Lección 5
¿Imano kë Patsa kanantaraq Dios munan?
¿lmapaqraq Jehová kë Patsata kamarqan? (1, 2)
¿Imanirtaq kë Patsa paraisotsu kanan tiempo? (3)
¿Imananqaraq Dios mana alli nunakunata? (4)
¿Imataraq Jesús ruranqa shamoq paraisocho qeshyaqkunapaq?, ¿tsatsakunapaq?, ¿wanushqakunapaq? (5, 6)
¿Imataraq qam rurankiman shamoq bendicionkunata chaskinekipaq? (7)
1. Kë Patsataqa Jehová kamashqa, nunakuna kushishqa, mana wanushpa tarayänampaqmi. Imepis kushishqa, wiyakoq nunakuna tarayänantam Pëqa munarqan (Salmo 115:16; Isaías 45:18). Kë Patsaqa wiñeypaqmi kanqa, manam ni imepis ushakanqatsu (Salmo 104:5; Eclesiastés 1:4).
2. Manaraq nunakunata rurarmi, Dios akrarqan Patsapa huk kuchunta, shumaq paraisoman tikraratsirnam, shutin churarqan Edén nishpa, tse sellama shumaq huertata. Tsemanmi churarqan llapampa puntan nunakunata: Adán Eva shutiyoqta. Diosqa munarqan wamrankuna kanantam, tsenopa kë Patsaman huntayänampaq. Ichikllapayannam hinantin Patsata tikratsiyanman karqan paraisoman (Génesis 1:28; 2:8, 15).
3. Adán Eva hutsaman ishkiyarqan Diospa leyninta musyëkar mana wiyakuyanqanchomi. Tsenopam, Jehová qarqaramorqan tse sellama shumaq Edén huertapita, tsepitam paraíso oqrakärerqan (Génesis 3:1-6, 23). Tseno kaptimpis Jehovaqa manam qonqashqatsu Patsapaq munanqanta. Tsemi Pëqa änimantsik yape kë Patsata paraisoman tikratsimunampaq, tsecho nunakuna wiñeypaq kawayänampaq. ¿Imanöraq ruranqa? (Salmo 37:29.)
4. Mana alli nunakunaran ushakäyanan, kë Patsa paraisoman tikranampaq (Salmo 37:38). Kë llapanqa kanqa Armagedonchomi, tseqa Diospa guerranmi, llapan mana allikunata ushakätsimunampaq. Tsepitanam, Satanás llawiranqa huk waranqa wata, tsemi Patsacho mana ni pi, mana alli ruraq kanqanatsu. Diospa nunankunallanam kawëkayanqa (Revelación 16:14, 16; 20:1-3).
5. Jesucristonam gobernamonqa huk waranqa wata kë Patsata (Revelación 20:6). Ichikllapayannam, hutsata ushakätsimonqa noqantsikpita. Tsenopam noqantsik perfecto tikrashun üne Adán Eva manaraq hutsata rurar kayanqanno. Tsemi mana kanqanatsu qeshyakuna, tsatsayekuna, ni wanïpis. Qeshyaqkunapis kachakäyanqam, tsatsakunanam jovenyäyanqa (Job 33:25; Isaías 33:24; Revelación 21:3, 4).
6. Huk Waranqa Wata Jesuspa Gobiernonchomi, Jehová kuyaq nunakuna uryayanqa hinantin Patsa paraisoman tikranampaq (Lucas 23:43). Hinamampis atska millón wanushqa nunakunam kawariyämonqa, yape kë Patsacho nunano kawayänampaq (Hechos 24:15). Dios munanqanta rurarqa, wiñeypaqmi kawëkayanqa kë Patsacho. Mana tseno rurarqa, wiñeypaqmi ushakäyanqa (Juan 5:28, 29; Revelación 20:11-15).
7. Tsenopam Patsapaq Jehová munanqan, rurakanqa. ¿Munankimantsuraq shamoq bendicionkuna chaskita? Tseno kaptenqa Jehovapitam yachakïkaneki, pë munanqannömi kawëkaneki. Tseno yachakunekipaqqa yanapashunki, Jehovapa Testigonkuna Ellukäyanan Wayicho reunionkunaman ewemi (Isaías 11:9; Hebreos 10:24, 25).
[10 kaq päginachö dibüju]
Oqrakashqa paraíso
[11 kaq päginachö dibüjukuna]
Armagedón kariptinmi, Patsa paraisoman tikrarenqa