼ. Chatchoman chrij ri utz taq pixabʼ kuya chawe xuqujeʼ ri utzilal kariq pa ri akʼaslemal chiʼ kanimaj (Mat. 5:1-11; 7:24-27).

12. ¿Jas kubʼan riʼ chawe are chiʼ kawetaʼmaj más chrij ri Jesús?

¹² Qastzij riʼ che ri aloqʼoqʼenik che ri Jesús kubʼan más nim are chiʼ katchoman chrij ri tojbʼal mak xuyaʼo rech ksach ri amak (Mat. 20:28). Are chiʼ kachʼobʼo che rukʼ ronojel ranimaʼ xuya ri ukʼaslemal pa awiʼ, kubʼano che kaya kan ubʼanik ri utz taj xuqujeʼ katzukuj ri kuybʼal mak kuya ri Jehová (Hech. 3:19, 20; 1 Juan 1:9). Are chiʼ más kaloqʼoqʼej ri Jehová xuqujeʼ ri Jesús, más kawaj riʼ katkʼojiʼ kukʼ ri e winaq che xaq junam ri kichomanik awukʼ at.

13. ¿Jas uyaʼom ri Jehová chawe?

¹³ Chawetaʼmaj uloqʼoqʼexik ri ufamilia ri Jehová. Weneʼ ri afamilia che e Testigos taj xuqujeʼ ri e ojer awachiʼl kkichʼobʼ taj jasche kawaj kajach ri akʼaslemal che ri Dios, xuqujeʼ weneʼ kpe koyowal chawij. Are kʼu Jehová kuya jun familia espiritual chawe. We katkʼojiʼ naqaj che wajun familia riʼ, kariq riʼ ri loqʼoqʼebʼal xuqujeʼ ri tobʼanik che kajwataj chawe (Mar. 10:29, 30; Heb. 10:24, 25). Weneʼ kopan jun qʼij ri afamiliares kkipatanij na ri Jehová xuqujeʼ kkibʼan pa kikʼaslemal ri upixabʼ (1 Ped. 2:12).

14. Junam rukʼ ri kubʼij 1 Juan 5:3, ¿jas awilom chrij ri e upixabʼ ri Jehová?

¹⁴ Nim chawilaʼ wi ri e upixabʼ ri Dios xuqujeʼ cheʼanimaj. Are chiʼ majaʼ kawetaʼmaj uwach ri Jehová, weneʼ kabʼan ri kawaj kabʼano, are kʼu xawilo che ri upixabʼ ri Jehová are más utz na (Sal. 1:1-3; chasikʼij uwach 1 Juan 5:3). Chatchoman chrij ri pixabʼ kuya ri Biblia chke ri achijabʼ, ixoqibʼ, tat nan xuqujeʼ alkʼwalaxelabʼ (Efes. 5:22–6:4). ¿La awilom che más uriqom utzilal ri afamilia rumal che kkinimaj ri Dios? ¿La kkibʼan más utz jastaq rumal che kkinimaj ri pixabʼ chrij ri utzukuxik utz achilanik? ¿La más katkikot pa ri afamilia? (Prov. 13:20; 1 Cor. 15:33). Weneʼ kachomaj che uyaʼom utzilal chiwe.

15. ¿Jas katkunik kabʼano we kajwataj tobʼanik chawe rech kabʼan pa ri akʼaslemal ri upixabʼ ri Dios?

¹⁵ Weneʼ jujun taq mul awetaʼm taj jas kabʼan che ukojik pa akʼaslemal ri e pixabʼ che tajin kawetaʼmaj. Rumal laʼ ri Jehová kukoj ri utinamit rech kuya e wuj esam pa ri Biblia che katutoʼ rech kachʼobʼ ri utz xuqujeʼ ri utz taj (Heb. 5:13, 14). Are chiʼ kasikʼij uwach xuqujeʼ katchoman chrij, kawil riʼ che sibʼalaj kuya tobʼanik chawe pa ri akʼaslemal xuqujeʼ qastzij riʼ che kawaj katkʼojiʼ pa ri utinamit ri Jehová.

16. ¿Jas ubʼanom ri Jehová che ujachik ri utinamit?

¹⁶ Chawetaʼmaj uloqʼoqʼexik xuqujeʼ uyaʼik tobʼanik che ri utinamit ri Dios. Jehová ujachom ri utinamit pa taq congregaciones, ri uKʼojol, Jesús, are ri kkʼamow kibʼe (Efes. 1:22; 5:23). Jesús uchaʼom jun jupuq achijabʼ rech kkikʼam ubʼe ri utinamit xuqujeʼ che kkibʼan ri chak che areʼ kraj kbʼanik. Ri Jesús xubʼij «jikalaj pataninel, utz uchomanik» chke ri cristianos riʼ, che kkikoj kichuqʼabʼ rech kkiya ri kajwataj chawe pa ri akojonik (Mat. 24:45-47). Jun chke ri e jastaq che kubʼan ri jikalaj pataninel are che keʼuchaʼ achijabʼ che qas kʼo ketaʼmabʼal rech kkikʼam ubʼe ri congregación (Is. 32:1, 2; Heb. 13:17; 1 Ped. 5:2, 3). Rukʼ ronojel kanimaʼ, kkikubʼsaj akʼuʼx xuqujeʼ katkitoʼ rech katqebʼ más rukʼ ri Jehová. Are kʼu jun chke ri jastaq che katkitoʼ wi are che kkikʼut chawach ri kabʼan che ukʼutik chkiwach e nikʼaj chik chrij ri Jehová (Efes. 4:11-13).

17. Junam rukʼ ri kubʼij Romanos 10:10, 13, 14, ¿jasche kojtzijon chrij ri Jehová kukʼ ri e winaq?

¹⁷ Cheʼatoʼ e nikʼaj chik rech kketaʼmaj uloqʼoqʼexik ri Jehová. Jesús xubʼij chke ri utijoxelabʼ che kkikʼut chkiwach e nikʼaj chik chrij ri Dios (Mat. 28:19, 20). Kojkunik kqanimaj wajun taqanik riʼ paneʼ qas ta kqaj kqabʼano. Are kʼu, we at kaloqʼoqʼej más ri Jehová, kanaʼ riʼ ri xkinaʼ ri apóstol Pedro xuqujeʼ Juan, che xkibʼij: «Man kojkun ta kʼut chi ma ta kqatzijoj ri qilom ri qatom» (Hech. 4:20). Utoʼik jun winaq rech kuloqʼoqʼej ri Jehová kuya kikotemal. ¿La kachomaj ri kikotemal xunaʼ ri Felipe are chiʼ xutoʼ ri etíope rech xretaʼmaj ri qastzij kʼo pa ri Biblia xuqujeʼ xubʼan uqasanjaʼ? Are chiʼ kabʼan awe ri xubʼan ri Felipe xuqujeʼ kanimaj ri taqanik che xuya kan ri Jesús che utzijoxik ri utzij ri Dios, kakʼutu che qas kawaj katux testigo rech Jehová (chasikʼij uwach Romanos 10:10, 13, 14). Rumal laʼ, weneʼ kabʼan ri pregunta che xubʼan ri etíope: «¿La ma ta lo kuya kbʼan ri nubautismo?» (Hech. 8:36).

18. ¿Jas kqetaʼmaj na pa ri jun chi kʼutunem?

¹⁸ Ri jastaq che más nim ubʼanik che kachaʼ pa ri akʼaslemal are ubʼanik ri aqasanjaʼ. Rumal che wariʼ sibʼalaj nim ubʼanik, rajawaxik che qas katchoman chrij ri kraj kubʼij ubʼanik qasanjaʼ. Are kʼu, ¿jas ri rajawaxik kawetaʼmaj chrij ri qasanjaʼ? Xuqujeʼ ¿jas rajawaxik kabʼano are chi majaʼ kabʼan ri aqasanjaʼ xuqujeʼ chiʼ abʼanom chik? Kqil na wariʼ pa ri jun chi kʼutunem.