9 KAQ YACHATSIKÏ
Jeremïasqa Jehoväpita parlëta manam jaqirqantsu
¿Imanirtaq nunakunaqa Jeremïaswan piñashqa këkäyan?
Jehovämi pösupita juk nunakunawan Jeremïasta jorqatsirqan
Wakinkunaqa Jehoväpita parlapashqa piñakuyanmi o burlakuyanmi. ¿Tsënö ruramashqaqa mana allim sientikuntsik aw? Itsa “mananam Jehoväpita parlashaqnatsu” nirquntsik. ¿Imëllapis tsënö nirqunkiku?. . . Bibliam willamantsik Jeremïaspita. Jehoväta kuyëkarpis pëpita parlëta cäsim jaqirirqan. Pasanqanta rikärishun.
Jeremïas jövinllaraq këkaptinmi, Jehovä mandarqan juk precisaq willakïta willakunampaq. Nunakunatam willanan karqan mana alli rurëninkunata jaqiyänampaq. Tsë rurëqa alläpa sasam (ajam) karqan, y mantsapakurqanmi. Tsëmi Jehoväta nirqan: “Wamrallaran kallä y imanö willëtapis manam yachätsu”. Peru Jehovänam nirqan: “Ama mantsapakïtsu, noqam yanapashqëki”.
Tsënam Jeremïasqa nunakunata nirqan: “Mana alli rurënikikunata mana jaqirqa, castigashqam kayanki”. ¿Wiyakuyarqanku?. . . Manam, burlakuyarqan, piñakuyarqan y ¡hasta wanutsitam munayarqan! ¿Imanötaq Jeremïas sientikurqan?. . . Alläpam mantsapakurqan, tsëmi kënö nirqan: “Manam Jehoväpitaqa parlashaqnatsu”. ¿Rasumpaku Jehoväpita parlëta jaqirirqan?. . . Manam. Jehoväta alläpa kuyarninmi pëpitaqa parlëkarqanlla. Tsëmi Jehoväqa chikeqninkunapita tsapëkurqan.
Juk kutim Jeremïasta, chikeqninkuna yakunnaq pösuman jitarkuyarqan. Alläpam sufrirqan, porqui mitu kaptinmi hundikaq. Jina mikunampaq y upunampaqpis manam imapis karqantsu. ¡Tsëchö wanunantam munayarqan! Peru ¿Jeremïasqa wanurqanku? Manam, Jehovämi pösupita jukkunawan jorqatsirqan.
Këchömi yachakurquntsik, mantsapakushqa karnimpis Jeremïasqa Jehoväpita parlëta mana jaqinqanta. ¿Imatataq pëpita yachakuntsik?. . . Itsa wakinkunaqa Diospita parlapaptiki burlakuyanqa o piñakuyanqa. Y tsërëkur penqakunki o mantsapakunki. Peru Jehoväpita parlëtaqa manam jaqinëkitsu. Yarpë, Jeremïasta yanapanqannöllam Jehoväqa yanapashunki.