Näni, rasumpa kaq y kawë
Alli noticiakunata chaskiqa alläpachi gustashunki. ¿Musyarqëkiku llapanta Kamaq Jehoväqa qampaq y familiëkipaq alli noticiakunata katsinqanta?
Tsë noticiakunaqa alläpa unëna Jehovä qellqatsinqan Bibliachömi këkan, masqa Mateu, Marcus, Lücas y Juan librukunachömi këkan, tsëkunataqa tsë jutiyoq nunakunam qellqayarqan. Kë libruqa, Bibliachö këkaq tsë chuskun librukunapitam rurakämushqa.
Mëtsika nunakunam chuskun Evangeliukuna nir tsë librukunataqa reqiyan. Evangeliu nishqan palabraqa “alli willakïkuna” ninanmi, y tsë chuskun librukunaqa Jesuspitam alli noticiakunata willakuyan. ¿Ima noticiakunata? Salvamänapaq Jesusta Diosnintsik kachamunqanta y Diospa Gobiernunchö Gobernaq kar, pëman llapan markäkoqkunapaq mana ushakaq bendicionkunata apamunampaq kaqmi (Marcus 10:17, 30; 13:13).
¿IMANIRTAQ CHUSKU EVANGELIUKUNA KAN?
Itsa kënö tapukushwan: ¿Imanirtaq Diosqa qellqatsirqan Jesuspa kawëninta y yachatsikïninta chusku willakïkunachö? nir.
Rasumpa kaqchöqa, tsënö qellqatsinqanqa allim karqan. Juk alläpa reqishqa profesorpa lädunchö këkaq chuskoq nunakunaman pensarishun. Profesorpa puntanchö këkaqqa impuestu cobrakoqmi. Y derëcha kaq lädunchö këkaqqa doctormi. Y itsoq kaq lädunchö këkaqnam pescador y alläpa kuyë amïgun. Y qepanchö këkaq nunanam llapampitapis mas jövin kaq. Tsë chuskun nunakuna alläpa alli karnimpis, yarpachakïninkuna y pensëninkunaqa cada ünupa alläpa jukläya. Tsë chuskun nunakunaqa profesorpa yachatsikïninta y rurëninkunata qellqarninqa manam igual-llatsu qellqayanqa, porqui cada ünum profesor imanö yachatsikunqanta qellqayanqa. Tsënö qellqayanqanrëkurmi, cuentata qokurishun profesorninkuna rasumpa imata ninqampita y ruranqampita. Jina tsënöllam, Alli Maestru Jesuspa kawënimpita willakoq chuskun librukunata katsinqantsikpitaqa alläpa kushikuntsik.
Tsë igualatsikïwan sïguishun. Impuestu cobrakoqqa judïukunata maslla entienditsinampaqmi, pasakunqankunata y reqiyanqan yachatsikïkunata qellqan. Peru doctor kaqqa, qeshyëkaqkunata y lisiädukunata kachakätsinqampitam qellqan. Y impuestu cobrakoq qellqanqankunapitaqa wakintaqa qellqannatsu o qellqarpis jukläya patsätsin. Peru profesorpa amïgun kaqqa, profesorpa imanö kënimpita y sentimientumpitam qellqan, y mas jövin kaqqa qellqan mas precïsun kaqkunata y mas wallkallatam. Tsënö kaptimpis, llapan qellqayanqanqa kaqllatam willakun. Y tsënöllam pasakun Mateu, Marcus, Lücas, Juan qellqayanqankunawampis. Jesuspa kawënimpita chusku willakïkuna kanqanqa yanapamantsik, Jesus kawëninchö imata ruranqampita, yachatsikunqampita y imanö nuna kanqampita mas entiendinapaqmi.
Pï mëmi “Evangeliu de Mateu”, “Evangeliu de Juan”, nishpa reqiyan. Y tsënö niyanqanqa allillam, porqui chuskun librukunachömi “Jesucristupita alli willakïkuna” këkan (Marcus 1:1). Awmi, tsë chuskun librukunaqa Jesuspa kawënimpaqmi willakuyan.
Mateu, Marcus, Lücas y Juan qellqayanqan willakïkunataqa mëtsikaq estudiösu nunakunam igualatsiyashqa y ordenpa churayashqa. Jina tsënöllam rurarqan Asiria nacionpita Taciänu jutiyoq nunapis, y chuskun librukuna exactu y santu espïritupa yanapakïninwan qellqashqa kayanqantam nirqan. 170 watakuna witsanmi Diatessaron nishqan libruta qellqarqan, tsëchöqa Mateu, Marcus, Lücas y Juan librukunatam juntarkurqan Jesuspa sagrädu rurëninta y kawëninchö imakuna pasakunqanta willakunampaq.
Jina kë librupis tsaq tsënöllam, y tïtulunqa Jesusmi: näni, rasumpa kaq y kawëqa ninmi, peru mas exactu y Bibliachö ninqannöllam. Y Jesus yachatsikunqan igualatsikïkunata maslla entiendirnin y Diospa musyatsikïninkuna imanö cumplikëkanqanta maslla entiendirninmi rurakämushqa. Tsënöpam Jesus imata ruranqanta y ninqanta y imapis imanö pasakunqankunata maslla entiendishun. Jina unë pasakunqanta estudiaqkuna tariyanqankunam yanapamantsik, Mateu, Marcus, Lücas y Juan qellqayanqanta maslla entiendinapaq. Tsënö kaptimpis, manam segürutsu kantsik mëqan willakïkuna puntata kashqa kanqanta, peru kë librum yanapamantsik imapis imanö pasakushqa kanqanta maslla entiendinapaq.
NÄNI, RASUMPA KAQ Y KAWË
Kë libruta leyirninqa imata yachatsimanqantsikmanmi yarpänantsik. Apostol Tomasta señornintsik Jesucristu kënö ninqanman yarpäshun: “Noqam näni, rasumpa kaq y kawë kä. Mana noqawanqa, manam ni pipis Teytaman shamïta puëdintsu” (Juan 14:6).
Kë librum yanapamäshun Jesucristu imanir “näni” kanqanta maslla entiendinapaq. Jesuspa jutinllachömi Jehovämanqa mañakïta, pëwan yapë amïgu këta y pëpa rikëninchöqa alli këta puëdintsik (Juan 16:23; Romänus 5:8).
Jina Jesusqa “rasumpa kaq[mi]”. Pëqa rasumpa kaqllatam parlarqan y yachatsikunqannömi kawarqampis. Jinamampis, Diospa musyatsikïninkunam Jesuschö cumplikarqan y tsëmi maslla entienditsimantsik Diospa munënin cumplikänampaq Jesus ruranqan imanir precisanqanta (2 Corintius 1:20; Juan 1:14; Revelacion 19:10).
Jina Jesucristuqa ‘kawëmi’. Awmi, jutsannaq kawëninwan chaninta pagakunqanrëkur y yawarninta ramarninmi, ‘rasumpa kaq kawëta’, juk parlakïchöqa, ‘imëyaqpis kawakïta’ chaskinapaq wanurqan (1 Timoteu 6:12, 19; Efesius 1:7; 1 Juan 1:7). Jina Jesusqa ‘kawëmi’ kanqa millonyëpayan nunakuna kawariramur Shumaq Patsachö imëyaqpis kawayänampaq (Juan 5:28, 29).
Alleqmi entiendinantsik y precisaqpaqmi churanantsik Diospa munënin cumplikänampaqqa Jesus ruranqan alläpa precisanqanta. Rasumpa kaqchöqa, alläpam kushikushun Jesus, “näni, rasumpa kaq y kawë” kanqanta yachakurninqa.