Apocalipsis
18 Tsëpitanam alläpa autoridäyoq angelta ciëlupita urëkamoqta rikarqä, y chipapanqanwanmi entëru patsata atsikyäratsirqan. 2 Pëmi fuertipa kënö nirqan: “¡Venciriyashqam! ¡Alläpa Puëdeq Babiloniatam venciriyashqa!+ Kananqa demoniukuna pärayänan sitiuman, y mana limpiu espïritukuna* y mana limpiu y chikishqa pishqukuna pärayänan sitiumanmi tikrashqa.+ 3 Pëqa llapan nacionkunatam oqllanakur melanëpaqkunata rurëta* löcuyëpa* munanqan vïnuta uputsishqa;+ pëwanmi patsachö gobernaqkunaqa oqllanakur melanëpaqkunata rurayarqan,+ y imëka jananchö mana penqakushpa kawaptinmi, patsachö negociantikunapis* rïcu tikrayarqan”.
4 Y jukna ciëlupita kënö ninqantam wiyarqä: “Pëpa jutsankunapita* mana culpayoq këta munar y castïgunkunata mana chaskita munarqa,+ tsëpita yarqukuriyë kuyë sirwimaqnïkuna.+ 5 Jutsankunaqa* ciëluman chanqanyaqmi montonakashqa,+ y Teyta Diosmi mana allikunata rurayanqanta* yarpärishqa.+ 6 Wakinkunata ruranqannölla kikintapis rurayë.+ Awmi, jukkunata ruranqanta ishkë kuti kikinta rurayë.+ Upunampaq kaqta alistanqan cöpachö,+ upunampaq alistanqanta ishkë kuti alistayë.+ 7 Kikinta väleqpaq churakunqanmannö y mana penqakushpa imëka jananchö kawanqanmannö, sufritsir llakitsiyë. Pëqa shonqunchömi kënö nir këkan: ‘Noqaqa gobernar täkunanchö jamarëkaq gobernaqmi kä; manam viudatsu kä, y manam imëpis llakishqatsu kashaq’.+ 8 Pëta juzgaq Jehovä* Diosqa alläpa puëdeqmi.+ Tsëmi llapan castïgumpis, awmi, wanuypis, llakikuypis y mallaqëpis juk junaqllachö pëman chanqa y ninawanmi ushakätsiyanqa.+
9 Pëta ushakätseq ninapita yarqoq qoyëta o qoshnita rikarmi, pëwan oqllanakur melanëpaqkunata ruraq* y mana penqakushpa imëka jananchö pëwan kawaq patsachö gobernaqkunaqa, waqar y alläpa llakikur pëchunkunata kutakuyanqa. 10 Pëpa sufrimientunta mantsarmi, pëkunaqa karullachö shäräyanqa,* y kënö niyanqa: ‘¡Allaw! ¡Allaw qam reqishqa marka,+ alläpa puëdeq Babilonia marka! ¡Juk hörallachömi castigashqa* karqunki!’.
11 Manam tsëllatsu, pëkuna llapan rantikuyanqanta rantinampaq manana ni pï kaptinmi, patsachö negociantikunapis përëkur waqayanqa y llakikuyanqa. 12 Awmi, mananam ni pï rantinqanatsu pëkuna rantikuyanqan öruta, plätata, shumaq rumikunata, perlaskunata, alli kaq lïnu tëlata, granäti tëlata, sëdata, chipapaq puka tëlata; shumaq pukutaq o mushkoq qerukunapita rurayanqanta, y marfilpita y shumaq qerukunapita, cobripita, fiërrupita y marmolpita imëka rurayanqanta; 13 canëlata, Indiapita pukutaq o mushkoq plantakunata, inciensuta, perfümita, yuraq inciensuta, vïnuta, aceiti de olïvata, allin kaq harinata, trïguta, wäkakunata, üshakunata, cawallukunata, carrëtakunata, sirwipakoqkunata y nunakunapa vïdankunata. 14 Awmi, alläpa munanqëki imëka allikunaqa* manam qampanatsu, y munapëpaqkunata y alläpa shumaqkunata rantikuyanqampis, manana imëpis kutiyämunampaqmi qampita ëwakuyashqa.
15 Tsëkunata rantikoq negociantikunaqa, awmi, përëkur rïcu tikraqkunaqa, pëpa sufrimientunta mantsarmi karullachö shäräyanqa,* y waqar y llakikurmi 16 kënö niyanqa: ‘¡Allaw! ¡Allaw, alli kaq lïnupita röpawan, granäti röpawan y chipapaq puka röpawan vistikoq, y örupita mëtsika adornukunawan, shumaq rumikunawan y perlaskunawan adornakoq reqishqa marka!+ 17 ¡Juk hörallachömi tsë imëka väleqkuna ushakäyashqa!’.
Y barcuchö mandakoqkuna, lamarpa viajaqkuna, barcuchö trabajaqkuna y lamarchö trabajar vïdata pasaqkunam karullachö shäräyarqan.* 18 Y pëta ushakätseq ninapita yarqoq qoyëta o qoshnita rikarmi, fuertipa kënö niyaq: ‘¡¿Ima markataq kë reqishqa markanö?!’. 19 Pëkunaqa peqankunaman o umankunaman allpata jicharmi, waqar y llakikur fuertipa kënö niyaq: ‘¡Allaw! ¡Allaw imëka väleqkunayoq kanqanrëkur, lamarchö barcuyoqkuna rïcu tikrayanqan reqishqa marka! ¡Juk hörallachömi pasëpa* ushakashqa!’.+
20 ¡Ciëlu, pëta pasanqampita kushikuy!+ ¡Qamkunapis kushikuyë limpiu nunakuna,+ apostolkuna y Diospa willakoqninkuna! Teyta Diosqa qamkunarëkurmi pëman juiciuta apamushqa”.*+
21 Y alli kallpayoq angelmi, jatun mulinu rumi niraq rumita pallarkur,* kënö nir lamarman jitarkurqan: “Kënö rasllam o sasllam alläpa puëdeq Babilonia markata ushakätsiyanqa,* y manam yapëqa ni pï rikanqanatsu.+ 22 Arpata tocar cantayanqan, müsicata tocayanqan, flautata tocayanqan o trompëtata tocayanqanqa manam qamchö imëpis wiyakanqanatsu. Ima oficiuchö trabajaqkunapis manam qamchö imëpis kanqanatsu. Mulinu rumi waqanqampis manam qamchö imëpis wiyakanqanatsu. 23 Ima chiwchi aktsinqampis manam qamchö imëpis aktsinqanatsu, y noviu o novia parlanqampis manam qamchö imëpis wiyakanqanatsu. Negociantikikunaqa patsachö mas väleq nunakunam kayarqan, y brujerïata rurarmi llapan nacion nunakunata engañarqunki.+ 24 Awmi, pëmi Diospa willakoqninkunapa, limpiu nunakunapa+ y patsachö wanutsiyanqan nunakunapa yawarnimpita culpayoq”.+