Chqatoʼ uwiʼ ri Jesucristo, ri kʼamal qabʼe

1. ¿Jas kraj ri Dios che kbʼan kimik?

RI KRAJ ri Dios kimik are che ktzijox pa ronojel ri uwach Ulew ri utzalaj taq jastaq che kubʼan na ri uQʼatbʼal tzij (Mar. 13:10; 1 Tim. 2:3, 4). Rech ri Jehová wajun chak, y nim ubʼanik che ri areʼ are xuchaʼ ri uKʼojol rech kukʼam qabʼe. Rumal che pa uqʼabʼ ri Jesús kʼo wi ri kbʼan che utzijoxik ri utzij ri Dios, qas qetaʼm che are chiʼ kpe ri kʼisbʼal, sibʼalaj kkikot riʼ ri Jehová rukʼ ronojel ri chak bʼanom (Mat. 24:14).

2. ¿Jas kqil na pa wajun kʼutunem?

² Pa wajun kʼutunem, kqil na che ri Jesús tajin kukoj «ri jikalaj pataninel, utz uchomanik» rech kuya ri rajawaxik chqe pa ri qakojonik y kukʼam qabʼe che utzijoxik ri utzij ri Dios (Mat. 24:45). Xuqujeʼ kqil na ri kojkunik kqabʼano rech chqajujunal kqaya ri qatobʼanik che ri Jesús y ri jikalaj pataninel.

RI JESÚS TAJIN KRIL RI KBʼAN CHE UTZIJOXIK RI UTZIJ RI DIOS

3. ¿Jas taqanik xyaʼ pa uqʼabʼ ri Jesús?

³ Ri Jesús tajin kril ri kbʼan che utzijoxik ri utzij ri Dios. ¿Jasche qetaʼm? Are chiʼ xa jubʼiqʼ chi kraj kpaqiʼ pa ri kaj, xeʼumulij ri utijoxelabʼ pa jun juyubʼ re Galilea y xubʼij chke: «Ronojel taqanik pa ri kaj, ronojel taqanik cho ri uwach ulew yoʼm pa nuqʼabʼ». Y chojchoman chi chrij ri xubʼij kanoq: «Rumal kʼu riʼ, jix, chibʼanaʼ tijoxelabʼ chke ri winaq pa konojel ri tinamit cho ri uwach ulew» (Mat. 28:18, 19). Wariʼ kukʼutu che are ri Jesús kkʼamow ubʼe ri kbʼan che utzijoxik ri utzij ri Dios.

4. ¿Jasche qas qetaʼm che are ri Jesús kilow ri kbʼan che utzijoxik ri utzij ri Dios?

⁴ Ri Jesús xubʼij ri kbʼan che utzijoxik ri utzij ri Dios, ri kbʼan che kitijoxik ri winaq are jun chak che kbʼan pa «konojel ri tinamit», y che areʼ kkʼojiʼ kukʼ ri utijoxelabʼ «ronojel qʼij kʼa pa ri ukʼistajik ri uwach ulew» (Mat. 28:20). Waʼ taq tzij qas kuqʼalajisaj che ri Jesús are kilow ri kbʼan che utzijoxik ri utzij ri Dios pa taq ri qaqʼij.

5. ¿Jas kqabʼano rech kojtobʼan che utzʼaqatisaxik ri kubʼij pa Salmo 110:3?

⁵ Ri Jesús qas xretaʼmaj che pa ri kʼisbʼal taq qʼij e kʼi ri kkiya ri kitobʼanik. Retaʼm che ketzʼaqat waʼ taq tzij riʼ: «Ri tinamit la kjach na pa qʼabʼ la chupam ri qʼij re ri chʼakanik la» (Sal. 110:3). We tajin katzijoj ri utzalaj taq jastaq che kubʼan na ri uQʼatbʼal tzij ri Dios, tajin kaya atobʼanik che ri Jesús y ri jikalaj pataninel, y tajin kattobʼanik rech ktzʼaqat wajun profecía. Qastzij che tajin ktzijox ri utzij ri Dios, are kʼu kʼo jujun taq kʼax che kojkiqʼatej.

6. Chabʼij jun chke ri e kʼax che kqariqo.

⁶ Jun kʼax che kqariqo are ri kʼax che kkibʼan ri winaq chqe. Ri apóstatas, ri e qʼatal taq tzij y ri e kʼamal taq bʼe re taq ri kojonem kkibʼan molom taq tzij chrij ri chak che tajin kqabʼano. We ri e qachalaxik, ri e winaq che qetaʼm kiwach y ri e qachiʼl pa ri chak kkikoj ri kbʼixik, weneʼ kkaj che kqaya kan upatanexik ri Jehová y kqatzijoj ta chi ri utzij. Pa jujun nimaʼq taq tinamit, ri e qakʼulel kojkixibʼij, kkibʼan kʼax chqe, kojkichap bʼik y kojkitzʼapij pa cárcel. Are kʼu kqamay ta wariʼ, rumal che ri Jesús xubʼij kanoq: «Ketzelax na iwach kumal konojel ri winaq rumal rech ri nubʼiʼ» (Mat. 24:9). Rumal laʼ, ri kkibʼan che retzelaxik qawach kukʼutu che tajin kqabʼan ri xubʼan ri Jesús y che kojqaj chuwach ri Jehová (Mat. 5:11, 12). Are ri Itzel ri ajmak che ronojel ri kʼax che kbʼan chqe kumal ri winaq, are kʼu, kʼo ta uchuqʼabʼ chuwach ri Jesús. Rukʼ ri utobʼanik ri Cristo, ri winaq re ronojel ri uwach Ulew tajin kketaʼmaj ri jastaq che kubʼan na ri uQʼatbʼal tzij ri Dios.

7. ¿Jas kkʼutuw chawach che ri kubʼij Apocalipsis 14:6, 7 qas tajin kbʼantajik?

⁷ Jun chi kʼax kʼo chqawach are che ri winaq kechʼaw pa jalajoj chʼabʼal. Are kʼu pa ri visión che xukʼut ri Jesús chuwach ri apóstol Juan, xuqʼalajisaj che paneʼ kʼo kʼi chʼabʼal pa ri uwach Ulew konojel ri winaq kketaʼmaj ri utz taq jastaq che kyaʼ ubʼixik (chasikʼij uwach Apocalipsis 14:6, 7). ¿Jas qabʼanom rech konojel ri winaq re kʼi chʼabʼal kketaʼmaj ri utz taq tzij? Qayaʼom ri e qawuj che kchʼaw chrij ri Biblia pa jw.org, pa más che 1,000 chʼabʼal. Xuqujeʼ, ri Jupuq Ajkʼamal bʼe cho ronojel uwach Ulew xuya bʼe che xqʼaxex pa más che 700 chʼabʼal ri wuj che qas tajin kqakoj kimik che uyaʼik etaʼmanik re ri Biblia, ri wuj ¡Jun kʼaslemal che kʼo ta ukʼisik! Xuqujeʼ e kʼo videos chke ri winaq che kkita taj y wuj pa braille chke ri winaq che kekaʼy taj. Rukʼ wariʼ, sibʼalaj e kʼi winaq kekunik kketaʼmaj chrij ri utz taq jastaq kubʼan na ri uQʼatbʼal tzij ri Dios. Qas tajin kqilo che tajin kebʼantaj ri xetzʼibʼax kan pa ri Biblia ojer: e winaq «kech juleʼ nimaʼq taq tinamit chik» tajin kketaʼmaj ri qastzij chrij ri Dios (Zac. 8:23; Sof. 3:9). Ronojel wariʼ qastzij tajin kbʼantajik rumal che ri Jesús utz kubʼan che rilik ri chak che tajin kqabʼano.

8. ¿Jas utz taq jastaq riqom rumal ri utzijoxik ri utzij ri Dios?

⁸ Kimik, más che 8 millones winaq re 240 tinamit y territorios e kʼo pa ri utinamit ri Jehová. ¡Y ronojel junabʼ e miles kkibʼan kiqasanjaʼ! Are kʼu ri kikʼiyal ri kkibʼan kiqasanjaʼ are ta ri más nim ubʼanik, xaneʼ are ri utz taq bʼantajik che tajin kkikʼutu, che ri Biblia kubʼij «ri kʼakʼ [...]kʼaslemal» che (Col. 3:8-10). E kʼi chke kemakun ta chi kukʼ achijabʼ ixoqibʼ, kechʼojin taj y kekamisan ta chik, keyoqʼon ta chke e nikʼaj chi winaq rumal ri kitinamit, ri kibʼantajik o jun chi jastaq y kebʼe ta pa taq chʼoj re ri kitinamit. Tajin kbʼantaj ri xtzʼibʼax kan pa Isaías 2:4: «Mawi k[e]tijox ta chi che ubʼanik chʼoj». Rumal che kqakoj qachuqʼabʼ rech kqakʼut ri kʼakʼ kʼaslemal, keqatoʼ ri winaq rech keʼok pa ri utinamit ri Dios y kqakʼutu che are ri Jesús tajin kkʼamow qabʼe (Juan 13:35; 1 Ped. 2:12). Y kʼo ta jun jastaq che xaq utukel kkʼulmatajik, xaneʼ are ri Jesús tajin kojtoʼwik.

RI JESÚS XUKOJ JUN PATANINEL

9. Junam rukʼ ri kubʼij Mateo 24:45-47, ¿jas xubʼij kan ri Jesús che kkʼulmataj na pa ri kʼisbʼal taq qʼij?

⁹ (Chasikʼij uwach Mateo 24:45-47). Ri Jesús xubʼij kanoq che pa ri kʼisbʼal taq qʼij kukoj jun «jikalaj pataninel, utz uchomanik» rech kuya ri rajawaxik pa ri qakojonik. Ri rajawaxik kubʼan wajun pataninel pa ri kʼisbʼal taq qʼij are che sibʼalaj kchakunik. Y je tajin kubʼano. Ri Jesús tajin kukoj jun alaj jupuq cristianos che kebʼe pa ri kaj rech kkiya «ri tzuqbʼal kech pa ri kiqʼijol» chke ri upatanelabʼ ri Dios y chke ri winaq che kkaj keqebʼ rukʼ. Wajun jupuq cristianos riʼ kkichomaj taj che ketaqan pa kiwiʼ ri nikʼaj chik (2 Cor. 1:24). Xaneʼ kkichʼobʼo che are ri Jesucristo ri «kʼamal bʼe xuqujeʼ che yaʼl kinoʼj taq ri tinamit» (Is. 55:4).

10. Junam rukʼ ri kqil pa ri wachbʼal, ¿jas wuj xakojo rech xamaj retaʼmaxik chrij ri Jehová?

¹⁰ Xumajij lo pa ri junabʼ 1919, ri jikalaj pataninel ubʼanom jalajoj kiwach wuj rech ri e winaq kekunik kkinimarisaj más ri kikojonik rukʼ ri e wuj riʼ. Pa ri junabʼ 1921, ri jikalaj pataninel xresaj lo pa ri chʼabʼal inglés jun wuj ubʼiʼ: El Arpa de Dios che kukʼut jastaq che sibʼalaj nim ubʼanik che kʼo pa ri Biblia. Rumal che kkʼextaj ri tiempo, amaqʼel kekʼex ri e wuj y keʼesax chi lo nikʼaj. ¿Jas wuj xakoj at rech xawetaʼmaj y xamaj uloqʼoqʼexik ri qaTat che kʼo pa kaj? Weneʼ are jun chke ri e wuj riʼ: «Sea Dios veraz», La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Jas qas kukʼut ri Biblia? o ¿Jas kukʼut ri Biblia chqawach? O weneʼ are tajin kakoj chi ri kʼakʼ wuj ¡Jun kʼaslemal che kʼo ta ukʼisik! Ri e wuj riʼ xeʼesax loq rech ri winaq keʼux tijoxelabʼ, y e yaʼom pa ri tiempo che qas kajwatajik.

11. ¿Jasche sibʼalaj nim ubʼanik che qonojel kyaʼ ri kajwataj chqe pa ri qakojonik?

¹¹ Xaq xiw ta ri e tijoxelabʼ re ri Biblia kajwataj e wuj chke pa ri kikojonik. Xaneʼ qonojel kajwataj chqe. Rumal laʼ ri apóstol Pablo xubʼij: «Ri wa riʼ are kech ri tzʼaqatinaq chik kijunabʼ». Xuqujeʼ xubʼij che we kqakoj pa ri qakʼaslemal ri e pixabʼ kojutoʼo rech kqachʼobʼo «jas ri utz xuqujeʼ jas ri man utz taj» (Heb. 5:14). Rumal che ri winaq kimik riʼ nim ta chi kkil ri utaqanik ri Dios y wariʼ kubʼano che oj kʼax kqabʼan che unimaxik xuqujeʼ. Are kʼu ri Jesús uyaʼom jalajoj uwach taq wuj chqe che esam pa ri Biblia che kojutoʼ rech kqakowirisaj más ri qakojonik. Rumal ri utobʼanik ri Jesús, ri jikalaj pataninel kunaq che ubʼanik y che uyaʼik ri kajwataj chqe pa ri qakojonik.

12. Junam rukʼ ri xubʼan ri Jesús, ¿jas qabʼanom che uyaʼik uqʼij ri ubʼiʼ ri Dios?

¹² Junam rukʼ ri xubʼan ri Jesús, ri oj qayaʼom uqʼij ri ubʼiʼ ri Dios (Juan 17:6, 26). Jun kʼutbʼal, pa ri junabʼ 1931 xkoj ri bʼiʼaj testigos rech Jehová chqe. Rukʼ wariʼ kqakʼutu che kqaj kqukʼaj ri ubʼiʼ ri qaTat che kʼo pa ri kaj, rumal che sibʼalaj nim ubʼanik chqawach (Is. 43:10-12). Y, pa ri ikʼ octubre re ri junabʼ riʼ, xmajix ukojik ri ubʼiʼ ri Dios chuwach ri wuj La Atalaya pa inglés. Xuqujeʼ pa ri Biblia, Traducción del Nuevo Mundo kojom ri ubʼiʼ ri Dios pa ri lugar che rajawaxik kbʼe wi. Rukʼ wariʼ qas kqʼalajinik che oj junam ta kukʼ ri e nikʼaj chi Iglesias rumal che are kkesaj ri ubʼiʼ ri Dios pa taq ri kitraducciones rech ri Biblia.

RI JESÚS UKʼAMOM KIBʼE RI UTIJOXELABʼ

13. Junam rukʼ ri kubʼij Juan 6:68, ¿jasche qas awetaʼm che ri Jesús tajin kukoj «ri jikalaj pataninel, utz uchomanik» kimik?

¹³ Rumal «ri jikalaj pataninel, utz uchomanik», ri Jesús uyaʼom chke ri utijoxelabʼ ri kajwataj chke rech utz kkibʼan che uqʼijilaxik ri Dios cho ri uwach Ulew. ¿Jas kachomaj at chrij ri utinamit ri Dios? Weneʼ kanaʼo junam rukʼ ri xunaʼ ri Pedro, che xubʼij che ri Jesús: «Qajaw, ¿jachin taneʼ rukʼ kujbʼe wi? Ukʼ la kʼo wi ri tzij re junalik kʼaslemal» (Juan 6:68). ¿Jas ta qakʼulmam riʼ wet mat xqachʼobʼ uwach ri utinamit ri Jehová? Rumal ri utinamit ri Jehová, ri Jesús rilom ri qas kajwataj chqe pa ri qakojonik y kojutijoj rech kojux utzalaj taq ajtijabʼ. Xuqujeʼ, kojutoʼ rech kqakoj «ri kʼakʼ kʼaslemal» rech kkikot ri Jehová qukʼ (Efes. 4:24).

14. Rumal che at kʼo pa ri utinamit ri Jehová, ¿jas atutoʼm wi pa ri tiempo re ri nimalaj yabʼil COVID-19?

¹⁴ Are chiʼ kqariq kʼax, ri Jesús rukʼ nojibʼal kukʼam qabʼe. Qas xilitaj wariʼ are chiʼ xumaj ri nimalaj yabʼil COVID-19. E kʼi winaq cho ronojel ri uwach Ulew ketaʼm taj jas kkibʼano are chiʼ xumajij wajun yabʼil, are kʼu ri Jesús qas xrilo che ri upatanelabʼ kkichajij kibʼ chuwach wajun yabʼil. Xbʼix chqe che rajawaxik kqakoj mascarillas y che naj qaxoʼl rukʼ jun winaq. Xuqujeʼ xnaʼtasax chke ri kʼamal taq bʼe che rajawaxik amaqʼel kekichʼabʼej apan ri publicadores y che keʼok il che ri kajwataj chke pa ri kikʼaslemal y pa ri kikojonik (Is. 32:1, 2). Y pa ri informes re ri Jupuq Ajkʼamal bʼe cho ronojel uwach Ulew xkiya pixabʼ chqe xuqujeʼ kubʼsal kʼuʼx.

15. ¿Jas nikʼaj chi pixabʼ xyaʼ chqe are chiʼ xumaj ri nimalaj yabʼil, y jas utzilal uyaʼom chqe?

¹⁵ Pa ri nimalaj yabʼil COVID-19, xyaʼ jujun taq pixabʼ chqe rech kqetaʼmaj jas kqabʼan che ri e riqbʼal ibʼ y ri utzijoxik ri utzij ri Dios. Qas aninaq xqamaj umulixik qibʼ pa ri e riqbʼal ibʼ y pa ri e nimaʼq taq riqbʼal ibʼ pa videoconferencia, y xqamaj utzijoxik ri utzij ri Dios pa taq cartas y pa teléfono. Ri Jehová utewchim ri chuqʼabʼ che tajin kqakojo. E kʼi sucursales kibʼim che más tajin kekʼiyar ri publicadores pa ri kiterritorio. Xuqujeʼ pa wajun tiempo riʼ, e kʼi qachalal kikʼulmam utz taq jastaq pa ri kikʼaslemal (chawilaʼ ri recuadro «Ri Jehová tajin kutewchij ri kbʼan che utzijoxik ri utzij»).

16. ¿Jas qas qetaʼm?

¹⁶ Weneʼ jujun qachalal kichomam che ri utinamit ri Jehová más kuya uwiʼ ronojel ri jastaq che kubʼan chuwach ri nimalaj yabʼil. Are kʼu qas qilom che ronojel ri pixabʼ che yaʼom chqe oj utoʼm (Mat. 11:19). We kojchoman chrij ri ubʼanom ri Jesús che ukʼamik qabʼe, qas kqakubʼsaj qakʼuʼx che apastaneʼ ri kqariq na pa ri petinaq, ri Jehová y ri loqʼalaj uKʼojol amaqʼel kekʼojiʼ qukʼ (chasikʼij uwach Hebreos 13:5, 6).

17. ¿Jas kanaʼo che katchakun rukʼ ri Jesús?

¹⁷ ¡Sibʼalaj kojkikotik rumal che tajin kojchakun chuxeʼ ri utaqanik ri Jesús! Oj kʼo pa jun tinamit che uyaʼom ta bʼe che rumal ri qatinamit, ri qabʼanik o ri qachʼabʼal oj utasom. Yaʼom ronojel ri kajwataj chqe pa ri qakojonik y ri rajawaxik chqe rech kqatzijoj ri utzij ri Dios. Y chqajujunal tajin kqetaʼmaj jas más rajawaxik kqabʼano rech kqakʼex ri qakʼaslemal y keqaloqʼoqʼej ri nikʼaj chik. ¡Sibʼalaj kojkikot rumal ri Jesucristo, ri utzalaj kʼamal qabʼe!