¿Jas kqabʼan chuwach ri nimalaj yabʼil?

¿La más katbʼison rumal ri COVID-19? We je kanaʼo, katbʼison taj rumal che xaq ta atukel at kʼolik. Konojel ri winaq kʼi chi ikʼ kikojom kichuqʼabʼ chuwach wajun yabʼil riʼ. Ri doctor Hans Kluge, director re ri Organización Mundial de la Salud re Europa, xubʼij «kʼi kikojom kichuqʼabʼ chuwach ri COVID-19». Xuqujeʼ xubʼij: «Weneʼ kojkosik kqaj ta chik kqabʼan ri jastaq che xqabʼan nabʼe o kpe qoyowal».

We tajin katkos rumal ri nimalaj yabʼil, makʼistaj akʼuʼx. Ri Biblia kkunik katutoʼo junam che ubʼanom che kitoʼik ri nikʼaj chi winaq chuwach ri kosik y ri estres che kuya ri COVID-19.

¿Jas riʼ ri kosik chuwach ri nimalaj yabʼil?

Ri kosik chuwach ri pandemia are ta jun yabʼil. Xaneʼ are ri kunaʼ jun winaq rumal che kkʼis ta ri nimalaj yabʼil y retaʼm ta ri kkʼulmataj pa ri petinaq. Konojel ri winaq jalan kkibʼan che rilik ri yabʼil, jujun chke kkinaʼ wariʼ:

Kkaj ta chik kechakunik
Más kewaʼ chik o kraj ta chi kiwa y kok ta chi kiwaram
Aninaq kpe koyowal
Kʼax kkibʼan che ubʼanik ri chak che nabʼe utz kkinaʼ ubʼanik
Are ta chi kkichomaj ri rajawaxik chke
Kʼo ta chi keyebʼal

¿Jasche utz taj we kojkos chuwach ri yabʼil?

Ri kosik chuwach ri nimalaj yabʼil kubʼan kʼax chqe y chke ri nikʼaj chik. We kqachajij ta qibʼ, weneʼ kqanimaj ta chi ri taqanik che kiyaʼom ri qʼatal taq tzij rech kqachajij qibʼ chuwach ri COVID-19. Paneʼ kʼa kʼo na ri yabʼil y tajin keʼukamisaj e kʼi winaq, weneʼ kqanimaj ta chi ri taqanik y kojchoman ta chi más chrij. Weneʼ kojkos che unimaxik ri taqanik che yaʼom chqe chrij ri COVID-19, are kʼu we kqanimaj taj kqaya ri qakʼaslemal pa kʼax y ri ke ri nikʼaj chik.

Pa wa kʼaxalaj taq qʼij riʼ e kʼi kilom ri kubʼij ri Biblia: «We kkebʼlaj akʼuʼx are taq at kʼo pa taq latzʼ man e kʼi taj ri achuqʼabʼ e kʼolik» (Proverbios 24:10). Are kʼu pa ri Biblia kʼo textos che kojkitoʼ chuwach ri kʼax che tajin kqariq rumal ri COVID-19.

¿Jas textos re ri Biblia katutoʼ chuwach ri nimalaj yabʼil?

Chanimaj ri taqanik che katqebʼ ta más kukʼ ri winaq, are kʼu kaya ta kan kachilaxik

Ri kubʼij ri Biblia: «Jun achiʼl amaqʼel kel ukʼuʼx, pa taq kʼu ri qʼijol re riqoj kʼax jachaʼ jun achalalaxik» (Proverbios 17:17).

¿Jasche nim ubʼanik?: Ri utz taq achiʼl kojkitoʼo are chiʼ kojbʼisonik (1 Tesalonicenses 5:11). Are kʼu we xaq qatukel oj kʼolik kuya yabʼil chqe (Proverbios 18:1).

Chabʼanaʼ wariʼ: Chatchʼaw kukʼ ri awachiʼl pa teléfono, pa videollamada, pa correo o pa mensajes. We katbʼisonik, cheʼachʼabʼej. Xuqujeʼ amaqʼel chataʼ chke we utz kiwach y jas e bʼenaq. Chixchʼaw chrij ri ix utoʼm chuwach ri pandemia. Chayaʼ tobʼanik che jun utz awachiʼl, we je kabʼano ix kebʼ riʼ kinaʼ kikotemal.

Utz che kabʼan wariʼ

«Kinbʼij chke ri wachiʼl che kqabʼan videollamadas. Jujun taq mul xa oj kebʼ, y nikʼaj chik oj kʼi rech kojetzʼanik o xaq kojtzijonik. Paneʼ xaq pa videollamada kojtzijon wi, are kʼu kojutoʼo. Ri pandemia uyaʼom kʼax chqe qonojel, rumal laʼ nim ubʼanik che kqaya ta kan tzijonem kukʼ ri utz taq qachiʼl y chqabʼij chke ri kqanaʼo. Paneʼ kʼax ubʼanik are kʼu nim kojutoʼ wi» (Megan, che kel pa Canadá).

«Kojbʼisonik rumal che kojkun ta chik kojkʼojiʼ kukʼ ri qafamilia y ri e qachiʼl, are kʼu qayaʼom ta ukʼutik chke che keqaloqʼoqʼej. Ri oj kajibʼ kqamulij qibʼ kqabʼan tarjetas, kqachomaj jas ri kqasipaj chke ri e qachiʼl. Kqatzʼibʼaj jujun textos re ri Biblia chke rech kuya kichuqʼabʼ jeriʼ kqakʼutu che sibʼalaj keqaloqʼoqʼej. Rumal che kqakoj qatiempo che kitoʼik ri nikʼaj chik wariʼ kuya kikotemal chqe y kubʼano che kojchoman ta chi más chrij ri kʼax che tajin kqakʼulmaj» (Emma y ri rachajil, Nathan, kukʼ ri kalkʼwal, Eli y Hope, che keʼel pa Estados Unidos).

Chkʼol jun utz achomanik chrij ri tajin kkʼulmatajik y utz chabʼanaʼ che ukojik ri tiempo

Ri kubʼij ri Biblia: Qas «chiwechbʼej taq ri qʼij che ubʼanik ri utz» (Efesios 5:16).

¿Jasche nim ubʼanik?: Rumal che we utz kabʼan che ukojik ri tiempo katutoʼo rech kkʼojiʼ jun utz achomanik y katchoman ta más chrij ri kʼax che tajin kkʼulmatajik (Lucas 12:25).

Chabʼanaʼ wariʼ: Are ta katchoman chrij ri katkun ta che ubʼanik, xaneʼ are chatchoman chrij ri katkun che ubʼanik. Jun kʼutbʼal, weneʼ más kʼo chi atiempo rech kabʼan jun jastaq che utz kawilo o jun chik che kawaj kabʼano. O weneʼ kʼo chi más atiempo rech katkʼojiʼ rukʼ ri afamilia.

Utz che kabʼan wariʼ

«Kʼo kʼi jastaq qabʼanom pa qachoch: qatikom verduras, ichaj, kqabʼan manualidades y kqasukʼumaj ri qachoch» (Evan y ri rixoqil, Samantha, kukʼ ri kalkʼwal, Eli y Adam, che keʼel pa Sudáfrica).

«Pa ri 30 junabʼ che oj kʼulanik, kʼo ta jumul qaqʼaxem más tiempo junam rukʼ kimik. Rumal wariʼ, más qetaʼm chi ri utz taq qabʼantajik xuqujeʼ ri rajawaxik kqasukʼumaj y más kqaloqʼoqʼej chi qibʼ. Wariʼ kojutoʼo rech kqatoʼlaʼ qibʼ chuwach ri kʼax che kqariq na» (Ivan y ri rixoqil, Eve, che keʼel pa Italia).

Chayaʼ pa cholajil ri kawaj kabʼano

Ri kubʼij ri Biblia: «Chbʼan kʼu ronojel rukʼ kolomal xuqujeʼ rukʼ cholajil» (1 Corintios 14:40).

¿Jasche nim ubʼanik?: E kʼi winaq más ta kʼax kkinaʼ ubʼanik ri jastaq we kkiya pa cholajil y kuya kikotemal chke.

Chabʼanaʼ wariʼ: Chabʼanaʼ jun horario rukʼ ri katkunik kabʼan kimik. Chakojoʼ jun hora che ubʼanik ri chak, ri tareas re ri escuela y nikʼaj chi chak che kabʼan pa ri awachoch. Y chakojoʼ tiempo che ukowirisaxik ri akojonik. Xuqujeʼ chakojoʼ tiempo rech katkʼojiʼ kukʼ ri afamilia, katbʼe pa bʼinem y kabʼan ejercicio. Amaqʼel chawilaʼ ri horario y we rajawaxik kuya kakʼexo.

Utz che kabʼan wariʼ

«Nukojom nuchuqʼabʼ rech kinbʼan na ri jastaq che kinbʼan nabʼe kanoq are chiʼ majaʼ ri pandemia. Weneʼ ojer kinbʼan nikʼaj chi jastaq are kʼu kimik kinkun taj kinbʼano, kinkoj ri hora riʼ rech kinbʼan ejercicio, are kʼu nukʼexom ta ri hora che kinwaʼlijik. Wariʼ inutoʼm rech kinchoman ta más chrij ri nimalaj yabʼil y che kinkʼojiʼ kukʼ ri nufamilia y ri e wachiʼl» (Kgaogelo, che kel pa Sudáfrica).

«Utz kinnaʼo che kinwaʼlij aqʼabʼil, kinbʼan ri nurikil, ri nucafé junam rukʼ ri kinbʼan nabʼe kanoq. Tekʼuriʼ kinsukʼumaj wibʼ jetaneʼ che kinel bʼik. Wariʼ uyaʼom kikotemal chwe xuqujeʼ inutoʼom rech kwaj kinbʼan ri rajawaxik pa wachoch» (Carmel, che kel pa Francia).

Chatkikotoq paneʼ kʼo qʼij o jabʼ

Ri kubʼij ri Biblia: «Ri utz kchomanik kril ri sayowem kel kʼu chuwach» (Proverbios 22:3).

¿Jasche nim ubʼanik?: Ri qʼij y ri kaqiqʼ katutoʼo rech kariq ta yabʼil y rech kanaʼ utzilal. Weneʼ rumal ri kʼo wi ri awachoch katkun ta más katkʼojiʼ chuwach ri qʼij o katel bʼi che bʼinem.

Chabʼanaʼ wariʼ: We naqaj chi kʼo wi ri qʼalaj, chasukʼumaj ri awachoch y ri katchakun wi rech utz kabʼan che ukojik ri qʼij. Katkunik katel bʼi pa awachoch rech kabʼan jujun jastaq paneʼ kʼo tew. Kuya katzukuj awatzʼyaq re tew rech katkunik katel b’ik.

We naqaj chi kʼo wi ri saqʼij, ri winaq más keʼel bʼi pa ri kachoch; rumal laʼ chachajij awibʼ. Chachomaj na jawiʼ kawaj katbʼe wi y jat pa ri hora che e kʼo ta más winaq.

Utz che kabʼan wariʼ

«Jawiʼ in kʼo wi sibʼalaj kubʼan jabʼ, rumal laʼ qas kinchomaj na ri kinbʼan pa jun qʼij. We kinwilo che kʼo qʼij, kinkoj ri tiempo riʼ rech kinel bʼi pa wachoch. Paneʼ xa jubʼiqʼ tiempo kinel bʼi cho ri qʼij chrij bicicleta o kenebʼinoq, wariʼ kuya kikotemal chwe» (Sameena, che kel pa Francia).

«Aninaq xqʼax ri saqʼij, rumal che kʼo jastaq che kinbʼano. Are kʼu, rumal che naqaj chi kʼo wi ri qʼalaj, kʼo kʼi chi jastaq che kwaj kinbʼan pa wachoch» (Tiffany, che kel pa Canadá).

Kaya ta kan unimaxik ri taqanik che kyaʼ chrij ri COVID-19

Ri kubʼij ri Biblia: «Ri man kʼo ta unoʼj bʼanal nimal xuqujeʼ jikil ukʼuʼx» (Proverbios 14:16).

¿Jasche nim ubʼanik?: Ri yabʼil COVID-19 sibʼalaj kubʼan kʼax chqe y weneʼ kqariqo we man kqachajij chi qibʼ.

Chabʼanaʼ wariʼ: Chatchoman chrij ri taqanik che kiyaʼom ri qʼatbʼal tzij pa ri lugar che at kʼo wi y chatchoman chrij we kʼa tajin kanimaj na. Ri kachaʼ ubʼanik weneʼ kubʼan kʼax chawe, che ri a familia y nikʼaj chik.

Utz che kabʼan wariʼ

«Kinkoj nuchuqʼabʼ rech knimar ta wajun yabʼil riʼ. Paneʼ nikʼaj chi winaq keniman ta che ri taqanik che kyaʼik, are kʼu in kinkoj nuchuqʼabʼ rech kinchajij wibʼ y kinchajij ri nufamilia» (Daryn, che kel pa Sudáfrica).

Chatqebʼ rukʼ ri Dios

Ri kubʼij ri Biblia: «Chixqebʼ rukʼ ri Dios, ri areʼ xuqujeʼ kqebʼ na iwukʼ» (Santiago 4:8).

¿Jasche nim ubʼanik?: Ri Dios katutoʼo rech kachʼij apachike kʼax (Isaías 41:13).

Chabʼanaʼ wariʼ: Chasikʼij ri Biblia, ronojel taq qʼij. Utz we kakoj ri programa usikʼixik uwach ri Biblia.

¿La awetaʼm at che ri testigos rech Jehová kiyaʼom ta kimulixik kibʼ paneʼ kʼo ri pandemia? Pa ronojel ri uwach Ulew kkibʼan ri kiriqbʼal ibʼ re ronojel taq semanas pa videoconferencia, ri nim riqbʼal ibʼ y ri Unaʼtabʼalil ri ukamikal ri Jesús. We kawaj katkʼojiʼ pa ri e riqbʼal ibʼ riʼ, chattzijon kukʼ ri testigos rech Jehová.

Textos re ri Biblia che kojutoʼ chuwach ri nimalaj yabʼil

Isaías 30:15: «Pa ri jororemal, pa ri jikibʼan kʼuxaj kʼo wi ri ichuqʼabʼ».

Ri kraj kubʼij: Ukubʼsaxik qakʼuʼx chrij ri kubʼij ri Dios kojutoʼ chuwach ri kʼax.

Proverbios 15:15, Ri Tyoxlaj Wuj: «Chuwach ri mebʼaʼ winaq, ronojel taq qʼij man utz ta chuwach ri areʼ, kʼateʼ kʼut, chuwach ri winaq che kkikot ranimaʼ, junalikalaj nimaqʼij chuwach ri areʼ».

Ri kraj kubʼij: Are chiʼ kʼo jun utz qachomanik wariʼ kojutoʼo rech kojkikotik paneʼ kqakʼulmaj jujun taq kʼax.

Proverbios 14:15: «Ri kon kukoj ronojel ri kbʼix che; ri utz kchomanik kril na jawijeʼ ri kbʼin wi».

Ri kraj kubʼij: Are utz che kqanimaj ri taqanik che kyaʼ chqe chrij ri pandemia rech kojyawaj taj y kqachomaj taj che kʼo ta upatan chqe.

Isaías 33:24: «Man kʼo ta jun aj tinamit kubʼij ta na: ‹In yawabʼ›».

Ri kraj kubʼij: Ri Dios kubʼij che kusachisaj na uwach ronojel ri yabʼil che kubʼan kʼax chqe.