Achijabʼ che kʼo ansiedad chke | Ri Biblia kkunik keʼutoʼo

Are chiʼ katchoman chrij ri ansiedad,a ¿jas kpe pa ajolom? Weneʼ kachomaj che are jun winaq che sibʼalaj kuxibʼij ribʼ, kraj taj kwalijik o ronojel taq qʼij más kchʼaw chrij ri kukʼulmaj.

Jujun winaq kkikʼulmaj wariʼ are chiʼ kkiriq ansiedad. Are kʼu ri winaq che kʼo nim ketaʼmabʼal kkibʼij che nikʼaj chik jalan kkibʼan chuwach ri kʼax, más na ri achijabʼ. Jun kʼutunem, kubʼij che ri achijabʼ jalan kkibʼan chuwach wariʼ «jujun keqʼabʼarik, kkitij kunabʼal o drogas rech kkinaʼ ta ri ansiedad. Rumal laʼ ri winaq che kqʼabʼarik, weneʼ xa kukʼutu che tajin kqʼax chupam ri ansiedad. Y kʼi taq mul ri achijabʼ kkikʼutu che kʼo ansiedad chke rumal che e kʼan y aninaq kpe koyowal».

Konojel ta ri achijabʼ kkibʼan wariʼ. Are kʼu, kimik ri ansiedad sibʼalaj kubʼan kʼax chke ri winaq rumal che «pa ri kʼisbʼal taq qʼijol, kepe na kʼaxalaj taq qʼij» (2 Timoteo 3:1). We kʼo ansiedad chawe, ¿la kkun ri Biblia che atoʼik?

Textos re ri Biblia che katutoʼ chuwach ri ansiedad

Ri Biblia kʼo kʼi pixabʼ chupam che kojutoʼ chuwach ri ansiedad. Chqilampeʼ oxibʼ chke:

1. 1. «Mixok il che ri qʼij re chweʼq; ri qʼij kʼut re chweʼq kukʼam na uloq ri rokem il. Ri retzelal ri jun qʼij chubʼanaʼ waʼ che» (Mateo 6:34).

   Ri kaj kubʼij: Are utz che kojchoman ta más chrij ri kqakʼulmaj na pa ri petinaq. Kʼi taq mul ri kqachomaj che kkʼulmataj na kkʼulmataj taj. Y weneʼ jujun taq mul kqachomaj che kqariq kʼax are kʼu xa utzilal kqariqo.

   Chabʼanaʼ wariʼ: Chatchoman chrij ojer kanoq are chiʼ xachomaj che kakʼulmaj jun kʼax are kʼu xakʼulmaj taj. Tekʼuriʼ chatchoman chrij ri tajin kakʼulmaj kimik. Y chachomaj wariʼ: «¿La qas kinkʼulmaj na ri tajin kinchomaj?».

2. 2. «Ri kuchilo kajux rukʼ chʼichʼ are kʼu ri winaq rukʼ jun winaq chik» (Proverbios 27:17).

   Ri kraj kubʼij: Ri winaq che e kʼo qukʼ kekunik kojkitoʼ chuwach ri ansiedad..., we kqakʼam ri kitobʼanik. Weneʼ kkibʼij ri kikʼulmam y ri e toʼwinaq chuwach ri ansiedad. Wariʼ kubʼano che kojchoman ta más chrij ri kqakʼulmaj na.

   Chabʼanaʼ wariʼ: Chatchoman chrij jun awachiʼl che kkunik katutoʼo che xuriq ri tajin kakʼulmaj, tekʼuriʼ chataʼ che jas xtoʼw chuwach ri ansiedad.

3. 3. «Ronojel ri kixok wi il, chiyaʼ pa uqʼabʼ ri Dios. Ri areʼ kʼut kixuchajij» (1 Pedro 5:7).

   Ri kraj kubʼij: Ri Dios sibʼalaj kutoqʼobʼisaj kiwach ri e kʼo pa kʼax. Ri areʼ kraj che kqabʼij che ronojel ri kqanaʼo y ri kqakʼulmaj.

   Chabʼanaʼ wariʼ: Chatzʼibʼaj ronojel ri tajin kakʼulmaj. Tekʼuriʼ are chiʼ kabʼan achʼawem che ri Dios chabʼij che ronojel ri kanaʼo y chataʼ ri utobʼanik.

Are chiʼ kʼo ta chi ansiedad

Ri Biblia xaq xiw ta kuya utz taq pixabʼ chuwach ri ansiedad, xaneʼ xuqujeʼ kubʼij che xa jubʼiqʼ chik kraj che ksachisax uwach ri kʼax che tajin kqariqo.

Ri uQʼatbʼal tzij ri Dios kusachisaj na ronojel ri kʼax che kuya ansiedad chqe (Apocalipsis 21:4). Are chiʼ tajin chi kuqʼat tzij ri uQʼatbʼal tzij ri Dios puwiʼ ri uwach Ulew knaʼtaj ta chi riʼ ri kʼax chqe che kuya ri ansiedad (Isaías 65:17).

Are waʼ ri kʼaslemal che kraj «ri Dios aj jamaril» chawe (Romanos 16:20). Chawilaʼ ri kubʼij chqe: «In e wetaʼm ri chomanik ri e kʼo wukʼ chiwe, chomanik che ubʼanik utzil chiwe man che ta etzelal, che uyaʼik jun eyebʼal kʼuxaj ri kpe na» (Jeremías 29:11).