Jeremïasqa Jehoväpa willakoqninmi karqan

Judä nacionchö willakunampaqmi Jehoväqa Jeremïasta akrarqan. Nunakunata yachatsinampaq y mana alli rurëkunata mana dejaq nunakuna castigashqa kayänampaq kaqta willakunampaqmi mandarqan. Peru Jeremïasqa kënömi nirqan: “¡Llapanta Gobernaq Teyta Jehovä! Noqaqa jövinllaraqmi kallä, manam alli parlëtapis yachätsu”. Tsënam Jehoväqa kënö nirqan: “Ama mantsakëtsu, noqam yanapashqëki y parlanëkipaq kaqtapis nishqëkim”.

Tsëpitanam Jehoväqa, Jeremïasta mandarqan markachö wakin dirigeqkunata y sacerdötikunapita wakin dirigeqkunata qayatsinampaq, y puntankunachö juk ichiklla cantaruta pakiskir kënö ninampaq: “Tsënömi kë marka y kë markapita nunakuna ushakäyanqa”. Jeremïasqa tsëtam rurarqan, peru tsë dirigeqkunaqa alläpam cölerakuyarqan. Tsënam Pasjur jutiyoq sacerdötiqa Jeremïasta maqakacharkur, uchkukunayoq tablaman chakinta, makinta y peqanta o umanta amutsirqan. Y juk paqas tsënö karatsirmi waränin junaqraq libri dejarqan. Tsëmi Jeremïasqa kënö nirqan: “Manam aguantëta puëdïnatsu. Mananam yachatsikushaqnatsu”. Peru, ¿yachatsikuyta dejarqanku? Manam. Alli pensarirmi kënö nirqan: “Jehovä nimanqankunaqa tullü rurinchö rupëkaq ninanömi shonqüchö karqan, y manam aguantëta ni upälla këta puëdirqätsu”. Tsënö nirmi Jeremïasqa willakur sïguirqan.

Atska watakuna pasariptinqa juknam Judä nacionpa gobernantin karqan. Y Diospa willakoqnin tukoqkuna y sacerdötikunaqa alläpam Jeremïasta chikiyaq. Tsënam dirigeqninkunata kënö niyarqan: “Kë nunaqa kë marka ushakänampaq kaqtam willakushqa, tsëmi wanunan o wañunan”. Tsënam Jeremïasqa kënö nirqan: “Llapan niyanqaqkunaqa, Teyta Jehovä nimanqanllam kashqa. Tsëmi noqata wanutsimarqa, qamkuna y kë markachö nunakunapis, culpannaq nunata wanutsiyanqëkipita culpayoq kayanki”. Tsënam dirigeqkunaqa kënö niyarqan: “Kë nunaqa Jehovä Diosnintsikpa jutinchömi parlapämarquntsik, tsëmi pëtaqa wanutsiyänantsu”.

Jeremïasqa willakurmi sïguirqan, tsëta rikarmi dirigeqkunaqa alläpa cölerakuyarqan, y gobernantitam “wanuratsi” niyarqan. Y gobernantiqa, “makikikunachömi këkan pëwan imatapis rurakuyë” nirqan. Tsënam pëkunaqa Jeremïasta apakuyarqan y wanunampaqmi leqitallana pözu rurinman jitarpuyarqan, y hundikarmi qallëkurqan.

Ëbed-Mëlec jutiyoq mandakoq guardiam gobernantita kënö nirqan: “Tsë nunakunaqa Diospa willakoqnin Jeremïaswan alläpa mana allitam rurayashqa, juk pözumanmi jitarkuyashqa, tsëchö dejarishqaqa wanunqam”. Tsënam gobernantiqa mandarqan 30 nunakunata pusharkur Jeremïasta jipimoq ëwanampaq. Jeremïasqa manam ni imanöpapis Diospita willakuyta dejarqantsu. ¿Qampis pënö këtaku munanki?