¿Diciembre killachötsuraq Jesus yurerqan?

BIBLIAQA manam willamantsiktsu ima killa ni ima hunaq Jesus yurenqantapis. Pero diciembre killachö mana yurenqantaqa alleqmi rikätsimantsik.

Jesus yurenqan Belen markachöqa, ¿imanö tiempotaq diciembre killa witsan? Judío calendariochöqa kislev nishqan killam kan, y kë killaqa noviembre witsampita hasta diciembre witsanyaqmi ratan, alalanmi y tamyanmi. Tsëpitanam tebet nishqan killa diciembre witsampita hasta enero witsanyaq, y kë killachöqa, wakin killakunapitapis masmi alalan y hirkakunachönäqa hora höraqa rashtanmi. Mä Bibliachö rikärishun kë killakunachö imanö tiempo kanqantapis.

Biblia qellqaq Esdras nunam rikätsimantsik kislev killaqa alalanqanta y tamyanqanta. “Isqon killapa [kislev], ishkë chunka hunaqninchömi” Jerusalenman ëllukäyarqan o qorikäyarqan atska nunakuna “katatar [...] alläpa tamyaptin”. Hinamampis tsëchö ëllukashqa o qorikashqa nunakuna niyanqantam willamantsik: “Kë tiempoqa alläpa tamya killam y manam waqtachö quedakïta puëdentsiktsu” nishpa (Esdras 10:9, 13; Jeremías 36:22). Tsëmi diciembre killa chaptenqa, tsë markachö mitseqkuna animalninkunata ëllukuyaq o qorikuyaq alalëcho mana quedakuyänampaq.

Pero Jesus yurenqan paqasqa, pampachömi animalninkunata cuidar mitsikoqkunaqa këkäyarqan nimantsikmi Bibliachöqa. Awmi, Lucas libro qellqaqmi willamantsik: “Tse paqasmi Belen marcapa wac laduncho üshancunata mitseq nunacunapis täpaquicayarqan”, nishpa (Lucas 2:8-12). Rikanqantsiknömi, manam hunaqllapatsu puriyaq sinöqa hinanchömi täräyaq. Paqaspam animalninkuna libre kaq. Tsë diciembre killa Belenchö alläpa alalë y tamya këkaptenqa, ¿mitsikoqkuna chacrakunachö täräyanmantsuraq karqan? Manachi. Kënö tiempokuna kanqanmi rikätsimantsik diciembre killachö Jesus mana yurenqanta.a

Diospa Palabranqa alleq clärom willamantsik imë Jesus wanonqanta, pero imë yurenqantaqa manam alleq clärotsu willamantsik. Tsëmi këqa yarpäratsimantsik rey Salomón nenqanta: “Huk alli aceitepitapis más alleqa, huk alli shutim, y yuriki hunaqpita más alleqa wanukï hunaqmi” nishpa (Eclesiastés 7:1). Tsëmi musyantsik Cristupa willapäkïnimpita y wanïnimpita Bibliachö más parlanqanta, y yurikïnimpitaqa ichikllata willamanqantsikta.