Jeremïas
40 Soldädukunata mandaq Nebuzaradan,+ Ramä markachö+ Jeremïasta libri dejanqanchömi, Teyta Jehoväqa Jeremïasta parlaparqan. Babiloniaman apëkäyanqan Judäpita y Jerusalenpita nunakunatawan juntum, Jeremïastapis cadenashqata apashqa karqan. 2 Tsëpitanam soldädukunata mandaqqa, Jeremïasta juk läduman apëkur kënö nirqan: “Jehovä Diosnikiqa, kë kinrë markakunata tsënö pasanampaq kaqtaqa willakushqanam karqan. 3 Jehoväpa rikëninchö jutsata* rurayanqëkipita y ninqankunata mana cäsukushqa kayaptikim, Jehoväqa ninqannölla kë imëka mana allikunata qamkunaman chätsimushqa. Awmi, tsërëkurmi këkunata pasëkäyanki.+ 4 Kanampitaqa manam cadenarankinatsu. Qampaq allinö kaptinqa Babiloniata ëwakushun, y noqam cuidashqëki. Peru Babiloniata mana ëwëta munarqa, ama shamuytsu. ¡Rikë! Kë entëru nacionmi libri këkan, munanqëki markachö täkunëkipaq”.*+
5 Jeremïas manaraq ëwakuptinmi Nebuzaradanqa kënö nirqan: “Safanpa willkan+ y Ahicampa tsurin+ Guedalïas këkanqanman kutikuy.+ Babiloniachö gobernaqqa, pëpa cargunmanmi Judächö markakunata churashqa. Y pë këkanqanchö marka mayikikunawan quedakuy, sinöqa munanqëki markaman ëwar tsëchö quedakuy”.
Tsënö nïkurmi soldädukunata mandaqqa, vïvirisnin y juk qarënin entreguëkur libri ëwakunanta dejarqan. 6 Tsëmi Jeremïasqa, Mizpächö+ këkaq Ahicampa tsurin Guedalïas kaqman ëwarqan y tsë nacionchö quedaq nunakunawanmi juntu täkurqan.*
7 Tsëpita tiemputanam, entëru nacionchö këkaq soldädukunata mandaqkuna y llapan soldädunkunaqa, Babiloniachö gobernaq, Ahicampa tsurin Guedalïaspa cargunman entëru nacionta churashqa kanqanta musyariyarqan. Tsënöllam waktsa kayaptin, Babiloniaman mana apayanqan ollqukunata, warmikunata y wamrakunatapis, pëpa cargunman churashqa kanqanta musyaskiyarqan.+ 8 Tsëmi Netanïaspa tsurin Ismael,+ Carëahpa tsurinkuna Johanan+ y Jonatan, Tanhümetpa tsurin Seräya, netofatïta Efäipa tsurinkuna, maacatïta nunapa tsurin Jezanïas+ y pëkunapa cargunchö soldädukuna, Mizpächö+ këkaq Guedalïas kaqman ëwayarqan. Y pëkunawanmi soldädunkunapis ëwayarqan. 9 Tsënam Safanpa willkan y Ahicampa tsurin Guedalïasqa, pëkunata y soldädunkunata jurar änirnin kënö nirqan: “Ama mantsayëtsu Caldëa nunakunapa sirweqnin këta. Babiloniachö gobernaqta sirwir kë nacionchö kawakuyë, y allim kawakuyanki.+ 10 Noqaqa Caldëapita nunakuna shayämuptin qamkunapa jutikikunachö parlapänäpaqmi, Mizpächö quedakushaq. Peru qamkunaqa vïnuta, usya witsanchö cosechayanqëki frütata y aceititam guardayänëki y këkäyanqëki markakunachömi quedakuyänëki”.+
11 Wakin judïukuna Judächö quedakuyänampaq, y pëkunata Safanpa willkan y Ahicampa tsurin Guedalïaspa cargunman Babiloniachö gobernaq churashqa kanqantam, Ammonpita, Moabpita, Edompita y wakin nacionkunachö këkaq judïukunapis musyariyarqan. 12 Tsëmi llapan judïukuna, mëtsë sitiuman qeshpir ëwakuyanqampita, Judä kinrë markakunaman kutiyämurqan. Awmi, Mizpächö këkaq Guedalïas kaqmanmi shayämurqan. Mëtsika vïnuta y usya tiempu cosechayanqan frütakunatam juntayarqan.
13 Carëahpa tsurin Johanan y entëru nacionchö këkaq soldädukunata mandaqkunaqa, Mizpächö këkaq Guedalïas kaqman ëwarmi 14 kënö niyarqan: “¿Manaku musyanki Ammonpita nunakunata+ gobernaq Baalis, Netanïaspa tsurin Ismaelta wanutsishunëkipaq mandamunqanta?”.+ Tsënö nikäyaptimpis Ahicampa tsurin Guedalïasqa, manam pëkuna niyanqanta creirqantsu.
15 Tsënam Carëahpa tsurin Johananqa, Mizpächö Guedalïasta pakëllapa kënö nirqan: “Netanïaspa tsurin Ismaelta wanutseqmi ëwëta munä, y manam ni pï musyanqatsu. ¿Imanirtan qamta wanutsishunkiman? ¿Imanirtan qamman qaqämoq Judäpita nunakuna rakikar ushayanman? ¿Imanirtan Judäpita quedaq nunakuna ushakäyanman?”. 16 Peru Ahicampa tsurin Guedalïasqa,+ Carëahpa tsurin Johanantam nirqan: “Ama tsëta rurëtsu. Ismaelpaq nikanqëkiqa manam rasumpatsu”.