Diosman witi

Jehoväqa llapan sirweqninkunatam rurëninkunapita bendecin

“ALLÄPAM AGRADECIKOQ.” ¿Pitaraq gustanmantsu kuyakoq karnin imallatapis qarakunqampita o alli trabajanqampita tsënö niyanqan? Llapantsikmi shuyarantsik kallpachakunqantsikta precisaqpaq churayänanta, y masran kuyanqantsik kaqkunapitanäqa. ¿Y pitataq llapampitapis masqa kuyantsik? Diosnintsik Jehovätam. Pero ¿pëqa kallpachakunqantsikta precisaqpaq churanku? Rikärishun Ébed-mëlecta ima pasanqanta, pëqa kawëninta peligroman churarmi Diospa profëtanta salvarqan. (Lei Jeremías 38:7-13 y 39:16-18.)

¿Pitaq karqan Ébed-mëlecqa? Judäpa reynin Sedequïaspa gobiernonchö yanapakoqchi quizás karqan.a Profeta Jeremïaspa tiemponchömi kawarqan, tsë profëtataqa Diosmi mandarqan ichik tiempollachöna Judäpa ushakënin chänampaq kaqta willakunampaq. Diosta mana wiyakoq principekunawan paqta trabajarpis, Ébed-mëlecqa Jehovätam llapanchö wiyakoq, y alläpam respetaq Jeremïasta. Juk kutim Diosta kuyënin pruëbaman churakärirqan: mana alli principekunam Jeremïaspaq niyarqan gobiernopa contran kanqanta, nïkurmi wanunampaq mitullana pözoman qarpurkuyarqan (Jeremías 38:4-6). ¿Imatataq Ébed-mélec rurarqan?

Kallpata tsarirkurmi tsë hora yanapakurqan. Manam principekunata mantsartsu wiyaräkurqan. Nunakuna o runakuna jananchömi Sedequïasta nirqan jutsannaq këkaptin Jeremïasta castiguëkäyanqanta. Quizaschi tsëta ruraqkunata señalëkur reyta kënö nirqan: “Kë nunakunaqa mana allitam rurayashqa” (Jeremías 38:9). Sedequïasqa wiyarqanmi Ébed-mëlecta, y kima chunka nunakunatam mandarqan pözopita profëtata jorqar yanapayänampaq.

Jina Ébed-mëlecqa alli nuna kanqantam rikätsikurqan. Bibliam kënö nin: “Makwa ratashkunata y rachishqa tëlakunapa katupinkunatam [...] Jeremías këkanqan pözoman waskatawan jitapurqan”. ¿Imapaq? Llikllakshunman o iñikshunman profeta churanampaqmi, tsënöpa sutayaptin waska mana nanatsinampaq (Jeremías 38:11-13).

Tsëqa, ¿Ébed-mélec ruranqanta Jehová cuentaman churarqanku? Awmi. Jeremïaswanmi willatsirqan Juda chipyë ushakänampaq kaqta y nïkurmi këkunata awnirqan: “Librashqëkim”, “manam chikiyäshoqnikikunapa makinchöqa jaqirishqëkitsu “, “rasumpa safakunëkipaqmi [qeshpinëkipaqmi] yanapashqëki”, “manam espädawan wanutsiyäshunkitsu” y “wanïpitam almëkita salvanki”. ¿Imanirtaq salvanampaq awnirqan? “Noqaman markäkamunqëkipitam [yärakamunqëkipitam]” nirqanmi Jehová (Jeremías 39:16-18). Jehoväqa musyarqanmi Jeremïasta Ébed-mélec yanapanqanta, jina musyarqanmi Jeremïaspaq yarpachakurllatsu tsëta ruranqanta, sinöqa Diosman markäkur o yärakur.

Clärom këkan imata yachatsimanqantsik: Jehoväqa alläpa precisaqpaqmi churan sirwinantsikrëkur kallpachakunqantsikta. Bibliaqa willamantsik markäkur y kuyar ichikllatapis ruranqantsiktaqa Dios rikëkanqantam (Marcos 12:41-44). Tsëta musyarir, ¿manaku shonqïki munarin kallpachakunqantsikta cuentaman churaq Diosman más witita? Tsënö karqa, ‘llapan shonquncunawan asheqnin caqcunataqa [Dios] yanapanqanman’ markäkï o yärakuy (Hebreus 11:6).

[Päginapa ura kuchunchö willakï]