Lección 6
¿Imataq Diospa Reinon?
¿Mechoraq Diospa Reinon kekan? (1)
¿Piraq Reynin? (2)
¿Kayanku huk nunakuna Reywan gobernayämunampaq? Tseno kaptenqa, ¿ekaq? (3)
¿Imakunaraq rikätsimantsik ushake hunaqkunachona kawekanqantsikta? (4)
¿Imataraq ruramonqa nunakunapaq Diospa Reinon? (5-7)
1. Jesús kë Patsacho kekarmi yachatserqan nunankunata, Reïniki shamïkutsun nishpa Diosta mañakuyänampaq. Tse “reinoqa” huk mandakoq rey-yoq gobierno, ninanmi. Diospa Reinonqa manam lluta gobiernokunanotsu. Tse reinoqa cielochomi patsakashqa, tsepitam hinantin Patsaman gobernamonqa. Diospa shutintam santoyätsenqa. Diospa voluntadnintam ruratsimonqa Patsacho, cielochono (Mateo 6:9, 10).
2. Dios änikonqan Reinopa Reyninqa, Jesusmi kanqa (Lucas 1:30-33). Kë Patsacho Jesús kekarmi rikätsikorqan kuyakoq, justo, perfecto, Gobernante kananta. Cieloman kutirerqa manam hinallachotsu Rey karqan, Diospa Reinoncho (Hebreos 10:12, 13). Tse 1914 watachoran Jehová qorqan Jesusta, änenqan autoridadta. Tse watapita witsepam Jesús gobernekan cielocho, Dios nombrashqa Reyninno (Daniel 7:13, 14).
3. Jehovaqa hina akrashqam wakin fiel ollqukunatapis warmikunatapis kë Patsapeq, cieloman ewayänampaq. Pekunam gobernayämonqa nunakunata Jesuswan, juezkunano, reykunano sacerdotekunano (Lucas 22:28-30; Revelación 5:9, 10). Jesusmi Gobiernoncho pewan gobernamunampaq kaqkunata nerqan, “wallkaqlla usha”. Llapanqa kayan 144.000 (Lucas 12:32; Revelación 14:1-3).
4. Jesús Rey keman charirllam, Satanasta mana alli angelninkunatawan, cielopita qarqaramorqan Patsaman. Tsemi kë Patsachoqa llapan mana alli rurëkuna mirakarkamushqa, tse 1914 watapita patse (Revelación 12:9, 12). Guerrakuna, mallaqekuna, qeshyakuna, mana alli rurëkuna..., kë llapan rikanqantsikmi huk “señal”, Jesús gobernekämonqanta, hina ushake hunaqkunachona kawekanqantsikta (Mateo 24:3, 7, 8, 12; Lucas 21:10, 11; 2 Timoteo 3:1-5).
5. Ichikllanam pishin Jesús nunakunata juzgamunampaq, imanomi huk mitsikoq ushankunata rakin cabrakunapita, tsenomi Jesús rakimonqa nunakunata. Pëqa “ushankunatano” rikan, pellapaq kayanqanta rikarätseqkunatam, hinamampis qonqa wiñeypaq kawetam kë Patsacho. “Cabrakunanoqa” kayan, Diospa Reinonta mana munaqkunam (Mateo 25:31-34, 46). Jesús ushakätsimonqanam cabrarikoq nunakunata (2 Tesalonicenses 1:6-9). Jesuspa “ushankunano” keta munarqa, Reinopa willapäkinintam kayineki, yachakonqekinomi kawaneki (Mateo 24:14).
6. Kanan Patsaqa atska markakunamanmi rakikashqa kekan, tse llapan markakunapam gobiernonkuna kan. Markakunaqa kikinkunapuram guerrallacho kakuyan. Diospa Gobiernonmi kanqa, kë llapan nunakunapa gobiernonkunapa rantin. Tsemi hukllella gobierno kanqa kë llapan Patsacho (Daniel 2:44). Manam kanqanatsu más guerrakuna, wanutsikoqkuna ni maqakoqkuna, ni maqakita munar qayapäkoqkuna. Tsenopam llapan nunakuna kawakuyanqa kuyanakushpa, pazcho (Miqueas 4:3, 4).
7. Jesuspa Waranqa Wata Gobiernonchoqa, llapan alli nunakunam perfecto keman chäyanqa, hinantin Patsapis paraisom kanqa. Waranqa wata ushanampaq kekaptinnam, Jesús rurashqa kanqa llapan Dios munanqanta. Tsenam kutïkatsenqa tse Reinota Teytanta (1 Corintios 15:24). ¿Imanirtaq Diospa Reinon ruramunanta willapankitsu, amiguikikunata, llapan kuyanqekikunatawan?
[13 kaq päginachö dibüju]
Jesús gobernamuptenqa, manam kanqanatsu mana allipa rikänaki ni chikinaki