¿E jampaʼ testigos rech Jehová awetaʼm kiwach? Jujun chike weneʼ e kʼo naqaj che ri awachoch, e awachiʼl pa ri chak o pa ri tijobʼal. O weneʼ kitzijom chawe ri kubʼij ri Loqʼalaj Pixabʼ. ¿Jas riʼ ri qas kibʼantajik xuqujeʼ jasche kkiya ubʼixik chike nikʼaj chik chirij ri kikojonik?

Öj junam kukʼ ri nikʼaj chik winaq. Junam ta kojel wi, xuqujeʼ junam ta ubʼanik ri jastaq qe kʼolik. Jujun chike ojer xekʼejeʼ pa jun chik kojonik, nikʼaj chik weneʼ xkikoj täj che kʼo ri Ajawaxel. Tekʼuriʼ, chiʼ majaʼ kqabʼan testigo rech Jehová, konojel xqatas qatiempo che retaʼmaxik\ chirij ri kʼutunem che kʼo pa ri Loqʼalaj Pixabʼ (Hechos 17:11). Xqilo che qastzij ri tijan kqetaʼmaj, tekʼuriʼ pa qajujunal xqachaʼ uqʼijilaxik ri Ajawaxel Jehová.

Kqariq utzilal rumal che kqetaʼmaj chirij ri Loqʼalaj Pixabʼ. Junam che konojel ri nikʼaj chik, kqariq kʼäx xuqujeʼ kʼäx kqariq che ubʼanik ri utz. Tekʼuriʼ chiʼ kqabʼan ronojel täq qʼij ri pixabʼ rech ri Utzij ri Ajawaxel pa ri qakʼaslemal, qilom che kʼo chi jun nim utzilal uyaʼom pa qakʼaslemal (Salmo 128:1, 2). Wariʼ are jun rumal rech kqabʼij chike ri winaq ri jastaq che qetaʼmam chirij ri Loqʼalaj Pixabʼ.

Kqaya chike ri utz pixabʼ kkikʼam bʼe pa qakʼaslemal. Ri pixabʼ riʼ, che kukʼut ri Utzij ri Ajawaxel, kkibʼano che kqabʼan ri utz. Xuqujeʼ, che nim keqil wi ri nikʼaj chik, kqabʼij ri qastzij xuqujeʼ kqabʼan ri utzilal. Wariʼ kubʼan utz chike ri winaq xuqujeʼ kubʼano che kkibʼan ajchakibʼ, kubʼano che ri familia ktukin täj xuqujeʼ saq ri kikʼaslemal. Rumal che qetaʼm che ri «Dios man jalan ta keril wi täq ri winaq», qabʼanom xa jun familia pa neʼ jalajoj tinamit öj kʼo wi xaq junam ri qachomanik chirij ri qakojonik, kojuqʼatej ta ri política xuqujeʼ ri junam ta ri qatinamit. Pa neʼ xaq öj junam kukʼ ri nikʼaj chik winaq kqabʼan jun tinamit che kʼot nijun junam rukʼ (Hechos 4:13; 10:34, 35).

• ¿Jas kejunamataj wi ri testigos rech Jehová kukʼ ri nikʼaj chik winaq?

• ¿Jas utz täq pixabʼ ukʼutum ri Utzij ri Ajawaxel chqawach?

E kʼi winaq kkichomaj che ri bʼiʼaj «testigos rech Jehová» are ubʼiʼ jun kʼakʼ kojonik. Tekʼuriʼ, qʼaxinaq chi más che 2.700 junabʼ, che kbʼix «qʼalajisanelabʼ» o testigos chike ri e qastzij upataninel ri Ajawaxel (Isaías 43:10-12). Chiʼ majaʼ kopan ri junabʼ 1931 ri qabʼiʼ are Ajtijoxelabʼ rech ri Loqʼalaj Pixabʼ. ¿Jasche ri qabʼiʼ kimik are testigos rech Jehová?

Kuya ubʼixik chirij ri Ajawaxel. Junam che kkibʼij ri nabʼe täq wuj che xtzʼibʼaxik, ri ubʼiʼ ri Ajawaxel, Jehová, kʼo más che 7.000 mul chupam ri Loqʼalaj Pixabʼ. Pa kʼi Loqʼalaj Pixabʼ kʼexom wajun bʼiʼaj riʼ rukʼ ri e tzij Ajaw o Ajawaxel. Tekʼuriʼ, ri qastzij Ajawaxel uqʼalajisam chi ri ubʼiʼ, Jehová, chuwach ri Moisés chiʼ xubʼij: «Are nubʼiʼ waʼ chbʼe qʼij saq» (Éxodo 3:15, chawilaʼ pa ri uxaq 2123 rech ri Loqʼalaj Pixabʼ chirij ri tzij «Ajawaxel»). Je wariʼ, areʼ xukʼutu che xaq ta junam kukʼ ri e dioses che e qastzij täj. Öj sibʼalaj nim kqil wi che qakʼamom ri saqalaj ubʼiʼ ri Ajawaxel.

Kuya ubʼixik chirij ri qachak. E kʼi winaq che xekʼaseʼ ojer, kumaj rukʼ ri Abel, xkiya ukʼutik ri kikojonik chirij ri Jehová. Chiʼ qʼaxinaq chi kʼi junabʼ, Noé, Abrahán, Sara, David xuqujeʼ nikʼaj chik che e kʼo chkixoʼl ri e «kʼi qʼalajisanelabʼ» (Hebreos 11:4–12:1). Junam che pa jun qʼatbʼal tzij jun winaq kkunik kchʼaw chirij jun winaq che kʼot umak, öj kqaj kqaya ubʼixik ri qastzij chirij ri Ajawaxel.

Kqabʼan qe junam rukʼ ri Jesús. Ri Loqʼalaj Pixabʼ kubʼij che areʼ ri «jikalaj qʼalajisanel ri kubʼij ri qastzij» (Apocalipsis 3:14). Jesús xubʼij che areʼ xuya ubʼixik ri ubʼiʼ ri Ajawaxel xuqujeʼ xuya ubʼixik ri qastzij chirij ri Utat (Juan 17:26; 18:37). Rumal laʼ, ri e qastzij rajtijoxelabʼ ri Cristo rajawaxik kkikoj ri ubʼiʼ ri Ajawaxel xuqujeʼ kkiya ubʼixik. Are wariʼ ri rumal che kkikoj kichoqʼabʼ ri testigos rech Jehová che ubʼanik.

• ¿Jasche ri Ajtijoxelabʼ rech ri Loqʼalaj Pixabʼ xkichaʼ ri bʼiʼaj testigos rech Jehová?

• ¿Jampaʼ xmajtaj loq che e kʼo utestigos ri Jehová pa ri uwach Ulew?

• ¿Jachin laʼ ri qas utzalaj testigo rech Jehová?

Ri Loqʼalaj Pixabʼ xubʼij che chiʼ kkam ri Cristo, chkixoʼl ri nabʼe täq cristianos kewalij nikʼaj che kkitzijoj na jechʼalaj täq jastaq chirij ri Loqʼalaj Pixabʼ (Hechos 20:29, 30). Chiʼ qʼaxinaq chi ri junabʼ, je xbʼanik. E areʼ xkiyuj ri ukʼutunem ri Jesús rukʼ ri kichomanik ri qastzij täj kojonem, wariʼ xubʼano che xkʼiy lo jun chik kojonem che qastzij täj (2 Timoteo 4:3, 4). ¿Jasche qetaʼm kimik che kqachʼobʼ ri qastzij chirij ri qas kukʼut ri Loqʼalaj Pixabʼ?

Xopan ri qʼij che ri Jehová kuya ubʼixik chirij ri qastzij. Areʼ xubʼij che pa ri kʼisbʼal täq qʼij, ri qastzij etaʼmanik kubʼan na sibʼalaj kʼi (Daniel 12:4). Pa ri junabʼ 1870, jun jupuq winaq che tijan kkitzukuj chirij ri qastzij xkilo che kʼi chike ri kikʼutunem ri iglesias esam ta pa ri Loqʼalaj Pixabʼ. Rumal laʼ, xkimaj utzukuxik etaʼmabʼal chirij ri qas kʼutunem rech ri Loqʼalaj Pixabʼ, xuqujeʼ Jehová xeʼutewchij rukʼ jun nimalaj nojibʼal che petinaq rukʼ areʼ.

Achijabʼ che qas xketaʼmaj ri qas kukʼut ri Loqʼalaj Pixabʼ. Waʼ utz täq ajtijoxelabʼ rech ri Loqʼalaj Pixabʼ, che xekʼaseʼ nabʼe chqawach öj, junam che xkibʼan e areʼ ojer je kqabʼan öj kimik. E areʼ xkinikʼoj pa jujunal ri kʼutunem che kʼo pa ri Loqʼalaj Pixabʼ. Chiʼ kkiriq jun kʼutunem che kʼäx uchʼobʼik, kkitzukuj nikʼaj chik versículos rech kkiya ubʼixik ri kraj kubʼij. Chiʼ kubʼan junam ri kichomanik rukʼ ri nikʼaj chik che kubʼij ri Loqʼalaj Pixabʼ, kkitzʼibʼaj. Je wariʼ, kkiyaʼo che are ri Loqʼalaj Pixabʼ kukʼut chkiwach ri qas kʼo chupam, e areʼ xketaʼmaj chi jumul ri qastzij chirij ri ubʼiʼ ri Ajawaxel, ri Rajawbʼal, ri urayinik chike ri winaq, che ri uwach Ulew, ri qastzij chikij ri kaminaqibʼ, xuqujeʼ ri kubʼsal kʼuʼx che kekʼastaj na. Rumal che je xkibʼano xkiya kan ri kojonik xuqujeʼ ri bʼantajik che qastzij täj (Juan 8:31, 32).

Pa ri junabʼ 1879 ri Ajtijoxelabʼ rech ri Loqʼalaj Pixabʼ xketaʼmaj che xopan ri tiempo che kyaʼ ukʼutik más chirij ri qastzij. Rumal laʼ che wajun junabʼ riʼ, xkimaj ubʼanik ri wuj che kimik kbʼan na: La Atalaya. Anunciando el Reino de Jehová. Kimik tijan kqaya ubʼixik ri utzalaj täq tzij chike ri winaq pa 240 nimaʼq täq tinamit xuqujeʼ xa jubʼiqʼ kraj che 750 chʼabʼal. ¡Ilom ta nabʼe che sibʼalaj kʼi winaq ketaʼmam ri qastzij!

• Chiʼ kaminaq chi ri Cristo, ¿jas xbʼantaj rukʼ ri qastzij che kʼo chupam ri Loqʼalaj Pixabʼ?

• ¿Jas rumal che qetaʼmam chi jumul chirij ri qastzij rech ri Utzij ri Ajawaxel?

Pa kʼi junabʼ, ri testigos rech Jehová xkikoj, jalajoj täq uwach Loqʼalaj Pixabʼ xuqujeʼ xkiqʼaxej chuwach täq wuj tekʼuriʼ xkiya chike ri winaq. Tekʼuriʼ, xkilo che are rajawaxik kkitzʼibʼaj ri Loqʼalaj Pixabʼ rukʼ kʼakʼ täq tzij rech kuya jun utz tobʼanik chike ri winaq rech qas «kaketamaj ri qastzij», wariʼ are, ri urayinik ri Ajawaxel chaqe qonojel (1 Timoteo 2:3, 4). Rumal laʼ, pa ri junabʼ 1950 xqamaj ubʼanik jupuq täq wuj rech ri Loqʼalaj Pixabʼ pa ri tzij che kkikoj ri winaq kimik, ri Traducción del Nuevo Mundo, pa ri chʼabʼal inglés.a

Are rajawaxik jun Loqʼalaj Pixabʼ che kʼäx ta uchʼobʼik. Chiʼ keqʼax ri junabʼ ri chʼabʼal kekʼextajik, tekʼuriʼ kʼo kʼi Loqʼalaj Pixabʼ che kkikoj na ri ojer täq tzij che kkoj ta chi kimik wariʼ kubʼano che kʼäx uchʼobʼik. Xuqujeʼ, riqom nabʼe täq wuj che más e tzʼaqat xuqujeʼ che más kajunamataj rukʼ ri nabʼe täq tzij che xtzʼibʼax wi ri Loqʼalaj Pixabʼ, wariʼ tobʼanaq rech kchʼobʼ chirij ri ojer täq chʼabʼal hebreo, arameo, xuqujeʼ ri griego che xtzʼibʼax wi ri Loqʼalaj Pixabʼ.

Rajawaxik jun Loqʼalaj Pixabʼ che sukʼ che ri utzij ri Ajawaxel. Ri e winaq che kkiqʼaxej ri Loqʼalaj Pixabʼ pa jun chik chʼabʼal rajawaxik che e sukʼ che ri tzij che xtzʼibʼax wi nabʼe mul ri Loqʼalaj Pixabʼ are ta kkikʼex ri uchomanik ri Ajawaxel. Tekʼuriʼ, pa kʼi Loqʼalaj Pixabʼ, ri ubʼiʼ ri Ajawaxel, Jehová, kkoj ta chi chupam.

Rajawaxik jun Loqʼalaj Pixabʼ che kuya uqʼij ri Ajbʼanol re. (2 Samuel 23:2.) Pa ri Traducción del Nuevo Mundo, ri bʼiʼaj Jehová kojom chi jumul pa täq ri vercículos jawiʼ kʼo wi ojer pa ri nabʼe täq wuj, jujun täq 7.000 mul (Salmo 83:18). Rumal che kojom kʼi junabʼ che retaʼmaxik chirij ri kubʼij, sibʼalaj kuya kikotemal chaqe chiʼ kqasikʼij uwach ri Loqʼalaj Pixabʼ rumal che qas kukʼut ri uchomanik ri Ajawaxel. Pa neʼ kʼo ta ri Traducción del Nuevo Mundo, pa ri achʼabʼal kqabʼij chawe che chachaplej usikʼixik ri Utzij ri Ajawaxel ronojel täq qʼij (Josué 1:8; Salmo 1:2, 3).

• ¿Jasche kqabʼij che rajawaxik jun Loqʼalaj Pixabʼ che kukoj kʼakʼ täq tzij?

• ¿Jas rajawaxik kkibʼan ronojel qʼij ri winaq che kkaj kketaʼmaj chirij ri urayinik ri Ajawaxel?