Chqabʼanaʼ sibʼalaj utz che ri qachak: cheqatoʼ ri kkisikʼij uwach ri revistas

¿Jasche rajawaxik? E kʼi winaq kkaj kkisikʼij uwach ri revistas are kʼu kkaj taj keqatijoj chrij ri Biblia, weneʼ rumal che utz kkil ri kojonik che e kʼo wi o rumal che kʼo ta kitiempo che retaʼmaxik ri kubʼij ri Biblia. Are kʼu, rumal che amaqʼel kkisikʼij ri revista, weneʼ knimar ri kiloqʼoqʼenik chrij ri Utzij ri Dios (1 Ped. 2:2). Weneʼ kʼo jun kʼutunem che qas kopan pa kanimaʼ ri kubʼij, o kkʼextaj ri ukʼaslemal. Are chiʼ amaqʼel keqasolij, pa neʼ xa jubʼiqʼ tiempo, kqetaʼmaj jas ri kkaj xuqujeʼ jas ri keʼok wi il, xuqujeʼ kubʼano che ri e winaq kkikubʼsaj kikʼuʼx chqij. Weneʼ kubʼano che chiʼ keqʼax ri qʼij kkaj jun etaʼmanik chrij ri Biblia.

Ri kqabʼano:

Amaqʼel chakʼamaʼ bʼi che ri winaq ri kʼakʼ taq wuj La Atalaya. Pa jun qʼij chik rech ri ikʼ kuya kasolij ri winaq rech kabʼij che, che kusikʼij jun kʼutunem rech ri revista che xaya kan che, o rech kaya kan ri wuj che ri tajin kkoj pa ri ikʼ. Chatzʼibʼaj ri kawilo o ri kubʼij ri winaq. (Chawilaʼ pa ri wuj Ri Qachak che ri Dios rech enero 2014, pág. 3.)
Chachomaj ri kabʼano chiʼ majaʼ katbʼe che usolixik ri winaq. Xaq xiw ta kaya kan ri revista che, chakojoʼ achuqʼabʼ rech kattzijon rukʼ xuqujeʼ che at utz rukʼ. We kabʼan wariʼ katkunik katoʼ rech kretaʼmaj más chrij ri qastzij.
Chakojoʼ achuqʼabʼ rech kachaplej jun etaʼmanik rech ri Biblia. We jun chke ri winaq che kukʼam ri revista kutaʼ chawe ri kubʼij ri Biblia chrij jun kʼutunem che are kraj kretaʼmaj, chakʼamaʼ bʼi jun wuj che kkoj che uyaʼik jun etaʼmanik rech kawil rukʼ chrij ri xutaʼ chawe. Are chiʼ majaʼ katbʼek, chabʼanaʼ chi jun pregunta rech ri kʼutunem che xiwilo che xuqujeʼ chabʼij che, che kattzalij chi rukʼ pa jun qʼij chik. We kʼi mul at tzijonaq rukʼ ri winaq chrij ri Biblia xuqujeʼ kakoj jun wuj che kkoj che etaʼmanik rech ri Biblia, amajim chi jun etaʼmanik riʼ. ¿La ayaʼom kan ri wuj Utz jastaq xuqujeʼ akʼutum chuwach ri kbʼan che ri etaʼmanik chrij ri Biblia pa kebʼ oxibʼ minutos? Jun chi chke ri jastaq che katkunik kabʼano are che kakʼut ri videos ¿Jasche kqetaʼmaj chrij ri Biblia? xuqujeʼ ¿Jas ubʼanik ri tijonik chrij ri Utzij ri Dios? Pa neʼ ri winaq nabʼe ubʼim chawe che kraj taj katijoj chrij ri Biblia, weneʼ kkʼextaj ri ukʼaslemal. Chakojoʼ achuqʼabʼ rech katzujuj chi jumul ri etaʼmanik che.

Chabʼanaʼ waʼ pa jun ikʼ:

Chatzʼibʼaj kibʼiʼ ri winaq che weneʼ kakʼam bʼi ri revistas chke ronojel ikʼ. Chatzujuj ri revistas che kʼateʼ xeʼel loq xuqujeʼ chabʼij chke che kattzalij chi jumul are chiʼ kel chi lo nikʼaj chik.