Isaïas
3 Llapanta gobernaq Señor
y angelkunata mandaq Teyta Jehovä
Jerusalenchö y Judächö nunakunata
imawampis manana yanapaptinmi
mikuyninkuna ni yakunkunapis kanqanatsu.+
2 Manam kanqanatsu puëdeq nunakuna,
pelyëta yachaq nunakuna, juezkuna, willakoqkuna,+
shamoq tiempuchö pasakunampaq kaqta willakoqkuna, dirigeqkuna,
3 cincuenta nunakunata dirigeqkuna,+
respetashqa nunakuna, consejakoqkuna,
magia rurëta yachaqkuna ni brujerïa rurëta yachaqkuna.+
4 Gobernadornikikunapis jövinkunallam kayanqa,
y jukta jukta rurëta munaqkunam* gobernayäshunki.
5 Nunakunapis jukninkuna jukninkunam mana alli tratanakuyanqa.+
Jövinkunapis awkinkunatam mana allipa parlapäyanqa,
y mana reqishqa nunakunam
reqishqa nunakunata respetayanqatsu.+
6 Cada ünum papänimpa wayinchö kastankunata,
“qampaqa jana röpëki kanmi qam gobernayämë,
kë ushakëkaq sitiuta gobernë” niyanqa.
7 Peru tsënö niyanqan junaqmi pëqa kënö ninqa:
“Noqaqa manam qamkunapa herïdëkikunata vendamushaqtsu,*
y wayïchöpis manam mikuy ni röpa kantsu.
Ama kë markachö nunakunata gobernanäpaq niyämëtsu”.
8 Jerusalenpita y Judäpita nunakunaqa,
Teyta Diospa rikëninchömi mana alli këkäyan.
Awmi, parlayanqanwan y rurayanqanwanmi
Teyta Jehoväpa contran këkäyan,
y Teyta Diospa rikëninchömi mana cäsukoq kayan.+
9 Imanö kayanqanqa cärankunachömi cläru rikakun,
y Sodömapita+ nunakunanömi jutsata* rurayanqampita
mana penqakushpa parlayan. ¡Allaw tsë nunakuna!
Tsënö kayanqampitaqa kikinkunam mana allichö ushayanqa.
10 Alli kaqllata ruraqkunata niyë,
imata rurayanqampis alli yarqunampaq kaqta.
Pëkunaqa alli kaqta rurayanqampitam bendicishqa kayanqa.+
11 ¡Allaw mana allita ruraq nunakuna!
Pëkunaqa mana allichömi ushayanqa.
Nuna mayinkunata tratayanqannöllam pëkunatapis rurayanqa.
12 Kuyanqä nunakunataqa mandakoqninkunam mana allipa tratayan,
y pëkunataqa warmikunam gobernayan.
Kuyanqä nunakuna, gobernadornikikunaqa
manam shumaqtsu pushayäshunki.
Pëkunapa culpanmi mëpa ëwayänëkipaq kaqtapis musyayankitsu.+
13 Teyta Jehoväqa nunakunata juzganampaqmi listuna këkan
y mëtsë markakunata ima pasanampaq kaqta
willakunampaqmi jamakunqampita sharkushqa.
14 Teyta Jehoväqa sirweqninkunapa dirigeqninkunata
y gobernadorninkunatam juzganqa.
“Qamkunaqa üvas chakrätam* ninawan ushakätsiyarqunki,
y waktsakunata suwapäyanqëkitam wayikikunachö katsiyanki.+
15 ¿Ima derëchuwantan sirwimaqnïkunata sufritsiyanki
y waktsakunata mana alli tratayanki?”+ ninmi Llapanta Gobernaq Señor
y angelkunata mandaq Teyta Jehovä.
16 Teyta Jehoväqa kënöpis ninmi:
“Sionpita warmikunaqa allish tukurmi
ñukïkachar* purir pï mëta qemtsipäyan.
Wakinkuna rikäyänampaqmi chakinkunachö adornukunata
shaqllallatsir churëllapa puriyan.
17 Tsëmi Teyta Jehoväqa, tsë warmikunapa
peqankunachö o umankunachö mëtsika qerita yuritsinqa.
Tsënömi Teyta Jehoväqa aqtsankuna shikwananta permitinqa.+
18 Tsë tiempuqa Teyta Jehovämi llapan adornunkunata ushakätsinqa:
chakinkunaman churakuyanqan pulsërakunata,
peqankunaman o umankunaman churakuyanqan cintata,
llullu killa niraq adornunkunata,+
19 zarcillunkunata,* pulsërankunata, cära tsapakuyänanta,
20 peqankunaman o umankunaman churakuyanqan adornukunata,
chakinkunaman churakuyanqan cadënakunata,
pëchunkunaman churakuyanqan wachukukunata,
perfümi winakuyänanta, wayrurunkunata,*
21 sortijankunata, senqankunaman churakuyanqan argöllakunata,
22 shumaq vestïdunkunata, röpankuna jananman churakuyanqanta,
jana röpankunata, bolsankunata,
23 espëjunkunata,+ lïnupita röpankunata,*
peqa o uma wankukuyänanta y cära tsapakuyänanta.
24 Kanan shumaq pukutaq o mushkoq aceitillana
pukutarpis o mushkurpis,+ imapis ismushqanömi asyäyanqa.
Kanan corrëankuna kaptimpis, waskallawannam watakuyanqa.
Kanan shumaq naqtsapäkurpis, aqtsannaqmi quedayanqa.+
Kanan shumaq röpata vistikurpis, chukru tëlallatanam vistikuyanqa.+
Kanan shumaqllan karnimpis, achachëkaq fiërruwan marcashqanömi quedayanqa.
25 Ollqukunatapis espädawanmi wanutsiyanqa o wañutsiyanqa
y pelyëta yachaq puëdeq nunakunapis guërrachömi wanuyanqa.+