Chqesaj kiwach ri ángeles

1, 2. a) ¿Jas kojjunamataj ta wi kukʼ ri ángeles? b) ¿Jas kkibʼan ri ángeles che ri oj xuqujeʼ kqabʼano?

ARE chiʼ ri Jehová xatukʼam lo pa ri utinamit, xatubʼan invitar rech katkʼojiʼ pa ri u familia. Wajun familia kʼo jalajoj kiwach winaq chupam, pero sibʼalaj kkiloqʼoqʼej kibʼ y xaq xiw ta ri winaq e kʼo pa wajun familia riʼ xaneʼ xuqujeʼ ri ángeles che e kʼo pa ri kaj (Dan. 7:9, 10). Are chiʼ kojchoman chkij ri ángeles weneʼ kqachomaj che kojjunamataj ta kukʼ. Ri ángeles nabʼe xebʼan chkiwach ri winaq (Job 38:4, 7). Kʼo kichuqʼabʼ xuqujeʼ e chʼajchʼoj y e junam ta qukʼ, rumal che oj ajmakibʼ (Luc. 9:26).

² Paneʼ oj junam ta kukʼ ri ángeles, are kʼu kʼo kʼi jastaq kkibʼano che oj xuqujeʼ kqabʼano. Jun kʼutbʼal, ri oj xuqujeʼ kojkunik kqakʼut ri utz taq ubʼantajik ri Jehová, kojkunik kqachaʼ ri kqaj kqabʼano, kʼo qabʼiʼ, jalajoj qabʼantajik, kʼi kqabʼan che upatanexik ri Jehová y kqaya uqʼij ri Jehová junam rukʼ ri kkibʼan ri ángeles (1 Ped. 1:12).

3. ¿Jas kqetaʼmaj chkij ri ángeles?

³ Xqilo che kʼo kʼi kojjunamataj wi kukʼ ri ángeles, rumal laʼ kʼo kʼi kqetaʼmaj chkij. Pa wajun kʼutunem riʼ kqetaʼmaj na ri kqabʼan che resaxik kiwach ri ángeles, ri kkibʼan che ukʼutik machʼachʼem, ri kkibʼan che kiloqʼoqʼexik ri winaq, ri kibʼanom che uchʼijik ri bʼis are chiʼ kkilo che ri winaq kkiriq kʼax o ri tajin kkibʼano rech kʼo ta itzelal pa ri congregación.

RI ÁNGELES KKIKʼUT MACHʼACHʼEM

4. a) ¿Jas kkibʼan ri ángeles che ukʼutik che kkimachʼ kibʼ? b) ¿Jasche kkimachʼ kibʼ ri ángeles? (Salmo 89:7).

⁴ Ri ángeles kkimachʼ kibʼ. Paneʼ kʼo kʼi kichuqʼabʼ xuqujeʼ kinojibʼal, are keniman che ri Jehová (Sal. 103:20). Kkibʼan ri chak che kuya ri Jehová chke y nim ta kkibʼan che kibʼ paneʼ kʼo nim kichuqʼabʼ. Kekikotik are chiʼ kkibʼan ri kraj ri Jehová, paneʼ nijun etaʼmanaq ri kibʼiʼ (Gén. 32:24, 29; 2 Rey. 19:35).a Kkaj che xaq xiw ri Jehová kyaʼ uqʼij. ¿Jasche kkimachʼ kibʼ ri ángeles? Rumal che kkiloqʼoqʼej ri Jehová y nim kkil wi (chasikʼij Salmo 89:7).

5. ¿Jas xubʼan jun ángel che ukʼutik che kumachʼ ribʼ are chiʼ xtzijon rukʼ ri apóstol Juan? (Xuqujeʼ chawilaʼ ri wachbʼal).

⁵ Chqilaʼ ri ukʼutbʼal jun ángel che xumachʼ ribʼ. Pa ri junabʼ 96 jun ángel che qetaʼm ta ri ubʼiʼ xukʼut jun visión chuwach ri Juan che nim ubʼanik (Apoc. 1:1). ¿Jas xunaʼ ri Juan are chiʼ xril wariʼ? Aninaq xxukiʼk rech kuqʼijilaj ri ángel. Pero ri ángel xuya ta bʼe che y xubʼij: «¡Mabʼano! In awach pataninel, in kach pataninel ri awachalal [...]. Are chaqʼijilaj ri Dios» (Apoc. 19:10). ¡Sibʼalaj xumachʼ ribʼ ri ángel! Xubʼij che are ri Jehová ri kyaʼ uqʼij. Xuchomaj taj che más nim ubʼanik chuwach ri Juan, paneʼ más kʼi chi tiempo tajin kupatanij ri Jehová y kʼo más uchuqʼabʼ chuwach, xumachʼ ribʼ areʼ chi xubʼij: «In awach pataninel». Paneʼ xuqʼil ri Juan, are kʼu rukʼ ta oyowal xubʼano. Xaneʼ rukʼ utzilal rumal che xrilo che ri Juan sibʼalaj xumay ri xril pa ri visión.

6. ¿Jas kqabʼano rech kqakʼut machʼachʼem junam kukʼ ri ángeles?

⁶ ¿Jas kqabʼano rech kqakʼut machʼachʼem junam kukʼ ri ángeles? Kqesaj kiwach ri ángeles are chiʼ kqabʼan ri chak che kyaʼ chqe y kqabʼan ta nim che qibʼ rumal che qas kojkun che ubʼanik (1 Cor. 4:7). Kqachomaj taj che más nim qabʼanik chkiwach ri nikʼaj chik, xa rumal che kʼi chi junabʼ tajin kqapatanij ri Jehová o yaʼom jujun eqeleʼn chqe. Xaneʼ are chiʼ kyaʼ más eqeleʼn chqe rajawaxik más kqamachʼ qibʼ (Luc. 9:48). Kqaj keqapatanij ri nikʼaj chik junam rukʼ ri kkibʼan ri ángeles, kqaj taj che ri qachalal kkichomaj che kqanaʼo che más nim qabʼanik chkiwach.

7. ¿Jas kqabʼan che ukʼutik machʼachʼem are chiʼ kqapixbʼej jun chik?

⁷ Xuqujeʼ rajawaxik kqamachʼ qibʼ are chiʼ kqaya pixabʼ weneʼ che jun qachalal pa ri congregación o chke ri qalkʼwal. Weneʼ jujun taq mul rajawaxik che kqaxiʼj ta qibʼ kqapixbʼej jun chik. Pero, junam rukʼ ri xubʼan ri ángel che rukʼ utzilal xupixbʼej ri apóstol Juan, oj xuqujeʼ kojkunik rukʼ utzilal kojpixbʼenik rech kqabʼan ta kʼax che ri winaq. We kqabʼan ta nim che qibʼ, rukʼ utzilal riʼ kqaya ri pixabʼ y pa ri Biblia riʼ kqesaj wi (Col. 4:6).

RI ÁNGELES KEKILOQʼOQʼEJ RI WINAQ

8. a) Junam rukʼ kubʼij Lucas 15:10, ¿jas kkibʼan ri ángeles che ukʼutik che e loqʼ ri winaq chkiwach? b) ¿Jas tobʼanik kkiya ri ángeles che utzijoxik ri utzij ri Dios? (Chawilaʼ ri wachbʼal).

⁸ Ri ángeles xaq ta kkil ri kkikʼulmaj ri winaq xaneʼ kekiloqʼoqʼej. Kekikotik are chiʼ jun winaq ktzalij rukʼ ri Jehová o are chiʼ jun winaq kretaʼmaj chrij ri Biblia y kukʼex ri ukʼaslemal (chasikʼij Lucas 15:10). Ri ángeles xuqujeʼ ketobʼan che utzijoxik ri utzij ri Dios (Apoc. 14:6). Paneʼ are ta ri ketzijon kukʼ ri winaq, are kʼu kojkitoʼo rech keqariq ri winaq che kʼo jun utz kanimaʼ. Are kʼu qetaʼm taj jachin winaq kekitoʼ ri ángeles. Rumal che ri Jehová xuqujeʼ kukoj ri u espíritu santo rech keʼutoʼ ri winaq (Hech. 16:6, 7). Pero ri Jehová kʼi taq mul keʼukoj ri ángeles. Rumal laʼ are chiʼ kqatzijoj ri utzij ri Dios qetaʼm che ri ángeles e kʼo qukʼ che qatoʼik. (Chawilaʼ ri recuadro «Ri Dios xuta ri ki oración»).b

9. ¿Jas kqabʼan che resaxik uwach ri kiloqʼoqʼebʼal ri ángeles chke ri winaq?

⁹ ¿Jas kqabʼan che resaxik uwach ri kiloqʼoqʼebʼal ri ángeles chke ri winaq? Are chiʼ pa ri congregación kbʼixik che jun winaq jumul chik testigo rech Jehová, kojkunik kqakʼut kikotemal junam rukʼ ri kkibʼan ri ángeles. Chqayaʼ utz upetik ri qachalal y chqakʼutuʼ chuwach che kqaj (Luc. 15:4-7; 2 Cor. 2:6-8). Xuqujeʼ kqesaj kiwach ri ángeles are chiʼ kqakoj qachuqʼabʼ che utzijoxik ri utzij ri Dios (Ecl. 11:6). Ri ángeles kojkitoʼ che utzijoxik ri utzij ri Dios, ri oj xuqujeʼ kojkunik keqatoʼ ri qachalal pa ri predicación. Utz che kojel rukʼ jun qachalal che kʼateʼ xumajij utzijoxik ri utzij ri Dios, jun qachalal nim chi ujunabʼ o jun che uriqom jun yabʼil.

10. ¿Jas kqetaʼmaj chrij ri ukʼutbʼal ri qachalal Sara?

¹⁰ ¿Y we kojkun taj kʼi kqabʼan che upatanexik ri Jehová? Paneʼ jeriʼ, are kʼu kʼo kojkunik kqabʼan che kitoʼik ri ángeles che utzijoxik ri utzij ri Dios. Chqilampeʼ ri xukʼulmaj jun qachalal che kel pa India ubʼiʼ Sara.c 20 junabʼ chik tajin kubʼan ri precursorado, are kʼu xuriq jun yabʼil che kubʼano che kkun ta chik kwalijik, ri qachalal sibʼalaj xbʼisonik. Rukʼ ri kitobʼanik ri qachalal y rumal xuya ta kan usikʼixik ri Biblia, nojimal xkikot chi jumul. Are kʼu xutzukuj ri xubʼan che utzijoxik ri utzij ri Dios. Rumal che kkun taj ktʼuyiʼk y kutzʼibʼaj cartas, xutzijoj ri utzij ri Dios pa teléfono. Are xeʼuchʼabʼej ri winaq che nabʼe kanoq keʼusolij y ri winaq riʼ xkibʼij che che kʼo nikʼaj chik che weneʼ kkaj kketaʼmaj chrij ri Biblia. ¿Jas xkʼulmatajik? Xaq kebʼ oxibʼ ikʼ qʼaxinaq, ri qachalal Sara tajin chi kuya 70 etaʼmanik rech ri Biblia. ¡Sibʼalaj e kʼi ri winaq tajin kketaʼmaj chrij ri Biblia, ri qachalal kkun ta chik keʼutoʼo! Rumal laʼ, jujun chke ri qachalal re ri congregación xkimaj uyaʼik etaʼmanik chke ri winaq riʼ y e kʼi chke tajin kebʼe pa ri e riqbʼal ibʼ. Qastzij riʼ che ri ángeles sibʼalaj kekikotik rumal che ketobʼan kukʼ qachalal junam rukʼ ri qachalal Sara, che tajin kkikoj kichuqʼabʼ che utzijoxik ri utzij ri Dios.

RI ÁNGELES KKICHʼIJ RILIK RI KʼAX CHE TAJIN KKʼULMATAJIK

11. ¿Jas kʼutbʼal kkiya ri ángeles chqawach rech kojkunik kqachʼij ri kʼax che kqakʼulmaj?

¹¹ Ri ángeles kkikʼut chqawach che kojkunik kqachʼij ri kʼax che kqakʼulmaj. Pa kʼi taq junabʼ tajin kkil ri kʼax che tajin kkʼulmataj pa ri uwach Ulew. Xkilo are chiʼ ri Satanás y nikʼaj chi ángeles xkiya kan upatanexik ri Dios (Gén. 3:1; 6:1, 2; Jud. 6). Xuqujeʼ ri Biblia kchʼaw chrij jun ángel che xchʼojin rukʼ jun demonio che nim uchuqʼabʼ (Dan. 10:13). Y ri ángeles kilom che e kʼi ri winaq kkaj taj kkipatanij ri Jehová. Pero kiyaʼom ta kan upatanexik ri Jehová rukʼ kikotemal. Ketaʼm che ri Dios kusachisaj na juntir ri kʼax.

12. ¿Jas kojtoʼwik rech kqachʼij ri kʼax?

¹² ¿Jas kqabʼan che resaxik kiwach ri ángeles rech kqachʼij ri kʼax? Ri oj xuqujeʼ kqil kʼi kʼaxkʼolil cho ri uwach Ulew o weneʼ kbʼan kʼax chqe rumal ri qakojonik, pero qas qetaʼm che ri Dios kusachisaj na uwach ri itzelal. Rumal laʼ, «makʼistaj bʼaʼ qakʼuʼx che ubʼanik ri utzil» junam kukʼ ri ángeles che kiyaʼom ta kan upatanixik ri Jehová (Gál. 6:9). Y ri Jehová xuqujeʼ ubʼim che kojutoʼ na rech kqachʼij ri kʼax (1 Cor. 10:13). Kojkunik kqataʼ ri u espíritu santo, rech kkʼojiʼ qa paciencia y rech kojutoʼ che uriqik kikotemal (Gál. 5:22; Col. 1:11). ¿Jas katkunik kabʼano we tajin kbʼan kʼax chawe rumal ri akojonik? Chakubʼsaj akʼuʼx chrij ri Jehová y kaxiʼj ta awibʼ. Ri areʼ katuya ta kanoq y amaqʼel katutoʼ na (Heb. 13:6).

RI ÁNGELES KETOBʼANIK RECH KʼO TA ITZELAL KBʼAN PA RI CONGREGACIÓN

13. ¿Jas jun utzalaj chak tajin kkibʼan ri ángeles kamik? (Mateo 13:47-49).

¹³ Pa taq ri kʼisbʼal taq qʼij riʼ, ri Jehová uyaʼom jun utzalaj eqeleʼn chke ri ángeles (chasikʼij Mateo 13:47-49). Kamik ri predicación tajin keʼutoʼ e kʼi winaq cho ronojel uwach Ulew. E jujun chke kkikʼex ri kikʼaslemal y keʼux cristianos, are kʼu nikʼaj chik kkaj taj. Rumal laʼ ri ángeles kekijach «ri itzel taq winaq chkixoʼl ri winaq ri e sukʼ». Je wariʼ ketobʼanik rech kʼo ta itzelal pa ri congregación. Wariʼ kraj ta kubʼij che we jun qachalal kuya kan upatanexik ri Jehová kuya ta chik ktzalij loq y che mat kkʼulmataj jun chʼoj pa ri congregación. Qas qetaʼm che ri ángeles kʼi kkibʼano rech kʼo utzilal pa ri congregaciones.

14, 15. ¿Jas kojkunik kqabʼano rech kqesaj kiwach ri ángeles che kkaj kkʼojiʼ utzilal pa ri congregación? (Xuqujeʼ chawilaʼ ri e wachbʼal).

¹⁴ ¿Jas kqabʼan che resaxik kiwach ri ángeles rech kʼo ta itzelal pa ri congregación? Kqakoj qachuqʼabʼ rech kqanimaj ri Jehová pa ronojel y kqachajij ri qakojonik. Chqajujunal rajawaxik kqachajij qibʼ y qas kqil na jachin keqachilaj y kqabʼan ta jastaq che utz ta kril ri Jehová. Je wariʼ kojtobʼanik rech kʼo utzilal pa ri congregación (Sal. 101:3). Xuqujeʼ kojkunik keqatoʼ ri qachalal rech kkiya ta kan upatanexik ri Jehová. Chqachomajampeʼ, ¿jas kqabʼano we kqato che jun qachalal xubʼan jun nimalaj mak? Rumal che kqaloqʼoqʼej ri qachalal che xmakunik, kqabʼij riʼ che che kchʼaw kukʼ ri kʼamal taq bʼe. Y we kraj taj, rajawaxik che oj kojbʼin chke ri kʼamal taq bʼe ri xkʼulmatajik. Rumal che kqaj ktoʼ ri qachalal (Sant. 5:14, 15).

¹⁵ Bʼisobʼal che jujun chke ri qachalal kemakunik y rumal laʼ rajawaxik keʼesax bʼi pa ri congregación. We kkʼulmataj wariʼ, keqachilaj ta chik (1 Cor. 5:9-13).d We kojnimanik kojtobʼanik rech kʼo ta itzelal pa ri congregación. Y we keqachilaj ta chi ri kesax bʼi pa ri congregación tajin kqakʼutu che keqaloqʼoqʼej. Rukʼ wariʼ keqatoʼo rech kkikʼex ri kikʼaslemal. We kkikʼex ri kikʼaslemal, sibʼalaj kojkikotik, junam rukʼ ri Jehová y ri ángeles (Luc. 15:7).

16. ¿Jas kabʼano rech kawesaj kiwach ri ángeles?

¹⁶ Sibʼalaj kojkikotik rumal che ri Jehová uyaʼom bʼe che kqetaʼmaj chkij ri ángeles y kojkunik kojtobʼan kukʼ pa ri chak che uyaʼom chke. Chqakojoʼ qachuqʼabʼ che resaxik uwach ri kimachʼachʼem, ri kiloqʼoqʼebʼal chke ri winaq, ri kibʼanom che uchʼijik ri kʼax y ri kkibʼano rech kʼo ta itzelal pa ri congregación. We kqabʼan qe ri kkibʼan ri ángeles, amaqʼel kojkʼojiʼ riʼ pa ri u familia ri Jehová.