Ri Dios kutewchij ri Abrahán xuqujeʼ ri ufamilia

RI Jehová retaʼm che kopan na jun qʼij che ri Ukʼojol kujach na ri ukʼaslemal. Ri xbʼix kan pa Génesis 3:15 je kukʼutu, pa neʼ qas ta kubʼij jachinoq. Rech ri winaq kkichʼobʼ ri nimalaj kʼax kuya che ri Jehová ri ukamikal ri Ukʼojol, xraj che xtzʼibʼax kan pa ri Utzij ri Dios ri xbʼantajik chiʼ xubʼij che ri Abrahán che kukamisaj ri loqʼalaj ukʼojol ubʼiʼ Isaac.

Masach chaqe che ri Dios ubʼim che ri Kolonel kalax pa ri ufamilia ri Isaac. Ri Abrahán kukojo che je waʼ kbʼanik xuqujeʼ kuchʼobʼo che, we rajawaxik, ri Dios kuwalajisaj lo ri Isaac chkixoʼl ri kaminaqibʼ. Rumal laʼ xnimanik xuqujeʼ xuchaplej ujachik ri ukʼaslemal ri ukʼojol. Tekʼuriʼ, chiʼ tajin kubʼano, ri Jehová xutaq lo jun ángel che uqʼatexik. Sibʼalaj xbʼan nim che ri Abrahán rumal ri nimalaj ukojonik xuqujeʼ xubʼij che ri kubʼan na.

Chiʼ xeqʼax ri junabʼ, xekʼojiʼ kebʼ ukʼojol ri Isaac: ri Esaú xuqujeʼ Jacob. Chike ri e kebʼ, ri nim xril ri tyox taq jastaq are ri Jacob, rumal laʼ xukʼam nim tewchibʼal. Ri Dios xukʼex ri ubʼiʼ xukoj Israel che, xuqujeʼ ri e kabʼlajuju ukʼojol are xkibʼan ri tribus rech Israel. Tekʼuriʼ ¿jasche xubʼan jun nimalaj tinamit wajun familia riʼ?

Xuchaplej kikʼiyik chiʼ ri e ratz ri José xkʼiy itzelal pa kanimaʼ chirij. Sibʼalaj itzel xkilo, rumal laʼ xkikʼayij bʼik. Ri xeloqʼowik xkikʼam bʼi pa Egipto, chilaʼ xuriq kʼax. Tekʼuriʼ, ri Dios xutoʼ wajun sukʼ ala riʼ che ko ranimaʼ, pa jun qʼij, ri faraón xuya jun chak nim ubʼanik che. Rukʼ wariʼ xkunik xutoʼ ri ufamilia chiʼ ri wiʼjal xubʼan che ri Jacob che xeʼutaq bʼi ri e ukʼojol rech kkiloqʼo jastaq pa Egipto. ¿Jachin riʼ ri kataqan puwiʼ ri jastaq? ¡Are ri José! Chiʼ xeʼuriq chi ri rachalal —kʼo ta chi itzelal pa kanimaʼ chirij— José xusach kimak xuqujeʼ xubʼij chike che kkikʼama konojel ri e rachalal. Ri faraón xuya ri utzalaj ulew chike, chilaʼ ri familia xkʼiyik xuqujeʼ xkʼojiʼ kʼi jastaq ke. Ri José xuchʼobʼo che are Jehová xbʼanowik rech xbʼan ri xubʼij che kbʼan na.

Ri Jacob xkʼojiʼ kan pa Egipto, kukʼ ri e ralkʼwal, kʼa chiʼ xkamik. Chiʼ tajin kkamik xubʼij kanoq che ri Kolonel are kubʼan na ajawinel che nim uchuqʼabʼ xuqujeʼ che kalax pa ri ufamilia ri ukʼojol ubʼiʼ Judá. Chiʼ xeqʼax ri junabʼ, José xubʼij che ri Dios keresaj na ri ufamilia ri Jacob pa Egipto.

(Esam chupam ri capítulo 20 kopan 50 rech Génesis xuqujeʼ Hebreos 11:17-22.)