Ri ucuerpo jun winaq, kkun taj kkʼojiʼ jun qʼatbʼal tzij chupam

¿La pa qanimaʼ ko wi riʼ ri uQʼatbʼal tzij ri Dios?

Ri kuya ubʼixik ri Biblia

Ri uQʼatbʼal tzij ri Dios man xaq ta pa kanimaʼ ri cristianos kʼo wi.a Ri Biblia kubʼij che ri rajawbʼal ri Dios pa ri kaj kʼo wi (Mateo 4:17). Xuqujeʼ kubʼij che wajun Qʼatbʼal tzij riʼ ya tajin kuqʼat chi tzij pa ri kaj. Chqilaʼ.

Pa ri uQʼatbʼal tzij ri Dios e kʼo uqʼatal tzij, uwinaq y utaqanik, rech ktzʼaqatisax ri urayibʼal ri areʼ pa ri kaj xuqujeʼ cho ri uwach Ulew (Mateo 6:10; Apocalipsis 5:10).
Ri uQʼatbʼal tzij ri Dios kuqʼat na tzij pa kiwiʼ ri «winaqke konojel ri nimaʼq taq tinamit xuqujeʼ taq chʼabʼal» (Daniel 7:13, 14). Jun qʼatal tzij taj che xaq winaq e kojowinaq; xaneʼ are ri Dios kojowinaq y uyaʼom taqanik pa uqʼabʼ rech kuqʼat tzij pa kiwiʼ ri winaq (Salmo 2:4-6; Isaías 9:7).
Ri Jesús xubʼij chke ri apóstoles che kekʼojiʼ rukʼ pa ri uQʼatbʼal tzij. ¿Jasche? «Rech k[e]tʼuyiʼ pa kiwiʼ taq tem che uqʼatik tzij», kraj kubʼij che kkiqʼat tzij rukʼ pa ri kaj (Lucas 22:28, 30).
Ri uQʼatbʼal tzij ri Dios kusachisaj na kiwach ri ukʼulel (Salmo 2:1, 2, 8, 9; 110:1, 2; 1 Corintios 15:25, 26).

Ri Biblia kubʼij che ri uQʼatbʼal tzij ri Dios pa qanimaʼ ta ko wi. Are kʼu ri qas kukʼut ri Biblia are che «ri tijonik re ri rajawbʼal ri Dios» o ri «utzalaj taq tzij re ri rajawbʼal ri Dios» kʼo kubʼan pa ri qakʼaslemal (Mateo 13:19; 24:14).

¿Jasche xubʼij ri Jesús: «Ri rajawbʼal ri Dios kʼo chi chixoʼl»?

E jujun taq winaq e sachinaq che uchʼobʼik ri kraj kubʼij Lucas 17:21 rumal che utz ta bʼanom che ubʼixik ri qas xraj xubʼij ri Jesús. Rumal laʼ jujun winaq kkibʼij che pa kanimaʼ ko wi ri uQʼatbʼal tzij ri Dios. Are kʼu, rech qas kqachʼobʼ ri kubʼij wajun versículo riʼ rajawaxik kqasikʼij ri contexto.

Jujun taq kʼamal bʼe itzel xkil ri Jesús — Ri uQʼatbʼal tzij ri Dios man pa kanimaʼ ta ri itzel taq winaq kʼo wi

Ri Jesús xubʼij wa taq tzij riʼ chke ri fariseos, jun jupuq winaq che itzel xkilo y xkaj xkikamisaj (Mateo 12:14; Lucas 17:20). ¿La xraj xubʼij che ri itzel taq winaq riʼ pa kanimaʼ kʼo wi ri uQʼatbʼal tzij ri Dios? No, are ta waʼ ri xraj xubʼij, xaneʼ xubʼij chke: «Ri ix xa kebʼ [i]wach, ix nojinaq kʼu che etzelal» (Mateo 23:27, 28).

Nikʼaj chi traducciones re ri Biblia utz kkibʼan che ubʼixik Lucas 17:21. Ri Biblia U tzij ri Dios pa quiche aj Guatemala (SBU) kubʼij: «Ri rajawbʼal ri Dios kʼo chi chixoʼl». Are k’u, ¿jas kraj kubʼij che ri uQʼatbʼal tzij ri Dios kʼo chi chkixoʼl ri fariseos? Kraj kubʼij che ri Jesús kʼo chkixoʼl ri winaq riʼ y che chaʼom chi rumal ri Dios rech kux qʼatal tzij (Lucas 1:32, 33).

a E kʼi iglesias kkikʼutu che ri uQʼatbʼal tzij ri Dios pa kanimaʼ ri winaq kʼo wiʼ. Jun kʼutbʼal, jun Convención de Bautistas del Sur —jun jupuq protestantes re Estados Unidos— xubʼij che ri uQʼatbʼal tzij ri Dios tajin «kuqʼat tzij pa kanimaʼ ri winaq xuqujeʼ pa ri kikʼaslemal». Chupam ri libro Jesús de Nazaret, ri papa Benedicto XVI xubʼij: «Ri uQʼatbʼal tzij ri Dios kok pa ranimaʼ ri winaq we knimanik».