Marïata watukan huk ángel

MARÍA ninshi kë shumaqllan warmipa shutenqa. Nazaret markachö täraq israelïtash. Alläpa alli warmi kanqantash Teyta Dios musyanaq. Tsëshi parlapänampaq Gabriel nishqan angelninta kachamunaq. ¿Imaraq Marïata nerqan ángel Gabriel, musyankiku? Mä rikärishun.

‘Buenos días Teyta Dios akrashqan warmi’ ‘qamwanmi këkan Jehová,’ nishpash ninaq ángel Gabriel. Marïaqa manash ni imëpis tsë angeltaqa rikashqatsu. Tsëshi, tsë ángel nikanqanta mana käyir yarparan. Tsënash ángel Gabrielqa tsë hora yamëyäratsinaq mantsakënimpita Marïata.

‘Ama mantsakëtsu María, alläpa kushishqam qamwanqa Jehová këkan. Tsëmi kushikïniki qoshunki. Huk wambrëkim kanqa. Y Jesús nishpam shutin churanki.’

‘Pëmi reqishqa y llapampitapis más Hatun Teyta Diospa Tsurin nishqa kanqa. Davidnö rey kanampaqmi churanqa Jehoväqa. ¡Pero wiñeypaq reymi kanqa pëqa, y manam ushakanqatsu reinon ni imëpis!,’ nishpash Marïata käyitsinaq ángel Gabriel.

‘¿Imanöraq këqa kanman? Mana huk nunawan casakushpaqa, ¿imanöraq huk wambrä kanman?,’ nishpash tapukunaq María.

Tsënash, ‘qammanmi Teyta Diospa podernin shamonqa.’ ‘Tsëmi Teyta Diospa Tsurin nishqa kanqa tsë wambraqa.’ ‘Hina Elisabet kastëkita yarpë. Wawayoq kanampaqqa alläpa chakwasnam niyarqam nunakunaqa. Pero wambran kanqanam. Kananqa musyankinam mana ni ima Teyta Dios mana puëdenqanqa kanqanta,’ nishpash ninaq Gabriel.

Tsëta wiyarirnash, ‘¡Teyta Jehová Diospa esclävanmi kä! Pë nenqannö këkutsun,’ nishpa ninaq María y tsëllanash ewkunaq angelpis.

Tsëpitanash, Elisabet watukaq ëwakunaq Marïaqa. Y pëpa shiminta Elisabet wiyariptinnash, kushikïwan pintikachärinaq Elisabetpa pachanchö llullun. Espíritu santowanshi Elisabetqa huntarinaq, tsënash: ‘Llapan warmikunapitapis bendïtam kanki,’ nishpash ninaq Marïata. Kima killash Elisabetwan täräyänaq, y tsëpitanash kutikamunaq Nazaret markata.

Tsëllanash José nishqan nunawan casakurinan kanaq Marïaqa. Y wawayoq kananta musyarirnash, Josëqa pëwan casakïta manana pensanaqnatsu. Tsënash, ‘ama Marïawan casakïta mantsëtsu. Huk wawan kanampaqqa Teyta Diosmi permitishqa,’ nishpa ninaq Jehoväpa huk angelnin. Tsënönash casakuriyänaq Josëwan Marïaqa, y Jesús yurinantash shuyaräyänaq.