Ri congregación junam kubʼan che kilik ri xkibʼan jun nimalaj mak jachaʼ kubʼan ri Jehová

1. ¿Jas ri qas kraj ri Jehová?

RI Jehová xeʼubʼan ri winaq che kekunik kkichaʼ ri kkaj kkibʼano. Ronojel taq qʼij kqachaʼ ubʼanik jujun taq jastaq pa ri qakʼaslemal. Ri más nim ubʼanik che ri winaq kuchaʼ ubʼanik are che kujach ri ukʼaslemal che ri Jehová y kubʼan ramigo. Ri Jehová qas kraj che e juntir kkichaʼ ubʼanik wariʼ. ¿Jasche? Rumal che keʼuloqʼoqʼej y kraj kkiriq utzil. Kraj che kkibʼan ramigos y kkiriq ri kʼaslemal kʼo ta ukʼisik (Deut. 30:19, 20; Gál. 6:7, 8).

2. ¿Jas kraj ri Jehová che kkibʼan ri tajin kkibʼan jun nimalaj mak y majaʼ kkibʼan arrepentir kibʼ? (1 Juan 2:1).

² Ri Jehová keʼutaqchiʼj ta ri winaq rech kkipatanij, xaneʼ kuyaʼo che chkijujunal kkichaʼ ri kkaj kkibʼano. Are kʼu, ¿jas kkʼulmatajik we jun winaq ubʼanom chi u bautismo y kubʼan jun nimalaj makaj? We kubʼan ta arrepentir ribʼ che ri umak, kesax bʼi pa ri congregación (1 Cor. 5:13). Pero ri Jehová qas kraj che ktzalij chi lo jumul. Are waʼ ri jun rumal che xuya ri Ukʼojol pa qawiʼ, che kkuyutaj ri qamak (chasikʼij 1 Juan 2:1). Sibʼalaj oj loqʼ chuwach ri qa Dios Jehová, rumal laʼ keʼutoʼ ri ajmakibʼ rech kkibʼan arrepentir kibʼ (Zac. 1:3; Rom. 2:4; Sant. 4:8).

3. ¿Jas kqil na pa wajun kʼutunem riʼ?

³ Ri Jehová kraj che junam kqabʼan che rilik ri makaj y ri winaq che kemakunik junam rukʼ ri kubʼan areʼ. Are waʼ ri kqil na pa wajun kʼutunem riʼ. Nabʼe chqilaʼ ri xkʼulmataj pa ri congregación re Corinto are chiʼ xetaʼmaxik che kʼo jun ajmak. Tekʼuriʼ kqil na ri xubʼij ri apóstol Pablo che rajawaxik kbʼanik are chiʼ ri winaq xubʼan arrepentir ribʼ. Y, chukʼisbʼal kqil na ri kuchomaj ri Jehová chkij ri winaq che kkibʼan jun tzʼilalaj mak.

¿JAS XUBʼAN RI CONGREGACIÓN RE RI NABʼE SIGLO ARE CHIʼ JUN WINAQ XUBʼAN JUN NIMALAJ MAK?

4. ¿Jas tajin kkʼulmataj pa ri congregación re Corinto? (1 Corintios 5:1, 2).

⁴ (Chasikʼij 1 Corintios 5:1, 2). Pa ri urox viaje che xubʼan ri Pablo xuto che pa ri congregación re Corinto tajin kbʼantaj jun nimalaj kʼax: jun cristiano tajin kubʼan relaciones sexuales rukʼ ri rixoqil ri utat. Ri Pablo xubʼij: «Jun itzelalaj kʼaslemal che man kʼo ta jeriʼ chkixoʼl ri winaq che man junam ta qakojonik kukʼ». Ri congregación utz kkil ri kubʼan ri achi riʼ y weneʼ kekikot rumal wariʼ. Weneʼ jujun xkichomaj che wariʼ kukʼutu che ri Dios kutoqʼobʼisaj kiwach ri winaq che ajmakibʼ. Pero ri Jehová itzel kril ri makaj. Ri makaj che tajin kubʼan ri achi riʼ, tajin kutzʼilobʼisaj ri congregación y weneʼ kubʼano che ri nikʼaj chi cristianos kkibʼan ke. Rumal laʼ, ¿jas xubʼij ri Pablo che rajawaxik kkibʼan ri cristianos re Corinto?

5. ¿Jas xutzʼibʼaj bʼi ri Pablo che ri congregación y jas xraj xubʼij rukʼ wariʼ? (1 Corintios 5:13; xuqujeʼ chawilaʼ ri wachbʼal).

⁵ (Chasikʼij 1 Corintios 5:13). Rukʼ ri espíritu santo ri Pablo xubʼij che ri congregación re Corinto che rajawaxik kkesaj bʼi ri achi rumal che ubʼanom ta arrepentir ribʼ. ¿Jas kkibʼan ri sukʼ taq cristianos che rilik ri achi riʼ? Ri Pablo xubʼij che rajawaxik kkichʼabʼej ta chik y kewaʼ ta chi rukʼ (1 Cor. 5:11). Are chiʼ kojwaʼ rukʼ jun winaq y kqaqʼaxej tiempo rukʼ, wariʼ kubʼano che kqamaj tzijonem rukʼ. Ri xraj xubʼij ri Pablo are che kkachilaj ta chi wajun achi riʼ. Je wariʼ kchajix ri congregación rech kkibʼan ta ke ri tajin kubʼano (1 Cor. 5:5-7). Y weneʼ wariʼ kubʼano che ri achi krilo che xubʼan kʼax che ri rachilanik rukʼ ri Jehová, kkʼix rumal ri xubʼano y kubʼan arrepentir ribʼ.

6. ¿Jas xtobʼan wi ri carta che ri congregación y ri ajmak che xutaq bʼi ri Pablo?

⁶ Are chiʼ ri Pablo utaqom chi bʼi ri carta che ri congregación re Corinto, xchoman chrij ri weneʼ kkichomaj ri qachalal are chiʼ kkita ri carta che ksikʼixik. Are chiʼ qʼaxinaq chi jubʼiqʼ tiempo, ri Tito xubʼij che ri apóstol Pablo che ri cristianos xkibʼan ronojel ri xubʼij chke (2 Cor. 7:6, 7). Y majaʼ naj utaqom bʼi ri Pablo ri carta are chiʼ ri achi xubʼan arrepentir ribʼ. Xuya kan ubʼanik ri makaj y xumaj unimaxik ri Jehová (2 Cor. 7:8-11). ¿Jas xubʼij chi ri Pablo che ri congregación rumal che ri achi xubʼan arrepentir ribʼ?

¿JAS RAJAWAXIK KUBʼAN RI CONGREGACIÓN RUKʼ RI ACHI CHE XUBʼAN ARREPENTIR RIBʼ?

7. ¿Jas utzilal xriqitajik rumal che xesax bʼi ri ajmak pa ri congregación? (2 Corintios 2:5-8).

⁷ (Chasikʼij 2 Corintios 2:5-8). Ri Pablo xubʼij: «Rukʼ waʼ we yajanik riʼ che ri achi riʼ, e kʼi chiwe e yajowinaq chik». Rukʼ ri xubʼij ri Pablo xukʼutu che ri achi xubʼan arrepentir ribʼ (Heb. 12:11).

8. ¿Jas xubʼij chi ri Pablo che ri congregación?

⁸ Ri Pablo xubʼij chi chke ri rajawaxik kkibʼan rukʼ wajun qachalal riʼ che xmakunik: «Chisachaʼ umak, chikuʼbʼisaj ukʼuʼx». Y xubʼij chik: «Kixinbʼochiʼj chi jumul kibʼan utzil che, rech kuchʼobʼo chi kiloqʼoqʼej na». Rukʼ wariʼ kqilo, che ri Pablo xaq xiw ta xubʼij chke che kkiya bʼe ktzalij pa ri congregación, xaneʼ xuqujeʼ kkikʼut chuwach che kekikotik che xubʼan arrepentir ribʼ y kkiloqʼoqʼej. Rukʼ wariʼ, ri achi krilo che kloqʼoqʼex kumal ri qachalal y che kekikotik che xtzalij loq.

9. ¿Jasche weneʼ jujun qachalal aninaq taj xkikuy umak ri achi?

⁹ ¿La kʼax xkibʼan jujun che ukuyik umak ri achi che xubʼan arrepentir ribʼ? Kʼo ta kubʼij wi, pero weneʼ je xkʼulmatajik. Rumal che rukʼ ri xubʼano xubʼan kʼax che ri congregación y weneʼ chke jujun qachalal. Weneʼ rumal laʼ xkichomaj che taqal ta che kkʼulax rukʼ loqʼoqʼebʼal rumal che ri e areʼ tajin kkikoj kichuqʼabʼ che ubʼanik ri kubʼij ri Jehová (chajunamisaj rukʼ Lucas 15:28-30). Pero, ¿jasche rajawaxik kkikʼut loqʼoqʼebʼal che ri qachalal che ubʼanom chi arrepentir ribʼ?

10, 11. ¿Jas ta xbʼantaj riʼ we ta ri kʼamal taq bʼe xkikuy ta umak ri achi riʼ?

¹⁰ ¿Jas ta xbʼantaj riʼ we ta ri kʼamal taq bʼe o ri e qachalal rukʼ ta loqʼoqʼebʼal y rukʼ ta ronojel kanimaʼ xkikʼulaj ri ajmak che ubʼanom chi arrepentir ribʼ? Ri ajmak weneʼ xunaʼ jun nimalaj bʼis riʼ. Weneʼ xuchomaj che kkun ta chik ktzalij rukʼ ri Jehová y che kkun ta chik kkʼojiʼ jun utz rachilanik rukʼ.

¹¹ Y xaq xiw ta wariʼ. We ta ri e qachalal re ri congregación xkikuy ta umak ri winaq, qas xuriq kʼax riʼ ri kachilanik rukʼ ri Dios. ¿Jasche? Rumal che tajin ta kkitoqʼobʼisaj uwach ri ajmak junam rukʼ ri kubʼan ri Jehová, che kukuy kimak ri kkibʼan arrepentir kibʼ, xaneʼ tajin kkesaj uwach riʼ ri Satanás, che kel ta ukʼuʼx y kutoqʼobʼisaj ta kiwach ri winaq. Y tajin kkiya bʼe riʼ che ri Satanás keʼukojo rech ri ajmak kupatanij ta chi ri Dios (2 Cor. 2:10, 11; Efes. 4:27).

12. ¿Jas kubʼan ri congregación che resaxik uwach Jehová?

¹² ¿Jas kubʼan ri congregación re Corinto rech are kresaj uwach ri Jehová y are ta ri Satanás? Kkibʼano are chiʼ kekil ri ajmakibʼ che kibʼanom chi arrepentir kibʼ junam rukʼ ri kubʼan ri Jehová. Chqilampeʼ ri xkibʼij jujun chke ri xetzʼibʼan ri Biblia chrij ri Dios. Ri David xubʼij: «Lal utz kkuyun kʼu la» (Sal. 86:5). Ri Miqueas xubʼij: «Man kʼo ta chi kʼu jun Dios jachaʼ ta ri lal, kekuy kʼu la ri etzelal» (Miq. 7:18). Y ri Isaías xubʼij: «Ri bʼanal etzelal chuyaʼ kan ri itzel ubʼe, ri itzel winaq cheʼuyaʼ kan ri itzel taq uchomanik chixtzelej rukʼ ri Ajawaxel, kel kʼu na ukʼuʼx chiwe chixtzelej rukʼ ri qa Dios, xaq kʼu ix reyem che usachik ri imak» (Is. 55:7).

13. ¿Jasche xyaʼ bʼe che ri ajmak xtzalij pa ri congregación? (Chawilaʼ ri recuadro «¿Jampaʼ xyaʼ chi bʼe che ri achi re Corinto che kzalij pa ri congregación?»).

¹³ Rech kekunik kkesaj uwach ri Jehová, ri congregación re Corinto rajawaxik che rukʼ loqʼoqʼebʼal kkikʼulaj chi jumul ri achi che xuya kan ubʼanik ri umak. Ri Pablo xubʼij che we kkikuy umak ri achi, tajin kkikʼut riʼ che kkinimaj ri Dios (2 Cor. 2:9). Paneʼ xa kebʼ oxibʼ ikʼ esam bʼi pa ri congregación, pero xtobʼanik rech xubʼan arrepentir ribʼ che ri umak. Rumal laʼ ri kʼamal taq bʼe xkibʼey taj che ri achi xtzalij pa ri congregación.

¿JAS KQETAʼMAJ CHRIJ RI USUKʼILAL Y RI UTOQʼOBʼISAL WACHJ RI JEHOVÁ?

14, 15. ¿Jas kqetaʼmaj chrij ri xbʼan che utoʼik ri ajmak pa ri congregación re Corinto? (2 Pedro 3:9; xuqujeʼ chawilaʼ ri wachbʼal).

¹⁴ Ri Jehová xubʼano che xtzʼibʼax kan pa ri Utzij ri xbʼan che utoʼik ri achi re Corinto che xtzalij pa ri congregación rech kʼo kqetaʼmaj chrij (Rom. 15:4). Wariʼ kukʼut chqawach che ri Dios utz ta krilo che kbʼan tzʼil taq mak pa ri utinamit. Jujun weneʼ kkichomaj che, rumal che ri Jehová kutoqʼobʼisaj kiwach ri winaq kekunik kekʼojiʼ pa ri congregación paneʼ tajin kemakunik. Pero qastzij ta wariʼ. Qastzij che ri Jehová kutoqʼobʼisaj kiwach ri winaq, pero kuya ta bʼe che kbʼan makunik pa ri congregación (Jud. 4). We ta ri Jehová kuya bʼe che jun ajmak kkʼojiʼ pa ri congregación, tajin ta kutoqʼobʼisaj kiwach riʼ ri más qachalal y weneʼ kkiriq kʼax (Prov. 13:20; 1 Cor. 15:33).

¹⁵ Pero ri Jehová kraj taj che nijun winaq ksach uwach. Ri qas kraj are che e juntir kkiriq ri kʼaslemal kʼo ta ukʼisik. Kutoqʼobʼisaj kiwach ri kkibʼan arrepentir kibʼ che ri kimak y tajin kkikoj kichuqʼabʼ rech kkibʼan chi jumul ramigos (Ezeq. 33:11; chasikʼij 2 Pedro 3:9). Rumal laʼ, are chiʼ ri achi re Corinto xubʼan arrepintir ribʼ y xuya kan ubʼanik ri makaj, ri Jehová xubʼij che ri congregación che kkikʼulaj chi jumul rukʼ loqʼoqʼebʼal.

16. ¿Jas kanaʼ che ri Jehová are chiʼ katchoman chrij ri xbʼan che rilik ri achi che xubʼan jun nimalaj makaj pa ri ojer Corinto?

¹⁶ Ri xkʼulmataj pa ri congregación re Corinto kojutoʼ che rilik ri uloqʼoqʼebʼal, ri usukʼilal y ri toqʼobʼisal wachaj che kukʼut ri Jehová (Sal. 33:5). ¿La mat qastzij che wariʼ kubʼano che más kqaya uqʼij ri qa Dios Jehová? Juntir oj ajmakibʼ y kajwataj chqe che kukuy ri qamak. Sibʼalaj kqamaltyoxij che xuya ri ukʼaslemal ri Ukʼojol chqe rech kkuyutaj ri qamak. Kukubʼsaj qakʼuʼx retaʼmaxik che ri Jehová kojuloqʼoqʼej oj juntir y che kraj kqariq utzilal.

17. ¿Jas kqil na pa ri nikʼaj chi kʼutunem?

¹⁷ ¿Y jas kbʼan kamik we kbʼantaj jun nimalaj mak pa ri congregación? ¿Jas kkibʼan ri kʼamal taq bʼe che resaxik uwach ri Jehová rech kkitoʼ ri winaq kubʼan arrepentir ribʼ? ¿Jas rajawaxik kqabʼano are chiʼ ri kʼamal taq bʼe kkesaj bʼi jun winaq pa ri congregación o are chiʼ ktzalij chi jumul? Kqil na wariʼ pa ri nikʼaj chi kʼutunem.