Llullu këkaptin Moisesta salvayan

RIKË tsë waqarnin shipashpa makin tsararëkaq llulluta. Moisés ninmi shutinta. ¿Tsë shumaq shipashqa piraq, reqinkiku? Kikin Faraonpa tsurin, Egiptochö princësash kë shumaq shipashqa.

Egipciokuna mana wanutsiyänanta munarshi, llulluraq këkaptin mamänin Moisesta pakëkunaq kima killayoq kanqanyaq. Pero pëqa musyanaqshi egipciokuna Moisesta tarïkuyänanta, tsëshi salvanampaq kënö ruranaq.

Yaku mana yëkunampaqnöshi huk canastata ruranaq. Tsë canastaman Moisesta churarkurshi Nilo mayu kuchunchö hatusaq qorakuna rurinman churëkunaq. Imapis pasanqanta musyëta munarshi, Moisespa panin Miriamta karullapita rikaränampaq ninaq mamänin.

Tsëllanash, Faraonpa tsurin shipashqa bañakoq shamunaq Nilo mayuman. Y tsëchöshi hatusaq qorakuna rurinchö rikärinaq huk canastata. ‘Horqëkayämi tsë canastata,’ nishpash ninaq huk sirveqninta. Tsë canastata kicharirnash princësaqa, ¡shumaq llulluta rikëkunaq! Tsënash alläpa ankupëkunaq Moisesta waqakïkaqta rikarnin tsë princesa. Y manash munanaqtsu kë llullu wanutsiyänanta.

Tsëllamannash Míriam chärinaq, kë dibüjochö rikëkanqëkinö. Tsënash, Faraonpa tsurin princësata tapurinaq: ‘¿Kë llulluta wätëkamunampaq huk israelita warmita qayaramunäta munankiku?,’ nishpa.

‘Ëwar qayarallämi,’ ninaqshi tsë princësaqa. Tsëshi Miriamqa raslla ëwarnin willarinaq mamäninllata. Moisespa mamänin princësaman sharamuptinnash kënö ninaq: ‘Pagashqëkim, kë llullu wambrata wätëkami noqapaq,’ nishpa.

Tsënöpash kikin mamäninlla wätakunaq Moisestaqa. Y más hatunyäriptinnash Moisestaqa mamänin apëkapunaq Faraonpa tsurin princësaman, y pënash wätakunaq kikimpa wambrantanö. Tsëshi Faraonpa wayinchö winanaq Moisesqa.