Jun wuj che utz knikʼox ri kʼo chupam
Sibʼalaj kʼi ri Utzij ri Dios jachom pa ronojel ri kikʼaslemal ri winaq. ¿La asikʼim uwach wajun utzalaj wuj riʼ? Pa konojel ri e junabʼ che qʼaxinaq, ukubʼsam kikʼuʼx ronojel kiwach winaq xuqujeʼ kiriqom utzil rumal ri kutzʼijoj ri Utzij ri Dios. Tekʼuriʼ, e kʼi kisikʼim ta uwach, xuqujeʼ e jujun —pa neʼ e kojonaq o e kojonaq taj— kkaj kketaʼmaj ri kʼo chupam. We kawaj kawetaʼmaj ri kubʼij, wajun wuj riʼ katutoʼ che umajixik.
CHIʼ majaʼ kawil ri e kʼo pa ri uxaq, utz che kawetaʼmaj jujun jastaq chirij. Pa ri Utzij ri Dios kʼo 66 alaj taq wuj. Ri nabʼe wuj are Génesis, ri kʼisbʼal are Apocalipsis.
¿Jachin xbʼanow ri Utzij ri Dios? Wariʼ utz che ketaʼmaxik. Pa más che 1.600 junabʼ, weneʼ 40 achijabʼ xetzʼibʼan ri 66 alaj taq wuj. Tekʼuriʼ, sibʼalaj nim ubʼanik che nijun chike xubʼij che areʼ xbʼanowik. Jun chike xubʼij: «Ronojel ri Tzʼibʼatalik petinaq rukʼ ri Dios» (2 Timoteo 3:16). Jun chik xubʼij: «Ri Ruxlabʼal ri Ajawaxel kachʼaw wumal in; ri utzij kʼo puwiʼ ri waqʼ» (2 Samuel 23:2). Rukʼ waʼ kqilo, che ri xetzʼibʼan ri Utzij ri Dios xkikʼutu che are ri Dios Jehová, ri Nimalaj Ajqʼatol tzij rech ri kajulew, xbʼanow ri Loqʼalaj Wuj. Pa ri e uxaq kukʼutu che ri areʼ xuya chaqe rech kqetaʼmaj uwach.
Xuqujeʼ sibʼalaj rajawaxik kqetaʼmaj ri nim ubʼanik che kukʼut ri Utzij ri Dios: ri Dios kukoj na jun Ajawibʼal pa ri kaj che kubʼano che ketaʼmaxik che areʼ taqal che kuqʼat tzij pa kiwiʼ ri winaq xuqujeʼ rech nim kil wi. Pa ri nikʼaj chik uxaq wajun wuj riʼ kawetaʼmaj che are waʼ ri ktzʼijox pa ronojel ri Utzij ri Dios, che kumaj pa Génesis kʼa kopan pa Apocalipsis.
Kqabʼij chawe che katchoman chirij wariʼ chiʼ katok che retaʼmaxik ri kubʼij ri wuj che más nim ubʼanik.
a Chuxeʼ ri e uxaq wajun wuj riʼ kkoj «a.C.» chiʼ kchʼaw chirij ri jastaq che xbʼanik chiʼ majaʼ kpe ri Cristo (antes de Cristo), tekʼuriʼ chi kkoj «d.C.» are kchʼaw chirij ri jastaq che xbʼanik chikʼ kʼot chi ri Cristo (después de Cristo).