Ri nim riqbʼal ibʼ re oxibʼ qʼij xyaʼ pa radio y televisión

Ksach ta chqe ri xbʼan che ri nim riqbʼal ibʼ re oxibʼ qʼij 2020 y xyaʼ pa internet. Are kʼu ri qachalal re Mozambique y re Malaui che kʼo ta kinternet xekunik xkil ri nim riqbʼal ibʼ. ¿Jas xkibʼan che ubʼanik?

Ri Comité re Coordinadores y de Enseñanza re ri Jupuq Ajkʼamal bʼe cho ronojel uwach Ulew, xkiya bʼe che kqʼaxex ri nim riqbʼal ibʼ re oxibʼ qʼij pa radio y televisión pa Malaui y Mozambique. ¿Jasche xkiya bʼe che kbʼan wariʼ? Rumal che ri internet pa Malaui sibʼalaj paqal rajil. Rumal laʼ e kʼi Testigos re ri tinamit kʼo ta kinternet. Ri qachalal William Chumbi, miembro re ri Comité re Sucursal re Malaui, kubʼij: «Xaq xiw pa ri radio y pa ri televisión ri e qachalal kekunik kkitaʼ o kkil ri nim riqbʼal ibʼ». Jun chi qachalal Luka Sibeko, miembro re ri Comité re Sucursal re Malaui, kubʼij: «Wet mat xkoj ri radio y ri televisión, mat e kʼi riʼ ri e qachalal re ri qasucursal kkilo o kkitaʼ ri nim riqbʼal ibʼ». Xuqujeʼ pa Mozambique e kʼi qachalal kekun taj kkiloqʼ jun kiteléfono, et kʼu lo ri internet.

¿Jas xbʼan che ubʼanik?

Rumal ri pandemia re ri COVID-19, tajin kqʼaxex chi ri e riqbʼal ibʼ pa jujun emisoras re radio y televisión.a Rech kqʼaxex ri nim riqbʼal ibʼ re oxibʼ qʼij, xechʼaw kukʼ ri e ajchaqʼe ri radio y televisión rech kkiya más horas chke.

Are kʼu ri e qachalal re Malaui xkiriq jun kʼax. Ri e ajchaqʼe ri radio y televisión kkaj taj che kkiqʼaxej jun programa che kuchʼij más jun hora rumal che kkibʼisoj weneʼ ri winaq kkʼistaj kikʼuʼx che rilik o che utatabʼexik. Are kʼu ri e qachalal xkibʼij chke, che ri kqabʼano sibʼalaj nim ubʼanik y keʼutoʼ konojel ri winaq. Jun kʼutbʼal, are chiʼ e kʼi winaq kekun taj keʼel lo pa ri kachoch, kekunik kkitatabʼej ri utzalaj taq tzij che kuyaʼ ubʼixik ri Biblia. Wariʼ keʼutoʼ rech keʼux utz taq winaq xuqujeʼ kekikot pa ri kifamilia. Are chiʼ xketaʼmaj wariʼ ri e ajchaqʼe ri radio y televisión, xkiya bʼe rech ri e qachalal kkikoj más horas.

Pa Malaui, jun emisora re radio y jun chik rech televisión xkiqʼaxej ri qanim riqbʼal ibʼ re oxibʼ qʼij. Wariʼ xubʼano che e kʼi winaq xekunik xkitaʼ y xkilo. Pa Mozambique, xkoj 85 emisoras re radio y jun televisión rech xkiqʼaxej ri qanim riqbʼal ibʼ re oxibʼ qʼij.

Xsach 28,227 dólaresb rech xqʼaxex ri qanim riqbʼal ibʼ pa televisión y xsach 20,000 dólares rech xqʼaxex pa radio pa kebʼ tinamit. Weneʼ kkoj 15 o 2,777 dólares, che utojik ri radio che kuqʼaxej ri qanim riqbʼal ibʼ.

Ri e qachalal, qas utz xkibʼan che ukojik ri kuchuj. Jun kʼutbʼal, xechʼaw kukʼ ri e ajchaqʼe ri radio y televisión re Malaui rech kkiqasaj jubʼiqʼ ri rajil. Jun chke ri emisora xuqasaj 30<u200A>%. Jeriʼ xbʼan ahorrar 1,711 dólares. E jujun chi emisoras re Mozambique xkiqasaj ri rajil rumal che ri testigos rech Jehová e utz taq winaq y e puntual che utojik.

Ri e qachalal sibʼalaj kemaltyoxinik

Ri e qachalal sibʼalaj kemaltyoxinik che xekunik xkilo y xkitatabʼej ri riqbʼal ibʼ pa ri qʼij riʼ. Ri qachalal Patrick, jun kʼamal bʼe re jun congregación pa Malaui, kubʼij: «Sibʼalaj kqamaltyoxij che ri Jupuq Ajkʼamal bʼe cho ronojel uwach Ulew che xubʼan wariʼ che qatoʼik pa ri tiempo re ri pandemia». Jun chi qachalal re Malaui, Isaac ubʼiʼ, kubʼij: «Sibʼalaj kojmaltyoxinik che xojkunik xqatatabʼej ri nim riqbʼal ibʼ pa radio rumal che kʼo ta chi jun qaparato eletrónico. Are jun nimalaj sipanik che xuya ri Jehová chqe, rumal wariʼ ronojel ri nufamilia xekunik xkitatabʼej ri nim riqbʼal ibʼ. Qas kqʼalajinik che ri Jehová keʼuloqʼoqʼej ri upatanelabʼ».

Jun pulicador re Mozambique are ri nabʼe mul che xkʼojiʼ pa ri nim riqbʼal ibʼ re 2020. Xubʼij: «Rilik ri nim riqbʼal ibʼ pa televisión xunaʼtajisaj chwe che ri Jehová are ri Dios kʼo nimalaj uchuqʼabʼ, kʼo ta jun pandemia xqʼatenik che mat neʼ xqil ri qanim riqbʼal ibʼ y che xul kʼa pa ri qachoch. Qas xwilo che ri upatanelabʼ ri Jehová kkiloqʼoqʼej kibʼ y che are waʼ ri qastzij kojonem».

Jun kʼamal bʼe re ri congregación Wyson ubʼiʼ kubʼij: «Kwaj kinmaltyoxij che ri Jupuq Ajkʼamal bʼe cho ronojel uwach Ulew che amaqʼel xkiya ri kajwataj chqe pa ri qakojonik pa ri pandemia riʼ kʼo ta más kʼi jastaq qech rumal che oj pobre, are kʼu sibʼalaj kʼi xqetaʼmaj pa ri riqbʼal ibʼ che xyaʼ pa radio y televisión».

Ri Comité re Coordinadores y re Enseñanza xkiya chi bʼe che ubʼanik jun jastaq. Xkiya bʼe rech kqʼaxex ri nim riqbʼal ibʼ 2021 pa radio y televisión pa jujun taq lugares. ¿Jawchiʼ kemoʼq wi ri pwaq che utojik wariʼ? Rumal ri donaciones che kyaʼ pa ri obra mundial pa donate.jw.org. Sibʼalaj maltyox che ri ikuchuj.