¿Jas utzilal kqariqo we kqabʼan qamigo che ri Jehová?

1, 2. a) ¿Jas rajawaxik kqabʼano rech kkʼojiʼ jun utz qamigo? b) ¿Jas kqil na pa wajun kʼutunem riʼ?

CHATCHOMAN chrij jun utzalaj awamigo kʼolik. ¿La knaʼtaj chawe jas xbʼanowik che xkʼojiʼ jun utzalaj achilanik chixoʼl? Qastzij riʼ che kʼi tiempo xatkʼojiʼ rukʼ y xawilo jas ri utz krilo y jas ri utz taj. Y weneʼ xawilo che e kʼo utz taq ubʼantajik che kawaj kawesaj uwach. Y ronojel wariʼ xubʼano che qas kawaj ri awamigo.

² Kajwataj tiempo y chuqʼabʼ rech kkʼojiʼ jun awachilanik junam rukʼ wariʼ rukʼ jun awamigo, junam kkʼulmataj rukʼ ri qachilanik rukʼ ri Jehová. Pa wajun kʼutunem riʼ kqil na jas kqabʼano rech knimar más ri qachilanik rukʼ ri Jehová ri utzalaj qamigo. Pero nabʼe kqil na jasche utz che kqabʼan wariʼ.

3. ¿Jasche sibʼalaj utz kojchoman chrij ri tewchibʼal kqariqo are chiʼ kqabʼan qamigo che ri Jehová? Chayaʼ jun ejemplo.

³ Nim upatan che kojchoman chrij ronojel ri rumal che kqabʼan qamigo che ri Jehová (Sal. 63:6-8). ¿Jasche? Chqakojoʼ jun ejemplo rech kqachʼobʼo. Qetaʼm che kqariq utzilal we utz kqabʼan che uchaʼik ri kqatijo, kqatij ri jaʼ ri kajwataj chqe, kqabʼan ejercicio y kojwar ri tiempo che rajawaxik. Pero kʼi chqe kqabʼan ta wariʼ. Pero ri winaq che kchoman chrij ri utzilal kuriqo we kubʼan ronojel wariʼ qas kukoj uchuqʼabʼ riʼ che ubʼanik. Xaq junam rukʼ, we kqabʼan qamigo che ri Jehová kuya kʼi tewchibʼal chqe. Pero we kojchoman chrij ri tewchibʼal kqariqo, kojutoʼo rech ronojel qʼij kqanimarisaj más ri qachilanik rukʼ (Sal. 119:27-30).

4. ¿Jas xubʼij ri salmista pa ri Salmo 73:28?

⁴ (Chasikʼij Salmo 73:28). Ri xtzʼibʼan ri Salmo 73 kpe pa ri tribu re Leví y xubʼan música pa ri templo. Weneʼ kʼi junabʼ tajin kupatanij chi ri Jehová, pero xrilo che nim ubʼanik che kkʼojiʼ jun utzalaj rachilanik rukʼ. Y xraj che ri nikʼaj chik kkil ri utzilal che kuyaʼ chke are chiʼ kkibʼan kamigo che ri Jehová. Chanim riʼ chqilaʼ ri jujun utzilal kuyaʼo.

KUYA KIKOTEMAL CHQE ARE CHIʼ KQABʼAN QAMIGO CHE RI JEHOVÁ

5. a) ¿Jasche kuya kikotemal chqe are chiʼ kqabʼan qamigo che ri Jehová? b) ¿Jas kubʼan che qatoʼik ri unojibʼal ri Jehová? (Proverbios 2:6-16).

⁵ Are chiʼ más kqanimarisaj ri qachilanik rukʼ ri Jehová, más kojkikotik (Sal. 65:4). ¿Jasche kqabʼij wariʼ? Rumal che we kqanimaj ri pixabʼ che kuya ri Jehová chqe pa ri Biblia kqariq utzilal. Ri unojibʼal ri Jehová kojutoʼo rech kqaxutuj ri itzel taq achilanik y rech kabʼan ta tzʼil taq mak (chasikʼij Proverbios 2:6-16). Rumal laʼ ri Biblia kubʼij: «Sibʼalaj utz re ri winaq ri kuriq ri noʼj, ri kuriq ri etaʼmanik» (Prov. 3:13).

6. ¿Jasche xkikot ta chi ri salmista?

⁶ Wariʼ kraj taj kubʼij che ri upatanelabʼ ri Jehová kʼo ta chi jumul kebʼisonik. Ri xtzʼibʼan ri Salmo 73 xbʼisonik are chiʼ xchoman chrij ri utzilal che weneʼ kkiriq ri winaq che kepatanin ta che ri Jehová. Xpe royowal are chiʼ xrilo che ri winaq ri keniman ta che ri Dios kkiriq utzilal y xraj re ri kʼo kukʼ. Xuchomaj che ri winaq che kkibʼan itzelal y kkibʼan nimal are ri más kʼo kiqʼinomal, keyawaj taj y kʼo ta kʼax kkiriqo; pero qastzij ta wariʼ (Sal. 73:3-7, 12). Sibʼalaj kʼo royowal, rumal laʼ xuchomaj we kʼo upatan che tajin kukoj uchuqʼabʼ che upatanixik ri Dios. Rukʼ bʼis xubʼij: «¡Man kʼo ta kupatanij chwe chi josqʼital ri wanimaʼ, xuqujeʼ chi keʼen josqʼij ri nuqʼabʼ che ronojel etzelal!» (Sal. 73:13).

7. ¿Jas kqabʼano rech kqariq chi jumul ri kikotemal are chiʼ kojbʼisonik? (Xuqujeʼ chawilaʼ ri wachbʼal).

⁷ Ri salmista kʼo xubʼano rech kkikot chi jumul. Xok pa ri lugar jawiʼ «kqʼijilax wi ri Dios», y ri Dios xukʼut chuwach che utz ta ri tajin kuchomaj (Sal. 73:17-19). Rumal che ri Jehová are ri utzalaj qamigo, krilo are chiʼ kojbʼisonik. Rajawaxik kqabʼij che che kukʼam qabʼe y kqakʼam ri tobʼanik che kuya ri congregación chqe. Je wariʼ kqaya ta kan upatanexik ri Jehová paneʼ kojbʼisonik. Are chiʼ sibʼalaj kojbʼison rumal ri kqakʼulmaj pa ri qakʼaslemal, ri Jehová kojutoʼo y kukubʼsaj qakʼuʼx (Sal. 94:19).a

KQARIK KIKOTEMAL Y JUN EYEBʼAL ARE CHIʼ KQABʼAN QAMIGO CHE RI DIOS

8. ¿Jas nikʼaj chi utzilal kqariqo are chiʼ kqabʼan qamigo che ri Dios?

⁸ Kʼo kebʼ chi utzilal kqariqo are chiʼ kqabʼan qamigo che ri Dios. Nabʼe, kojkikotik y kubʼano che ri qakʼaslemal kʼo upatan. Ukabʼ, kʼo jun kubʼsal kʼuʼx chqe chrij ri petinaq (Jer. 29:11). Chqanikʼoj wariʼ chkijujunal.

9. ¿Jasche kʼo upatan ri qakʼaslemal are chiʼ kqabʼan qamigo che ri Jehová?

⁹ kqanaʼo che kʼo upatan ri qakʼaslemal are chiʼ kqabʼan qamigo che ri Jehová. Kamik, e kʼi winaq kkibʼij che kʼo ta Dios. Rumal laʼ kkinaʼo che kʼo ta upatan ri kikʼaslemal y kkichomaj che ri winaq ksach na kiwach. Are kʼu, rukʼ ri qetaʼmam pa ri Biblia qas qetaʼm che «kʼolik, xuqujeʼ chi kuyaʼ tojbʼal ke ri winaq ri kkitzukuj ri areʼ» (Heb. 11:6). Ri Jehová xojubʼano che kqaj kqapatanij. Y rumal che tajin kqapatanij, kqanaʼo che kʼo upatan ri qakʼaslemal y kojkikotik (Deut. 10:12, 13).

10. Junam rukʼ ri kubʼij Salmo 37:29, ¿jas kkiriq na ri winaq che kkikubʼsaj kikʼuʼx chrij ri Jehová?

¹⁰ E kʼi winaq kʼo ta jun ki kubʼsal kʼuʼx chrij ri petinaq. Xaq xiw kechakunik, kekʼojiʼ kalkʼwal, kkimulij ki pwaq rech kʼo ri kajwataj chke are chiʼ kerijobʼik y kechoman ta chrij ri Dios. Pero ri oj kqakubʼsaj qakʼuʼx chrij ri Jehová (Sal. 25:3-5; 1 Tim. 6:17). Kqakubʼsaj qakʼuʼx chrij ri qa Dios y qamigo y qetaʼm che qas kutzʼaqatisaj na ri kubʼij. Kʼi utzilal kqariq na pa ri petinaq y jun chke are che kqaqʼijilaj na ri Jehová pa ri kʼakʼ uwach Ulew (chasikʼij Salmo 37:29).

11. ¿Jas utzilal kqariqo are chiʼ kqabʼan qamigo che ri Jehová y jas kunaʼ ri areʼ che oj ramigos?

¹¹ Kʼo kʼi utzilal kqariqo are chiʼ kqabʼan qamigo che ri Jehová. Jun chke are che ri Jehová kukuy qamak we kqabʼan arrepentir qibʼ (Is. 1:18). Wariʼ kraj kubʼij che kubʼan ta molestar ri qa conciencia rumal ri xqabʼan ojer kanoq (Sal. 32:1-5). Xuqujeʼ kqaya kikotemal che ri Jehová y kubʼano che kojkikotik (Prov. 23:15). Qastzij riʼ che qariqom nikʼaj chi utzilal rumal che tajin kqapatanij ri Jehová. Pero ¿jas más kojkunik kqabʼano rech kqanimarisaj ri qachilanik rukʼ ri Jehová?

¿JAS MÁS KQABʼANO RECH KQANIMARISAJ RI QACHILANIK RUKʼ RI JEHOVÁ?

12. ¿Jas rajawaxik kabʼano rech kanimarisaj ri awachilanik rukʼ ri Jehová?

¹² We at testigo rech Jehová chik, wariʼ kraj kubʼij che kʼi chi awetaʼmam chrij ri Jehová y ri Jesús, xabʼan arrepentir awibʼ che ri amak, akʼutum che kakubʼsaj akʼuʼx chrij ri Dios y tajin kakoj achuqʼabʼ rech kanimaj ri kubʼij chawe. Rumal laʼ, kʼo jun utzalaj awachilanik rukʼ ri Jehová. Pero, rajawaxik kaya ta kan ubʼanik wariʼ rech amaqʼel at ramigo ri Jehová (Col. 2:6).

13. ¿Jas oxibʼ jastaq kojutoʼo rech amaqʼel oj ramigos ri Jehová?

¹³ ¿Jas kojutoʼo rech amaqʼel oj ramigos ri Jehová? 1) Rajawaxik kqaya ta kan usikʼixik ri Biblia. Y kqaj taj che xaq jubʼiqʼ kqetaʼmaj chrij ri Dios. Xaneʼ kqaj kqetaʼmaj ri urayibʼal y kqabʼan ri kubʼij ri Biblia chqe (Efes. 5:15-17). 2) Chqanimarisaj ri qakojonik chrij ri Jehová are chiʼ kojchoman chrij juntir ri ubʼanom che ukʼutik che kojraj. 3) Rajawaxik kqaxutuj ri jastaq che kuya bʼis che ri Jehová y keqachilaj ta ri winaq che kkibʼan itzel taq jastaq (Sal. 1:1; 101:3).

14. ¿Jas kojkunik kqabʼan ronojel taq qʼij rech kqakikotemaj ri Jehová? (1 Corintios 10:31; xuqujeʼ chawilaʼ ri e wachbʼal).

¹⁴ (Chasikʼij 1 Corintios 10:31). Rajawaxik kqakoj qachuqʼabʼ che ubʼanik ronojel ri kuya kikotemal che ri Jehová. Xaq xiw ta kojbʼe che ubʼanik predicar o kojbʼe pa ri e riqbʼal ibʼ. Rajawaxik che kkikot ri Jehová rukʼ ri kqabʼan ronojel taq qʼij. Ri Jehová kkikotik are chiʼ oj utz pa ronojel (honrados) y kojsipan chke ri nikʼaj chik (2 Cor. 8:21; 9:7). Y kraj che nim kqil ri kʼaslemal che uyaʼom chqe. Rumal laʼ más kojqebʼ rukʼ are chiʼ kqaya ta uwiʼ ri kqatijo y kqachajij qibʼ rech kojyawaj taj. Ronojel ri chuqʼabʼ che kqakojo rech kkikot ri Jehová qumal, ktobʼanik rech más kojuloqʼoqʼej (Luc. 16:10).

15. ¿Jas kraj ri Jehová che kqabʼan che kilik y kichʼabʼexik ri nikʼaj chik?

¹⁵ Ri Jehová junam kubʼan che kilik juntir ri winaq (Mat. 5:45). Y kraj che je kqabʼan oj. Ri Jehová kraj che ri upatanelabʼ «kekiyoqʼ ta nikʼaj chik», «kkiyak ta chʼoj rukʼ ri kitzij» y che «e bʼanal taq utzil» (Tito 3:2). Rumal la kqabʼan taj che más nim qabʼanik chkiwach ri junam ta kikojonik qukʼ (2 Tim. 2:23-25). Más kojqebʼ riʼ rukʼ ri Jehová we rukʼ utzilal keqachʼabʼej ri nikʼaj chik.

KOJKUNIK KQABʼAN QAMIGO CHE RI JEHOVÁ PANEʼ KʼO KOJSACH WI

16. ¿Jas xunaʼ ri xtzʼibʼan ri Salmo 73?

¹⁶ ¿Y we kqachomaj che ri Jehová kʼo ta chi qukʼ? Chnaʼtaj chqe ri xkʼulmataj rukʼ ri xtzʼibʼan ri Salmo 73. Ri areʼ rukʼ bʼis xubʼij ri e tzij riʼ: «Jubʼiqʼ ta chik, xintzaq ta ri; xejilijobʼ jubʼiqʼ ri waqan» (Sal. 73:2). Ri areʼ xubʼij che xnoj «che kʼayil», rumal che kʼo ta unoʼj y che chuwach ri Jehová xjunamataj «rukʼ jun awaj» (Sal. 73:21, 22). ¿La xuchomaj che kkuyutaj ta chi ri umak y che taqal ta chi che kloqʼoqʼex rumal ri Jehová?

17. a) ¿Jas xubʼan ri salmista are chiʼ sibʼalaj xbʼisonik? b) ¿Jas kqetaʼmaj chrij ri xukʼulmaj? (Xuqujeʼ chawilaʼ ri e wachbʼal).

¹⁷ Naj ta xuchʼij ri xuchomaj ri salmista che kloqʼoqʼex ta chi rumal ri Jehová. Are chiʼ más kbʼisonik xrilo che rajawaxik más kqebʼ rukʼ ri Jehová. Qetaʼm wariʼ rumal che xubʼij: «Amaqʼel kʼut in kʼolinaq ukʼ la. In yuqem la che ri nuwikiqʼabʼ, kʼamom la nubʼe kukʼ taq ri pixbʼenik la, chukʼisbʼalil kinkʼulaj na la rukʼ kikotemal» (Sal. 73:23, 24). Are chiʼ sibʼalaj kojbʼisonik, ri oj xuqujeʼ kojkunik kqatzukuj ri Jehová rech kojkikot chi jumul (Sal. 73:26; 94:18). ¿Y we kʼo jumul kʼo kojsach wi? Kojkunik kqatzukuj ri utobʼanik ri Jehová rumal che qas qetaʼm che ri areʼ qas kukuy qamak (Sal. 86:5). Más kqatzukuj ri utobʼanik ri Jehová are chiʼ sibʼalaj kojbʼisonik (Sal. 103:13, 14).

MAQAYA KAN UTZUKUXIK RI JEHOVÁ

18. ¿Jasche amaqʼel kʼo kʼi kqetaʼmaj chrij ri Jehová?

¹⁸ Amaqʼel kʼo kʼi kqetaʼmaj chrij ri Jehová. Ri Biblia kubʼij che ri unoʼj y ri retaʼmabʼal ri Jehová sibʼalaj nim y che «man kʼo ta jun kkun che retaʼmaxik» ronojel, rumal laʼ amaqʼel kʼo kʼi kqetaʼmaj chrij (Rom. 11:33).

19. ¿Jas kubʼsal kʼuʼx kuya wajun Salmo riʼ chqe?

¹⁹ Ri Salmo 79:13 kubʼij: «Ri uj kʼut ri uj tinamit la, ri uj chij rech ri yuqʼbʼal la, kqaya na maltyoxinik che la amaqʼel; ¡kojbʼixon na che la chbʼe qʼij saq!». Qas chawetaʼmaj che we kanimarisaj ri awachilanik rukʼ ri Jehová, ri areʼ katutewchiʼj na pa ronojel ri akʼaslemal y katkunik kabʼij: «Ri Dios kʼut areʼ junalik wechbʼal areʼ kyoʼw uchuqʼabʼ ri wanimaʼ» (Sal. 73:26).