Josuë
23 Chikeqninkunapita salvarirmi, Jehovä Diosqa permitirqan israelïtakuna tranquïlu kawakuyänanta.+ Tsëpitaqa atska tiempunam pasashqa karqan y Josuëqa awkinnam karqan.+ 2 Tsënam Josuëqa llapan israelïtakunata,+ autoridäkunata, dirigeqkunata, juezkunata y oficialkunata qayëkatsir+ kënö nirqan: “Pasëpa* awkinnam kä. 3 Y qamkunaqa clärum rikäyarqunki cuidayäshurniki Jehovä Diosnintsik tsë llapan nacionkunata vencinqanta. Kikin Jehovä Diosnintsikmi qamkunata yanapayäshurniki pelyashqa.+ 4 Noqaqa Jordan mayupita* qallëkur hasta inti o rupay jeqanan läduchö Jatun lamaryaqmi,* ushakätsinqantsik+ nunakunapa markankunata y manaraq ushakätsinqantsik+ nunakunapa markankunatapis cada kastata sorteupa entregayarqoq.+ 5 Teyta Jehoväqa tsë markakunachö kawaq nunakunatam qarqurqan.+ Y qamkunaqa, Teyta Jehovä äniyäshunqëkinömi tsë markakunapa duëñun tikrayarqunki.+
6 Kananqa, Moises qellqanqan libruchö Teyta Diospa Leyninta cäsukuyänëkipaq+ y cumpliyänëkipaqmi valienti kayänëki. Tsë libruchö llapan mandakunqantam rurayänëki.+ 7 Y tsë markakunachö kawaq nunakunawanqa manam imëpis juntakäyänëkitsu.+ Y manam santunkunapa jutinta parlayänëkitsu,+ ni tsë santukunapa jutinchö imatapis änikuyänëkitsu. Ni manam tsë santukunaman qonqurikuyänëkitsu ni tsëkunata sirwiyänëkitsu.+ 8 Tsëpa rantinqa, kananyaq rurëkäyanqëkinömi Jehovä Diosnintsiktaqa imëpis dejayänëkitsu.+ 9 Kanan junaqyaqqa, manam ni pillapis venciyäshurqunkitsu.+ Tsënöllam Jehovä Diosqa, tsë markakunachö mëtsikaq y puëdeq nunakunatapis puntëkikunapita qarqunqa.+ 10 Jehovä Diosnintsikqa, äniyäshunqëkinömi+ yanapayäshurniki pelyanqa.+ Qamkunaqa, jukllaqllam mil nunakunata venciyanki.+ 11 Tsëmi Jehovä Diosnintsikta imëpis kuyayänëki.+
12 Peru Teyta Diosnintsikta dejarir tsë markakunachö nunakunawan juntakäyaptikiqa,+ y ollqu o warmi wamrankunawan casakuyaptikiqa,+ 13 manam Jehovä Diosnintsik yanapayäshunkinatsu ni tsë markakunachö nunakunata qarqunqanatsu.*+ Y pëkunam trampa cuenta, chikuti cuenta y nawikikunachö kasha cuenta qamkunapaq kayanqa.+ Tsëmi Teytantsik Jehovä entregayäshunqëki alli wayoq patsachöqa ni jukllëllapis quedayankitsu.
14 Kananqa wanukunäpaqnam këkä. Y qamkunaqa llapan shonquykikunawan y llapan kawënikikunawanmi* musyayanki Jehovä Diosnintsik llapan äniyäshunqëkita cumplinqanta. Llapampis biennikikunapaqmi kashqa, y llapan äniyäshunqëkim cumplikashqa.+ 15 Imanömi Teyta Jehoväqa llapan äniyäshunqëkita cumplishqa,+ tsënöllam Jehovä Diosnintsikqa parlanqanta cumplirnin castigayäshunki, hasta Jehovä Dios entregayäshunqëki alli wayoq patsachö ushakäyanqëkiyaq.+ 16 Jehovä Diosnintsik mandayäshunqëkita mana cumpliyaptiki, santukunaman qonqurikuyaptiki y pëkunata sirwiyaptikiqa, Jehovä Diosmi castigayäshunki.+ Y manam entregayäshunqëki alli wayoq patsachöqa ni jukllëllapis quedayankitsu”.+