Lücas
2 Tsë witsanmi Römata gobernaq* Augustu, llapan nunakuna inscribikuyänampaq mandakurqan. 2 Tsë punta kaq censuqa karqan Siriachö Quiriniu gobernador këkaptinmi. 3 Y llapan nunakunam yuriyanqan markaman inscribikoq ëwayarqan. 4 Tsëmi Josëpis+ Davidpa kastan karnin Galilëa provinciachö Nazaret markapita, Judëa provinciachö Belen niyanqan Davidpa markanman ëwarqan.+ 5 Y ishkan parlayanqannö casakushqana karmi Marïawan inscribikoq ëwarqan,+ tsë witsanqa Marïapa wamranqa yurinampaqnam këkarqan.+ 6 Tsëchö këkäyaptinmi wamran yurinan hörana karirqan. 7 Tsëchömi mayor kaq wamran yurirqan,+ y posadakuyänampaq sitiu mana kaptinmi vendanö tëlakunawan wankurkur animalkunata qarayänanllaman punuykatsirqan.+
8 Tsë kinrë sitiukunachömi paqaspa üshankunata täpar mitsikoqkuna këkäyarqan. 9 Tsënam, Teyta Jehoväpa* angelnin puntankunachö illaqpita yurirkuptin, Jehoväpa* podernin entëru lädunkunachö chipapëkurqan, y pëkunaqa alläpam mantsakäyarqan. 10 Peru angelqa kënömi nirqan: “Ama mantsakäyëtsu. Rikäyë, llapan nunakunata kushitsinampaq kaq alli noticiakunatam qamkunata willayaq. 11 Kanan junaqmi salvayäshoqniki+ Señor Cristu+ Davidpa markanchö yurishqa.+ 12 Kë señalmi reqiyänëkipaq yanapayäshunki: juk llullutam tariyanki animalkunata qarayänanchö vendanö tëlakunawan wankushqa punuykaqta”. 13 Tsëpitanam, tsë angelpa lädunman mëtsikaq angelkuna illaqpita yurirkur+ Teyta Diosta alabar kënö niyarqan: 14 “Ciëluchö Teyta Dios alabashqa katsun, y patsachö pëpa rikëninchö alli këkaqkuna yamë kayätsun”.
15 Pëkunata dejëkur angelkuna ciëluman kutikuyaptinnam mitsikoqkunaqa kënö ninakuyarqan: “Imanö kaptimpis, aku kanan höra Belenta ëwashun, y Teyta Jehovä* willamanqantsiknö ima pasanqanta rikämushun”. 16 Y tsë höra ëwarmi, Marïata, Josëta y animalkunata qarayänanchö punuykaq llulluta tariyarqan. 17 Tsënam tsë llullupaq angel ima ninqanta willakuyarqan. 18 Tsë mitsikoqkuna willakuyanqanta wiyaqkunaqa alläpam espantakuyarqan. 19 Marïaqa llapan niyanqantam yarpararqan, y shonqunchömi tsëkunaman pensar karqan.+ 20 Tsënam mitsikoqkunaqa, llapan rikäyanqan y wiyayanqan angel willanqannölla kaptin, Teyta Diosta agradecikur y alabar kutikuyarqan.
21 Tsëpita puwaq junaq pasariptinnam, ishpakunampa puntanchö wamrankunata señalatsiyänanna kaptin,+ manaraq qeshyaq tikraptin Marïata angel ninqannölla Jesus nirnin jutin churayarqan.+
22 Moises qellqanqan Ley mandakunqannö+ Diospa rikëninchö limpiu kayänampaq tiempuna kaptinmi, Jerusalenman llulluta apayarqan Teyta Jehoväpa* rikëninman, 23 Jehoväpa* Leyninchö, “mayor ollqu wamrëkikunam Teyta Jehoväpaq* kanan” nir qellqaranqannö.+ 24 Pëkunaqa Teyta Jehoväpa* Leynin ninqannöllam, “ishkë kullkushta o ishkë llullu palumata” Diospaq apayarqan.+
25 Jerusalenchömi alli kaqta ruraq y Diosta sirweq Simeon jutiyoq nuna karqan, pëqa Israel nunakunata Teyta Dios yanapanan tiemputam shuyëkarqan,+ y pëtaqa santu espïritum imëkachöpis yanapaq. 26 Y Jehoväpa* Cristunta manaraq rikarqa mana wanunampaq kaqtam, Teyta Diosqa santu espïritunwan musyatsishqa karqan. 27 Pëmi santu espïritu pushaptin templuman yëkurqan, y Ley ninqannö rurayänampaq papäninwan maman Jesusta yëkaratsiyaptinmi,+ 28 wamrata mellqarkur Teyta Diosta alabar kënö nirqan: 29 “Llapanta Gobernaq Teytallä, kananqa ninqëkinöllam sirwishoqniki yamë+ wanukunanta o wañukunanta dejëkanki. 30 Piwan salvacionta apamunëkipaq kaqtam kanan rikarqö,+ 31 y kananqa llapan nunakunam mandamunqëki kaqta rikäyanqa.+ 32 Pëqa aktsinö+ karmi nunakunapa nawin tsaparaqta ushakätsinqa,+ y përëkurmi akranqëki Israel nunakuna väleqpaq churashqa kayanqa”. 33 Wamrapaq allikunata parlayanqanta wiyarmi, papäninwan mamäninqa alläpa espantakuyarqan. 34 Y Simeonqa ishkanta bendicïkurmi wamrapa maman Marïata kënö nirqan: “Wiyaramë, kë wamrarëkurmi Israelpita mëtsikaq nunakuna ishkiyanqa+ y mëtsikaqmi sharkuyanqa,+ y pëpaqmi mana allita parlayanqa.+ 35 Tsënöqa kanqa imata pensayanqanta nunakuna cläru rikätsikuyänampaqmi, y qamqa jatun espädawan tuksïkuyäshuptikinömi shonquykichö llakikunki”.+
36 Tsëchömi Aser kastapita Fanuelpa warmi tsurin Diospa willakoqnin Änapis këkarqan. Tsë warmiqa chakwannam karqan, y casakunqampitaqa qanchis watallam qowanwan o runanwan* kawashqa karqan. 37 Tsë witsampaqqa ochenta y cuatru watayoq viuda warminam karqan. Pëqa imëpis templuchömi këkarqan, ayunar y rogakurmi paqasta junaqta Teyta Diosta sirweq. 38 Pëqa tsë höram pëkunaman witïkur Diosta agradecikurqan, y Jerusalenta Teyta Dios salvananta shuyëkaqkunatam tsë wamrapaq parlaparqan.+
39 Tsëpitanam Teyta Jehoväpa* Leynin ninqannölla llapanta rurëkur,+ Galilëa provinciachö Nazaret markankunaman kutiyarqan.+ 40 Wamraqa jatunyarmi mas kallpayoq y mas yachëyoqna karqan. Teyta Diospa rikëninchöqa imëpis allim këkarqan.+
41 Papäninwan mamäninqa cada watam Pascua Fiestapaq Jerusalenta ëwayaq.+ 42 Döci watayoqna këkaptimpis, imëpis rurayanqannömi Pascua Fiestapaq Jerusalenta ëwayarqan.+ 43 Pascua Fiesta ushariptinmi markankunata kutikäyarqan, peru papäninwan mamänin cuentata mana qokuyanqanyaqmi Jesusqa Jerusalenchö quedakushqa kanaq. 44 Juntu ëwëkäyanqan grüpuchö këkanqanta pensarmi, juk junaq ëwananta ëwëkar-raq kastankunachö y reqinakushqankunachö wamrata ashir qallëkuyarqan. 45 Mana tarïkurnam, Jerusalenman kutir wakchö këchö ashiyarqan. 46 Y kima junaqtam, yachatsikoqkunapa chowpinchö* pëkunata wiyar y tapupar templuchö këkaqta tariyarqan. 47 Llapan wiyaqninkunam imëkatapis alli entiendinqanta y imanö contestanqanta wiyar alläpa espantakuyaq.+ 48 Rikëkurnam papäninwan mamäninqa alläpa espantakuyarqan, y mamäninmi nirqan: “Hïju, ¿imanirtan këta rurayämarqunki? Papänikiwan noqaqa alläpa yarpachakurmi wakchö këchö ashiyarqoq”. 49 Peru pëqa kënömi nirqan: “¿Imanirtan ashikäyämarqunki? ¿Manaku musyayarqëki Teytäpa wayinchö kanäpaq kaqta?”.+ 50 Tsënö kaptimpis, pëkunaqa manam tsënö ninqanta entiendiyarqantsu.
51 Tsëpitanam papäninkunawan Nazaretman kutikur, pëkunata llapanchö cäsukur sïguirqan.+ Y mamäninqa tsë llapan wiyanqantam shonqunchö yarpararqan.+ 52 Jesusqa jatunyarmi sïguirqan y mas yachëyoqmi tikrarqan, Teyta Diospa y nunakunapa rikëninchöpis allim këkarqan.