Rajawaxik kqetamaj uwäch ri Ajawaxel

Rech kqachilaj ri Ajawaxel, rajawaxik kqetamaj uwäch. Qachiʼl ketaʼm qabʼiʼ xuqujeʼ kojkisikʼij rukʼ qabʼiʼ, ¿qastzij? Rumal waʼ, ri Ajawaxel kraj che kqetamaj ubʼiʼ xuqujeʼ kqakoj ubʼiʼ. Ri ubʼiʼ ri Ajawaxel are Jehová (Salmo 83:18, NM; Mateo 6:9). Xuqujeʼ rajawaxik kqetamaj jas täq utz krilo xuquje jas täq utz täj krilo, jachin täq e urachiʼl xuqujeʼ jachin täq e ukʼulel. Rumal che naj kukʼam bʼi uretamaxik uwäch jun winaq, ri Loqʼalaj Pixabʼ kubʼij chaqe che we kʼo qanoʼj kqajam qaqʼij rech kqetamaj uwäch ri Jehová (Efesios 5:15, 16).

Urachiʼl ri Ajawaxel kkebʼan jas täq utz krilo. Chomajampeʼ chirij awachiʼl. We kabʼan kʼäx chike xuqujeʼ kabʼan jas täq utz täj kkilo, ¿la kkebʼan na awachiʼl? kkebʼan ta chik. Rumal laʼ, we kqaj kqachilaj ri Ajawaxel, rajawaxik kqabʼano jas täq utz krilo (Juan 4:24)

Ronojel täj ri täq kojonem kojkitoʼ che ubʼanik urachiʼl ri Ajawaxel. Ri Jesús, ri sibʼalaj nim urachiʼl ri Ajawaxel, xubʼij che e kʼo kebʼ bʼe. Ri jun, nim uwäch xuqujeʼ nojinaq che winaq. Wa jun bʼe kojukʼam bʼi pa sachbʼäl wäch. Ri jun chik bʼe, latzʼ uwäch xuqujeʼ xa jujun täq kebʼin chupam. Wa jun bʼe are kojukʼam bʼi pa ri kʼaslemal che kʼot ukʼisik. Wariʼ kraj kubʼij che we kqaj kqachilaj ri Ajawaxel, rajawaxik kqetamaj chike ri qastzij uqʼijlaxik rech kqayaʼ uqʼij (Mateo 7:13, 14).