¿Jas utzilal kqariqo we nim kqil wi ri taqanik che ukojom ri Dios?

RI JEHOVÁ are ri Qʼatal tzij puwiʼ ronojel ri kajulew. We kqaj che amaqʼel kojkʼojiʼ pa ri utinamit rajawaxik kojniman che y kqachʼobʼo che ri uKʼojol are ri Kʼamal bʼe puwiʼ ri congregación. Xuqujeʼ rajawaxik che pa ronojel ri kqabʼano kqanimaj ri taqanik che ukojom. Unimaxik ri taqanik che ukojom ri Jehová, kuya utzilal chqe qonojel.

² Ri taqanik che ukojom ri Jehová kilitaj pa ri pixabʼ che xuya chke ri Adán y ri Eva pa ri kotzʼiʼjalaj Edén. E areʼ rajawaxik riʼ kekʼojiʼ chuxeʼ ri utaqanik ri Dios y keniman che, y ri e chikop kekʼojiʼ riʼ chuxeʼ ri kitaqanik (Gén. 1:28; 2:16, 17). We knimax ri Dios kkʼojiʼ cholajil riʼ y jamaril pa ri uwach Ulew. Ri apóstol Pablo xchʼaw chrij ri taqanik che ukojom ri Dios are chiʼ xubʼij: «Kwaj kʼut kiwetaʼmaj chi ri Cristo are ri kijolom ri achijabʼ chkijujunal, ri achi are ujolom ri rixoqil, ri Dios kʼut are ujolom ri Cristo» (1 Cor. 11:3). Wariʼ kraj kubʼij che xaq xiw ri Jehová kʼo ta ktaqan puwiʼ.

³ Kʼi chke ri winaq kkinimaj ta ri utaqanik ri Jehová. ¿Jasche? Rumal che ri e nabʼe qatat qanan xkinimaj ta ri Dios y xkixutuj ri utaqanik (Gén. 3:4, 5). ¿La más xkiriq utzilal? Je taj: xa xeʼux upatanelabʼ ri Satanás y xeʼux ukʼulel ri Dios (Col. 1:21). Rumal wariʼ, e kʼi chke ri winaq e kʼo chuxeʼ ri utaqanik ri Itzel (1 Juan 5:19).

⁴ Are chiʼ kqabʼan ronojel ri kubʼij ri Biblia kojel chuxeʼ ri utaqanik ri Satanás. Y kqakʼutu che are ri Jehová ktaqan pa qawiʼ are chiʼ kqajach ri qakʼaslemal che y kqabʼan qaqasanjaʼ. Junam kqanaʼ rukʼ ri qʼatal tzij David, ri areʼ xubʼij wariʼ chrij ri Jehová: «Nim na qʼij la chkiwach konojel» (1 Crón. 29:11). Rukʼ machʼachʼem kqaya ubʼixik: «¡Chichʼobʼoʼ chi Dios ri Ajawaxel; areʼ xujbʼanowik, uj kʼu rech; uj utinimit xuqujeʼ uj uchij re ri uyuqʼbʼal!» (Sal. 100:3). Kqachʼobʼo che sibʼalaj nim uqʼij ri Jehová y xaq xiw areʼ taqalik kojniman che, rumal che are ri Bʼanol re ronojel ri jastaq (Apoc. 4:11). Ri oj upatanelabʼ ri Dios kqesaj uwach ri Jesús che xunimaj ri Jehová pa ronojel ri jastaq.

⁵ Hebreos 5:8 kubʼij wariʼ chrij ri Jesús: «Xretaʼmaj ri nimanik rumal ri kʼax ri xuriqo». Xunimaj ri uTat che kʼo pa ri kaj paneʼ xuriq kʼi taq kʼax. Are ta ri uchomanik xukʼutu y xubʼan ta ri jastaq pa rech wi rech kyaʼ uqʼij kumal ri winaq (Juan 5:19, 30; 6:38; 7:16-18). Ri areʼ sibʼalaj xkikotik are chiʼ xunimaj ri uTat, paneʼ xtereneʼx kumal ri e ukʼulel (Juan 15:20). Xmachʼachʼik y xunimaj ri xubʼij ri uTat kʼa pa ri ukamikal, jun kʼaxalaj kamikal. Rumal che ri Jesús xnimanik xuya unimal uqʼij ri Jehová, kqariq na jun kʼaslemal che kʼo ta ukʼisik y xyaʼ más eqeleʼn che más kʼo na chuwach ri kʼo rukʼ nabʼe (Filip. 2:5-11; Heb. 5:9).

NIM CHQILAʼ RI TAQANIK CHE UKOJOM RI JEHOVÁ PA RONOJEL RI JASTAQ CHE KQABʼANO

⁶ Are chiʼ kqanimaj ronojel ri utaqanik ri Jehová y kqabʼan ri urayibʼal, kojutoʼo rech kqanaʼ ta xibʼin ibʼ y kqariq ta ri kʼax che kkiriq konojel ri winaq che kkixutuj ri utaqanik ri Jehová. Ri qakʼulel, ri Itzel, kuxlan ta che ubʼanik kʼax y kraj kusachisaj qawach. ¿Jas kqabʼan che uchajixik qibʼ chuwach? Ko kojtakʼiʼk y rukʼ machʼachʼem kqanimaj ri taqanik che ukojom ri Jehová (Mat. 6:10, 13; 1 Ped. 5:6-9).

⁷ Ri Cristo are ri Kʼamal bʼe puwiʼ ri congregación y uyaʼom taqanik pa uqʼabʼ «ri jikalaj pataninel, utz uchomanik». Uchʼobʼik wariʼ kʼo kubʼan pa ri qakʼaslemal, ri kqabʼan che kilik ri e nikʼaj chik y che upatanixik ri Dios. Ri keniman che ri taqanik che ukojom ri Dios pa ri congregación kkibʼan ronojel ri kubʼij chke: kkitzijoj ri utzij, amaqʼel kebʼe pa ri e riqbʼal ibʼ, kkibʼan ri chak che kyaʼ chke pa ri e riqbʼal ibʼ y kkiya ri kicomentarios, kkiya kitobʼanik chke ri e kʼamal taq bʼe y che ri utinamit ri Jehová (Mat. 24:45-47; 28:19, 20; Heb. 10:24, 25; 13:7, 17).

⁸ Ri ubʼantajik ri Jehová kilitaj pa ri congregación. We amaqʼel nim kqil wi ri utaqanik ri Dios kqariq jamaril, kqariq ta kʼax y kʼo cholajil riʼ pa ri congregación (1 Cor. 14:33, 40). Ri qʼatal tzij David xrilo che ri kkiriq ri winaq che keniman che ri Dios junam ta rukʼ ri kkiriq ri keniman ta che, xubʼij wariʼ: «¡Utz rech ri tinimit ri are uDios ri Ajawaxel!» (Sal. 144:15). ¿La mat qastzij che jewaʼ kqabʼij oj?

⁹ Chanim chojtzijon chi chrij ri familia. Ri apóstol Pablo xubʼij wariʼ: «Ri achi are ujolom [kʼamal bʼe] ri rixoqil». Xuqujeʼ xubʼij che ri kʼamal ubʼe ri achi are ri Cristo y ri kʼamal ubʼe ri Cristo are ri Dios (1 Cor. 11:3). Rumal laʼ ri ixoq rajawaxik kuya ribʼ pa taqik che ri rachajil (Efes. 5:22-24). Y ri alkʼwalaxelabʼ rajawaxik keniman chke ri kitat kinan (Efes. 6:1). Kʼo jamaril pa ri familia are chiʼ konojel keniman che ri taqanik che ukojom ri Jehová.  

¹⁰ Ri achi rajawaxik kresaj uwach ri Cristo, che rukʼ loqʼoqʼebʼal kuya taqanik. Utz kubʼan che uyaʼik taqanik: kuya ta uwiʼ ri taqanik che kʼo pa uqʼabʼ y kʼo ta jun mul mat kukʼam ubʼe ri ufamilia (Efes. 5:25-29). Are chiʼ jewaʼ kubʼano, ri ufamilia kʼax ta kuriq che unimaxik. Ri ixoq kuya tobʼanik che ri rachajil (Gén. 2:18). We kʼo upaciencia ri ixoq, kutoʼ ri rachajil y nim kril wi, kubʼano che kloqʼoqʼex rumal ri rachajil y ri ubʼantajik kuya uqʼij ri Jehová (1 Ped. 3:1-4). Ri e tat nan che kkinimaj ri taqanik che uyaʼom ri Jehová kkiya jun utzalaj kʼutbʼal chkiwach ri e kalkʼwal.

¹¹ Ri taqanik che uyaʼom ri Jehová xuqujeʼ kʼo ubʼanik rukʼ ri kqabʼan che kilik «ri qʼatal taq tzij» che «are ri Dios e taqowinaq» (Rom. 13:1-7). Ri oj cristianos kqanimaj ri e taqanik che kkiya ri e qʼatbʼal tzij y kqatoj ri alkabʼal; kqaya «che ri César ri rech ri César; che ri Dios ri rech ri Dios» (Mat. 22:21). Xuqujeʼ are chiʼ kqatzijoj ri utzij ri Dios pa ri territorio are kqanimaj ri taqanik che kiyaʼom ri e qʼatbʼal tzij pa ri tinamit che uchajixik ri datos ke ri winaq. Kojniman chke ri e qʼatbʼal tzij, are kʼu keqanimaj taj we kojkitaq che ubʼanik jastaq che utz ta kril ri Dios. Je wariʼ, kʼo ta kojqʼaten che utzijoxik ri utzij ri Dios (Mar. 13:10; Hech. 5:29).

¹² Ri oj cristianos kqanimaj ri utaqanik ri Jehová pa ronojel ri kqabʼano. Y ri qakojonik kojutoʼ che rilik ri qʼij are chiʼ konojel ri winaq kkichʼobʼ na uwach ri Jehová y che xaq xiw areʼ ktaqan pa kiwiʼ konojel y keniman na che. ¡Sibʼalaj kojkikot riʼ! (1 Cor. 15:27, 28).