Mateu

13 Tsë junaqmi Jesusqa wayipita yarqurir qocha kuchunchö tëkarqan. 2 Y mëtsika nunakuna pëman chäyaptinmi barcuman ëwar jamakurirqan, y nunakunaqa qocha kuchunchömi këkäyarqan.+ 3 Tsënam igualatsikuykunawan imëkata yachatsikur+ kënö nirqan: “¡Këta wiyayë! Juk nunam murukoq ëwarqan.+ 4 Y maqtsikaptinmi wakin murukunaqa chakra kuchun näniman shikwayarqan, tsënam pishqukuna shamur mikukurkuyarqan.+ 5 Wakinnam mana alläpa allpayoq rumi rumi chakraman shikwayarqan, y janallachö karmi raslla o saslla jeqarkayämurqan.+ 6 Peru achachëwanmi wanukäriyarqan, y watsin o matsun* janallachö kaptinmi tsakiriyarqan. 7 Y wakinnam kashakuna rurinman shikwayarqan, y kashakuna winarmi pasëpa* tsaparkuyarqan.+ 8 Wakinnam alli allpaman shikwar alli wayuyarqan: wakin murum cien masta wayurqan, wakinnam sesenta masta y wakinnam treinta masta.+ 9 Wiyakuyta munaq kaqqa, shumaq wiyakutsun”.+

10 Tsënam qateqninkunaqa pëman witïkur kënö tapuyarqan: “¿Imanirtan nunakunata igualatsikuykunawan yachatsinki?”.+ 11 Jesusnam nirqan: “Qamkunataqa Teyta Diosmi yanapayäshunki Gobiernumpita sagrädu* noticiata entiendiyänëkipaq,+ peru pëkunataqa manam. 12 Imatapis entiendeqkunaqa mastam entiendiyanqa, y tiempuwanqa imëkatam entiendiyanqa, peru imatapis mana entiendeqkunataqa, ichikllata entiendiyanqantapis Teyta Diosmi qonqaskatsinqa.+ 13 Tsëmi pëkunataqa igualatsikuykunawan yachatsï. Pëkunaqa rikarpis manam imata entiendiyantsu, y wiyarpis manam imata yachakuyantsu. Awmi, ima ninan kanqantaqa manam entiendiyantsu.+ 14 Pëkunachömi Isaïas kënö willakunqan cumplikan: ‘Wiyarnimpis qamkunaqa manam entiendiyankitsu, y rikarnimpis manam imatapis yachakuyankitsu.+ 15 Kë nunakunaqa mana wiyayänampaq, mana rikäyänampaq, mana entiendikoq kayänampaq, Teyta Diosman mana kutiyänampaq y alliyätsinäta mana munarmi shonqunkunata chukruyätsiyashqa, rinrinkunata tsapayashqa* y nawinkunata wichqayashqa’.+

16 Peru qamkunaqa nawikikuna rikanqampita y rinrikikuna wiyanqampita kushikuyë.+ 17 Noqam qamkunata nï,* Teyta Diospa mëtsikaq willakoqninkuna y allita ruraq nunakunam rikäyanqëkita rikëta munayarqan, peru manam rikäyarqantsu,+ y wiyayanqëkitam wiyëta munayarqan, peru manam wiyayarqantsu.

18 Kananqa wiyayë tsë murukoq nunapaq igualatsikuy ima ninan kanqanta.+ 19 Pï nunapis Diospa Gobiernumpita wiyar ima ninan kanqanta mana entiendiptinqa, Diablu* shamurmi shonqunchö muruta ushakaskatsin.+ Tsëmi chakra kuchun näniman shikwaq muruwan igualan.+ 20 Mana alläpa allpayoq rumi rumi chakraman shikwaq murunam, Diospa palabranta wiyar jinan höra kushishqa chaskikoqkunawan igualan.+ 21 Peru watsin o matsun* janallachö kaptinmi, juk tiempu alli karirpis, Diospa palabranta cäsukunqanrëkur imëkata pasar o imëkata rurar sufritsiyaptinqa jinan höram creikunqanta dejarin. 22 Kashakuna rurinman shikwaq murunam, Diospa palabranta wiyakurpis, kanan witsanchö* imëkapaq yarpachakur+ y imëkayoq këta munar* wiyakuyanqanta qonqareqkunawan igualan, tsëmi imatapis wayuyantsu.+ 23 Y alli allpaman shikwaq murunam, Diospa palabranta wiyar ima ninan kanqanta entiendeqkunawan igualan. Pëkunaqa allim wayuyan: wakinmi cien masta, wakinnam sesenta masta, y wakinnam treinta masta”.+

24 Juk mas igualatsikuywanmi kënö yachatsikurqan: “Teyta Diospa Gobiernunqa chakranman alli muruta muroq nunawanmi igualan. 25 Nunakuna punuyanqanyaqmi chikeqnin ëwëkur, trïgu jananman mana alli qorapa* murunta maqtsïkur ëwakurqan. 26 Trïgu jeqamur espigar qallëkuptinnam, mana alli qorapis* cläru rikakurirqan. 27 Tsënam chakrayoq nunapa sirweqninkuna shamur kënö niyarqan: ‘Teytë, ¿manaku chakrëkimanqa alli muruta mururqëki? Tsëqa, ¿imanirtan mana alli qorayoq* këkan?’. 28 Pënam, ‘tsëtaqa chikikoq nunam rurashqa’+ nirqan. Tsënam sirweqninkunaqa, ‘¿munankiku ëwar tsë mana alli qorakunata* sutakacharkuyänäta?’ nir tapuyarqan. 29 Tsënam pëqa kënö nirqan: ‘Ama, capaz mana alli qorata* sutayanqëkichö trïgutapis sutariyankiman. 30 Dejëkuyë cosëcha witsanyaq juntu winayänanta, cosëcha witsannam segaqkunata nishaq, mana alli qorata* manöju manöju watëkur ninawan ushakätsiyänampaq, y tsëpitana gränu churakuna wayïman trïguta guardayänampaq’”.+

31 Juk mas igualatsikuywanmi kënö yachatsikurqan: “Teyta Diospa Gobiernunqa juk nuna chakranman murunqan mostäza murunömi.+ 32 Rasun kaqchöqa, tsë muruqa wakin murupitapis mas uchukllanllam, peru jeqamurqa huertachö wakin plantapitapis mas jatunmi, y jatun plantamanmi tikran, y pishqukuna shamurmi rämankunachö qeshunkuna rurayan y arwäkuyan o llantukuyan”.

33 Y juk mas igualatsikuywanmi kënö yachatsikurqan: “Diospa Gobiernunqa juk warmi kima medïda* harinawan pichunqan levadüranömi, y llapan masam poqurirqan”.+

34 Tsë llapantam Jesusqa igualatsikuykunawan nunakunata yachatsirqan. Rasumpa kaqchöqa, mana igualatsikuywanqa manam nunakunata yachatseqtsu.+ 35 Tsënöqa karqan Diospa willakoqnin kënö ninqan cumplikänampaqmi: “Igualatsikuykunawanmi parlapäyashqëki; qamkuna mana musyayanqëki unë witsanchö* pasanqankunatam willayashqëki”.+

36 Tsëpitanam nunakunata despachëkur wayiman yëkurqan. Tsënam qateqninkunaqa pëman ëwar, “chakrachö mana alli qorapaq* igualatsikuyta entiendïkatsiyämë” niyarqan. 37 Tsënam pëqa kënö nirqan: “Alli muruta muroqqa Nunapa Tsurinmi. 38 Chakranam, kë munduchö nunakuna kayan.+ Alli murunam, Gobiernupa tsurinkuna kayan; y mana alli qoranam,* Diablupa* tsurinkuna kayan.+ 39 Mana alli qorata muroq chikikoqqa Diablum. Cosëchanam, ushanan tiempu,* y cosechaqkunanam angelkuna kayan. 40 Tsëmi mana alli qorata* sutaskir ninawan ushakätsiyanqannölla, ushanan tiempuchöpis* pasanqa.+ 41 Nunapa Tsurinmi angelninkunata mandamunqa, y pëkunam wakinkunata jutsaman* ishkitseqkunata y mana allita ruraq nunakunata Gobiernumpita rakïkur 42 rawrëkaq o lunyëkaq hornuman jitarkuyanqa.+ Tsëchömi waqayanqa, y cölerarmi kirunkunatapis ruchuchütsiyanqa. 43 Tsë witsanmi allita ruraqkunaqa Teytankunapa Gobiernunchö intinöraq o rupaynöraq chipapäyanqa.+ Wiyakuyta munaq kaqqa, shumaq wiyakutsun.

44 Teyta Diospa Gobiernunqa, chakrachö pamparëkaq örunömi, y tsëtam juk nuna tarikurqan. Tsë nunaqa yapë pakëkurmi alläpa kushikur imëkanta rantikuykur tsë chakrata rantirqan.+

45 Teyta Diospa Gobiernunqa alli kaq perlaskunata asheq negocianti nunanömi. 46 Tsë nunaqa alläpa väleq perlasta tarïkurmi, jinan höra imëkanta rantikuykur tsë perlasta rantirqan.+

47 Teyta Diospa Gobiernunqa lamarman jitayanqan tukuyläya pescädukunata tsareq* jatun mällanömi. 48 Pescädukuna juntariptinnam lamar kuchunman sutayämurqan, y jamëkurmi alli kaqkunata canastaman winayarqan,+ y mana alli kaqkunatanam jitariyarqan.+ 49 Tsënömi ushanan tiempuchöpis* pasanqa. Angelkuna yarqamurmi allita ruraq nunakunapita, mana allita ruraqkunata rakïkur 50 rawrëkaq o lunyëkaq hornuman jitarkuyanqa. Tsëchömi waqayanqa, y cölerarmi kirunkunatapis ruchuchütsiyanqa.

51 ¿Entiendiyarqunkiku kë llapan ima ninan kanqanta?”. Pëkunanam, “awmi” niyarqan. 52 Tsënam pëqa kënö nirqan: “Tsënö karqa, Teyta Diospa Gobiernumpita yachakushqa yachatsikoqkunaqa, imëka väleqninkunapita makwa kaqkunata y mushoq kaqkunata jipimoq familianta dirigeq nunanömi”.

53 Kë igualatsikuykunawan yachatsikuskirmi Jesusqa tsëpita ëwakurqan. 54 Markanman chëkurnam+ Teyta Diosta adorayänan wayichö yachatsikurqan. Tsëmi nunakunaqa alläpa espantakur kënö niyarqan: “¿Mëchötan kë nunaqa tsëkunata yachakushqa, y kë milagrukunata* ruranampaq poderta chaskishqa?+ 55 ¿Manaku pëqa carpintërupa tsurin?+ ¿Manaku mamänimpa jutinqa Marïa, y wawqinkunapana Santiägu, Josë, Simon y Jüdas?+ 56 Paninkunapis, ¿manaku kë markantsikchö kawayan? Tsëqa, ¿mëchötan kë nunaqa tsë llapanta chaskishqa?”.+ 57 Tsënö nirmi pëman creita munayarqantsu.+ Tsënam Jesusqa kënö nirqan: “Diospa willakoqnintaqa mëchöpis respetayanmi, peru markanchö y wayinchöqa manam”.+ 58 Y mana markäkoq o yärakoq kayaptinmi tsëchöqa juk ishkë milagrukunallata* rurarqan.