Lección 7
Oracionmi yanapamantsik Diosman witinantsikpaq
¿Imanir-raq allapa alli Diosman imepis orakïkanantsik? (1)
¿Pimantaq orakushwan, imano? (2, 3)
¿Imakunapaqtaq orakushwan? (4)
¿Imetaq qam orakunkiman? (5, 6)
¿Llapan oracionkunatatsuraq Dios wiyan? (7)
1. Orakiqa, Diosta allapa respetowan parlapemi. Diostaqa imepis mañakïkashwanmi. Tseno rurarqa kuye amigontsiktanomi rikashun. Jehovaqa allapa hatun karpis, allapa kallpayoq karpis, wiyanmi mañakïnintsikkunata. ¿Imepis Diosman orakïkankiku? (Salmo 65:2; 1 Tesalonicenses 5:17.)
2. Diosman orakipis adoremi. Tsemi Jehová Diosllaman mañakunantsik. Jesuspis Patsacho kekarnin Teytanllamanmi mañakorqan, manam ni pimampis masqa. Noqantsikpis tsenollam rurashwan (Mateo 4:10; 6:9). Tsemi mañakunantsik Jesuspa shutincho. Tseno rurarqa rikarätsishun, Jesús ruranqanta respetanqantsiktam, sacrificakonqanman fenintsik kanqantawan (Juan 14:6; 1 Juan 2:1, 2).
3. Diosman orakorqa, shonquntsikpita patsemi parlapashwan. Manam kutipëkuryan huk nenqantsikllatatsu parlakïkashwan ni manam rezayanan librokunapita leikuryantsu Diosmanqa orakushwan (Mateo 6:7, 8). Diosman orakorqa shekarpis, tärekarpis, qonqurirëkarpis imano kekarpis allapa shumaq respetowanmi mañakushwan, ime horapis, mecho kekarpis. Diosqa wiyanmi, upallalla shonquntsikcho mañakonqantsiktapis (1 Samuel 1:12, 13). Allim oracionnintsik rurakushwan hapallantsik kekar, mana pipis rikämanqantsikcho (Marcos 1:35).
4. ¿Imakunapaqtaq qam mañakunkiman? Imakunata mañakurpis pewan alli kanekipaqmi mañakuneki (Filipenses 4:6, 7). Padre nuestro oracionchomi yachatsimantsik, puntata Jehovapa shutimpaq mañakunapaq, noqantsikpaq kë Patsacho munanqanta ruramunampaqwan. Hina mañakushwanmi pishipanqantsikkunata qomänantsikpaq, hutsantsikkunata perdonamänantsikpaq, mana alli rurëkunaman mana ishkinapaq (Mateo 6:9-13). Manam kikintsik munanqantsikllapaqtsu mañakushwan. Llapan mañakonqantsikcho, Diospa voluntadninmannölla kaqtam mañakunantsik (1 Juan 5:14).
5. Qam mañakunkimanmi ime horapis shonqikicho, Diosta agradecikita, alabeta munarnenqa (1 Crónicas 29:10-13). Allapa sasa kaweniki kaptin, fenikirekur qatikachayäshuptikipis mana qonqellatam Diosman orakikankiman (Salmo 55:22; 120:1). Allim hina orakushwan manaraq mikurnin (Mateo 14:19). Jehovaqa “llapan tiempocho” orakunapaqmi invitamantsik (Efesios 6:18).
6. Allapa hutsallakïkurnimpis, mana qonqellatam orakushwan, Jehová ankupäkininwan perdonekamänantsikpaq. Diosqa “shuyarekamantsikmi perdonamanapaq” hutsantsikta willakurnin, manana yape rureta tïrashqaqa (Salmo 86:5; Proverbios 28:13).
7. Jehovaqa wiyan allikaqpa oracionninkunallatam. Diosnintsik mañakïnikita wiyanampaqqa, sinchikïkankimanmi Pepa leynin nenqanno kaweta (Proverbios 15:29; 28:9). Tsemi orakurnenqa allapa respetowanmi rurashwan (Lucas 18:9-14). Oracionnikicho mañakonqekinomi kawankiman. Tsenomi rikarätsinki feniki kanqanta, razompepa llapan shonqikiwan mañakonqekita. Tseran Jehovaqa oracionnikikunata yaskimonqa (Hebreos 11:6).