KʼUTUNEM 10

Xa ta jun kabʼan che ri achʼabʼal are chiʼ kattzijonik

Proverbios 8:4, 7

RESUMEN: Chakʼexaʼ ri volumen, ri chuqʼabʼ, xuqujeʼ ubʼanik we nojimal o aninaq kchʼawik o kasikʼij uwach jun wuj rech qas utz kbʼan che ubʼixik ri jalajoj taq chomanik xuqujeʼ rech utz ktatajik.

JAS KBʼAN CHE UBʼANIK

Chakʼexaʼ ri volumen. Chayaʼ más uchuqʼabʼ ri achʼabʼal rech kakʼut ri pixabʼ nim kibʼanik xuqujeʼ rech utz ktatajik. Xuqujeʼ jeʼ chabʼanaʼ are chiʼ kasikʼij uwach jun pixabʼ re kʼajisabʼal wachaj. Chaqasaj uchuqʼabʼ ri achʼabʼal are chiʼ kawaj che ri kattatabʼenik kkeyeʼj ri kabʼij o kabʼij tzij che kuya xibʼin ibʼ o bʼisobʼal.

Amaqʼel taj ko katchʼawik, o kabʼan taj che ri kattatabʼenik kkichomaj che xa katyajanik. Kaya ta uwiʼ ri kabʼan che ri usikʼixik uwach rech xaq ta at katkikaʼyej ri e kʼo pa ri auditorio.
Chakʼexaʼ ri uchuqʼabʼ. Chabʼanaʼ laʼj che ri achʼabʼal are chiʼ katchʼaw chrij tzij re kikotemal o chrij unimal o unajil jun jastaq. Chabʼanaʼ más chom che ri achʼabʼal are chiʼ kabʼij bʼisobʼal taq tzij.
Chakʼexaʼ ri ritmo. Más aninaq chatchʼawoq we kawaj kakʼut entusiasmo. Nojimal chatchʼawoq we kawaj kakʼut jun pixabʼ nim ubʼanik.

Utz chabʼanaʼ che ukʼexik ri ritmo, rech kkixibʼij ta kibʼ ri tajin kattatabʼenik. Qas ta aninaq katchʼawik rech ktataj ri kabʼij.