Jeremïasnö imëpis riyëkäshun
“[Noqa Jehoväqa], parlanqäkunata ruranäpaqmi riyëkälla.” (JER. 1:12.)
1, 2. ¿Imanötaq almendro igualan Jehová riyëkanqanwan?
ISRAELPA hirkankunachö y Líbano markapa hirkankunachömi, almendro monti wëtar qallëkun tamya witsan pasariptinlla, yulaqta o rosädota karmi enero killa ushanankunachö o febrero killa qallanankunachö shumaqta wëtan. Hebreo idiömachö almendro ninanqa, “riyakoq” ninanmi.
2 Jehová Jeremïasta profëtantanö churarirmi, almendro montipita yachakunampaq parlaparqan. Huk visionchömi tseqllimushqa almendrota rikätsirqan, tsëpitanam ima nïta munëkanqantapis kënö nirnin willarqan: “Parlanqäkunata ruranäpaqmi riyëkälla” (Jer. 1:11, 12). Imanömi almendro punta puntata wëtarin, tsënömi Diosnintsikpis “patsa manaraq waraptin”, profëtankunata markanman mandarqan mana wiyakuyanqampita castigashqa kayänampaq kaqta willanampaq (Jer. 7:25). Y Jehoväqa manam hamanantsu karqan, parlanqan cumplinqanyaqmi ‘riyëkänan’ o rikchaykänan karqan. Y 607 watachömi, Jehová ushakëta apamurqan contran churakashqa markan Judäpaq.
3. ¿Shonqupita patsëku Jehoväman markäkuntsik?
3 Kanampis Jehoväqa riyëkanllam llapan munanqankunata cumplinampaq. Pëqa parlanqanta imëpis cumplinllam. Këqa, ¿imachötaq noqantsikta yanapamantsik? ¿Markäkuntsikku 2011 watachöpis Jehová ‘riyëkanqanta’ y awnikunqanta cumplimunanta? Cumplimunqatsuraq o manatsuraq nirnin punukïkarqa riyakunantsiknam (Rom. 13:11). Jeremïasnömi kanantsik, pëqa, Diosnintsik llapan mandanqanta ruranan kaptinmi punukarqantsu. Imanir y imanö ruranqankunata yachakurqa, noqantsikpis Jehová llapan mandamanqantsikkunata mana haqitam rurashun.
Raslla willakunampaq
4. ¿Jeremías yachatsikunan fäcil-llatsuraq karqan, y imanirtaq ras ruranan karqan?
4 Itsa Jeremïasqa, profeta kanampaq Jehová akranqan witsan 25 watayoqnö karqan (Jer. 1:1, 2). Tsëpis wambrallaraq kanqantam pensarqan, Judächö anciänokunata, autoridadkunata y yachaq nunakunata parlapëtam mantsaq (Jer. 1:6). Mantsakëpaq willakïtam willanan karqan sacerdötekunata, uli o llulla profëtakunata, mandakoqkunata, “nunakuna niyanqanta” qateqkunata y “imëpis mana alli ruraqkunata” (Jer. 6:13; 8:5, 6). Salomon ruranqan templom, chusku pachak watakunana Jehoväta tsëchö adorëkäyaptimpis ushakänan karqan. Hinamampis Jerusalenwan Juda markakunam ushakänan karqan, y tsë markakunachö täraq nunakunatapis esclävopaqmi apakuyänan karqan. ¡Kë preciso willakïtam profeta willakunan karqan!
5, 6. a) ¿Imanötaq Jehová yanapëkan kanan kaq Jeremïasta? b) ¿Imapitataq yachakushun kë yachatsikïchö?
5 Jehoväqa alläpa kuyakoq këninwanmi, kanan kaq Jeremïasta churashqa täpakoq cuenta kanampaq, pëkunam ushakë hunaq këllachöna këkanqanta willakuyan. Atska watakunapanam kë täpakoqkunaqa, Jeremïasnö llapan nunakunata willayashqa ushakë hunaq këllachöna kanqanta (Jer. 6:17). Jehoväqa tsë hunaqta patsätsishqanam, y ninqannömi ruranqa. Pero patsätsinqan hunaqchö chämuptimpis, nunakunataqa illaqpitam tsarinqa (Sof. 3:8; Mar. 13:33; 2 Ped. 3:9, 10).
6 Jehová mana punukärinqanta yarpë y mushoq Patsata chätsimunanta musyëchi ciëlota ëwaqpaq kaqkunataqa allipa yanapan. Hina tsënöllachi kë Patsachö kawaqpaq kaqkunatapis yanapan, rurëkäyanqankuna alläpa preciso kanqanta rikarnin mana punukäkuriyänampaq. Jesusqa llapantsik Diospa Gobiernonta yanapanapaqmi mandakurqan. Rikärishun Jeremïasta ima yanapanqantapis, tsëmi noqantsiktapis yanapamäshun tsënölla ruranapaq.
Nunakunata kuyanqan
7. ¿Imanirtaq nintsik Jeremïastaqa kuyakoq këninmi yanaparqan Diospita yachatsikunampaq?
7 ¿Imanirtaq Jeremïasqa wiyëta mana munëkäyaptimpis willakurqan? Pëkunata kuyarmi. Pëqa musyaqmi mana alli pastorkuna nunakunata hipatsiyanqanta (Jer. 23:1, 2). Tsëmi ankuparnin o kuyaparnin kuyëpa yachatseq. Diospa Palabranta wiyakurnin kawëkar quedayänantam munarqan. Awmi, alläpam pëkunapaq yarpachakurqan, tsëmi hasta waqarqan imëka mana allikunapa pasayänanta musyar (lei Jeremías 8:21a y 9:1b). Lamentaciones nishqan libro qellqanqanchöpis, rikätsikurqanmi Diosnintsikpa markanta alläpa kuyanqanta (Lam. 4:6, 9). Y noqantsikqa, ¿ima nintsiktaq nunakuna ‘mitseqninnaq üsha cuenta pantacashqa puriquicaqta’ rikarnin? ¿Diosnintsikpa Gobiernompitaku yacharatsïta munantsik? (Mat. 9:36.)
8. ¿Imanötaq musyantsik imëka hipakï këkaptimpis Jeremías mana piñakunqanta?
8 Jeremïaspa yanapakïninta chaskikuyänampa rantinmi, judïokunaqa Jeremïasta hipatsiyarqan. Pero pëqa manam piñakurqantsu ni vengakurqantsu. Tsëpa rantinqa llapampaqmi alli karqan, hasta mana alli rey Sedequïaspaqpis. Chikeqninkuna wanutsiyänampaq rey haqïkaptimpis, Jeremïasqa kë reyta rogarqanmi Jehová ninqanta wiyakunampaq (Jer. 38:4, 5, 19, 20). ¿Jeremïasnöku noqantsikpis nuna mayintsikta kuyantsik?
Diosmi kallpata qomantsik
9. ¿Imanötaq musyantsik Jeremías mana mantsakoq kanampaq Jehová yanapanqanta?
9 Willakoqnin kanampaq Jehová Jeremïasta mandaptinmi, pëqa munarqantsu, tsëwanmi musyantsik Jehová yanapaptinraq mana mantsapakushpa willakunqanta. Hina profeta kënintapis Jehoväman markäkunqampitam cumplirqan. Awmi, Jehoväqa lädonchömi këkarqan ‘mantsakëpaq poderninwan’, kallpata qornin y yanaparnin (Jer. 20:11). Jeremías mana mantsakoq kanqantaqa llapampis musyariyarqanmi, tsëmi Jesus alli yachatsikoq kanqanta rikëkur, Jeremïasmi kawarimushqa nir pantayarqan (Mat. 16:13, 14).
10. ¿Imanötaq ciëlota ëwaqpaq kaq cristiänokuna ‘nacionkunapa y gobiernokunapa hananchö’ këkäyan?
10 Jehovämi “nacionkunapa Reynin”. Tsëmi profëtankunata mandaq tsë witsanchö reykunata y markakunata ushakätsinampaq kaqta willayänampaq (Jer. 10:6, 7). Kë Patsachö këkaq ciëlopaq akrashqakunapis, “nacionkunapa y gobiernokunapa hananchömi” këkäyan (Jer. 1:10). ¿Ima ninantaq këqa? Jeremïasta willakunampaq mandanqannöllam Jehoväqa pëkunatapis mandashqa, tsëmi pëkunaqa willayan tukï gobiernokunata y llapan nacionkunata ushakäyänampaq kaqta. Këtaqa rurayan Jehová mandashqa kaptinmi, y Palabran Bibliawanmi yachatsikuyan (Jer. 18:7-10; Apo. 11:18). Kanan witsan kaq Jeremïasqa willakïta mana haqinampaqmi churapakashqa. Y llapan Patsapam Jehoväpa piñakïnin hunaqta willakunqa.
11. ¿Imaraq yanapamäshun tukï problëmakuna kaptimpis mana hamashpa yachatsikunapaq?
11 Noqantsiktapis wiyëta mana munayanqan o chikimanqantsikmi, hora höraqa qelanätsimantsik (2 Cor. 1:8). Pero Jeremïasnömi haqirintsiktsu. Tsëpa rantinqa, alli mañakurninmi “mana ichicllapis mantsacurishpa” yachatsikunantsik (1 Tes. 2:2). Alläpa precïsom riyëkänantsik o rikchaykänantsik Jehová mandamanqantsikta llapanta ruranapaq. Allim churapakänantsik mana hamashpa willakunapaq, unë Jerusalenchö pasanqannöllam kanampis mana alli religionkuna ushakäyanqa. Ciëlopaq akrashqakunaqa manam “Jehová allikunata ruramunampaq” kaqllatatsu willakuyan, sinöqa “Diosnintsik llapan mana allita ushakätsinampaq” kaqpitapis willakuyanmi (Isa. 61:1, 2; 2 Cor. 6:2).
“Shonqüpa kushikïnin”
12. a) ¿Imanötaq musyantsik Jeremías kushishqalla kanqanta? b) ¿Imataq yanapaq kë profëtata llakishqalla mana kakunampaq?
12 Jeremïaspaqqa ruranqankuna alläpa kushikïpaqmi karqan. Tsëmi Jehoväta kënö nirqan: “Parlakïnikikunata tarïkurmi mikukurkurqä, y parlanqëkiqa noqapaq kushikïpaqmi y shonqö kushitseqmi karqan; tröpakunapa mandaqnin Jehová, qampa shutikipam reqishqa karqö” (Jer. 15:16). Kë profëtapaqqa manam imapis kaqtsu Diospa shutimpa reqishqa kënöqa, y Palabrampita willakïnöqa. Itsa nunakuna burlakuyaptinqa llakikureq, pero Diospa willakïnin alläpa shumaq y alläpa preciso kanqanman yarpärirqa kushikoqmi (Jer. 20:8, 9).
13. Imëpis kushishqalla kanapaq, ¿imanirtaq Bibliapita alli yachakunantsik?
13 Kushishqa yachatsikunapaqqa, “imeca chucru miquicunata micoq” cuentam Diospa Palabrampita alli yachakunantsik (Heb. 5:14). Tsëmi markäkïnintsikta o yärakuynintsikta sinchiyätsinqa (Col. 2:6, 7). Hinamampis, tsëwanmi musyantsik ruranqantsikta Jehová alläpa valoranqanta. Tsëmi, Bibliata leinapaq y estudianapaq tiempota mana tarirqa, huk horariota patsätsinantsik. Cada hunaq ichik minütokunallapis estudiar y tsëman yarpararqa, Jehoväpa lädonchömi këkäshun y Jeremïasnömi shonquntsikchö alläpa kushikushun.
14, 15. a) ¿Jeremías yachatsikunqan allipaqtsuraq karqan? b) ¿Imanötaq rikantsik yachatsikïta?
14 Jeremías Jehoväpa piñakïnin hunaqpita willakurnimpis, manam qonqarqantsu “winatsinampaq y murunampaq” churashqa kanqanta (Jer. 1:10). Tsë willakï alläpa preciso kanqanqa rikakärirqan 607 wata Jerusalén ushakanqanchömi, manam wakin judïokunallatsu salvakuyarqan, sinöqa huk markakunapita mana judío kaq nunakunapis salvakuyarqanmi, tsëchömi këkäyarqan recabïtakuna y Ëbed-mëlecpis (Jer. 35:19; 39:15-18; 43:5-7). Kanan tiempontsikchö, ¿pikunataq kayan Jeremïaspa amïgon recabïtakunanö y Ëbed-mëlecnö? Kë Patsachö kawaqpaq kaq cristiänokunam. Pëkunam kanan tiempo “Jeremïaspa” amïgonkuna kayan. ¡Imanömi kushikun kanan kaq Jeremías “mana yupetapis puedipaq” cristiänokunata yanaparnin! (Apo. 7:9.) Y kë cristiänokunanam, kushikuyan alli shonquyoq nunakunata Diosta reqiyänampaq yanaparnin.
15 Cristiänokunaqa musyantsikmi yachatsikunqantsik Diosta adorë kanqanta, y manam nunakunata yanapëllatsu. Tsëmi nunakuna wiyamashqa o mana wiyamashqapis, yachatsikunqantsikqa alläpa kushitsimantsik (Sal. 71:23; lei Romanos 1:9).
Ama punukäshuntsu y mandamanqantsikta imëpis rurëkäshun
16, 17. ¿Imanötaq rikätsikun Apocalipsis 17:10 y Habacuc 2:3 ushanan hunaqkunachöna kawanqantsikta?
16 Imanö tiempochöpis kawëkanqantsikta más alli tantianapaqqa yanapamantsik Apocalipsis 17:10 ninqanmi. Tsëchömi parlan qanchis kaq reypaq, y kë reyqa Gran Bretäñawan Estados Unidos nacionkunam kayan, pëkunam kanan tiempontsikchö gobernëkäyan. Hinamampis, willamantsik ‘pepa mandaquinenqa pocu tiempulla’ karinantam. Kanan kamayaqqa, tsë ‘pocu tiempu’ ushakëkanmannam. Profeta Habacucqa willamantsik ‘kë revelación, shamoq tiempopaqraqmi’ nishpam. Tsëpitanam kënö nirqan: “Tardeyämuptimpis mäkoq mäkoq rikachakurllana këkë; rasumpam chämunqa. Manam tardetsu chämunqa” (Hab. 2:3).
17 Kënö tapukurishun: “¿Kawakunqä rikätsikunku ushanan tiempokunachö këkanqäta y tsëman rasumpa creinqäta? ¿O pensanqäkunawan y ruranqäkunawanku rikätsikö mana shamunanman creinqäta o mana yarpanqäta?”.
18, 19. ¿Imanirtaq kananqa qelanäkurina tiempotsu?
18 Ciëlopaq akrashqakunaqa manaran ushayashqaraqtsu rurëninkunata (lei Jeremías 1:17-19c). ¡Imanö kushikïpaqmi pëkunata ‘mana ishkeq alli rurashqa markatanö y hierropita huk columnatanö’ tsarakoqta rikëqa. Pëkunaqa, ‘tseqllancunata alli watashqa cuentam’ Diosnintsikpa Palabranwan alli tsarakuyan, tsënöpa rurëninkunata ushayänampaq (Efe. 6:14). Hina tsënöllam kë Patsachö kawaqpaq kaqkunapis shonqupita patsë yanapayan rurëninkunata cumpliyänampaq.
19 Kananqa manam Diospa Gobiernompita yachatsikïta qelanäkurina witsantsu, sinöqa Jeremías 12:5 (leid) ninqanman pensana witsanmi. Llapantsikpam tukï problëmakunawan markäkïnintsik pruëbaman churakan. Tsëkunachö tsarakïqa, imëka ‘chakipa correq nunakunawan’ gananakïnömi. Pero manam tsëllatsu, ‘hatun hipakïkuna’ chämunqanmannömi más problëmakuna kanqa (Mat. 24:21). Alläpa feom kanqa tsë hunaqchö tsarakunapaqqa, huk cabällota gananapaqnömi alli sinchikunantsik. Y huk cabällota cörrichö gananapaqqa allim tsarakunantsik. Tsëmi kanan tukï mana allikunata pasanqantsikqa yanapëkämantsik shamoq pruëbakunachö alli tsarakunapaq.
20. ¿Imanö këkänapaqtaq churapakashqa këkantsik?
20 Jeremïasnömi noqantsikpis alli yachatsikoq kashwan. Kuyakoq kanqan, mana mantsapakunqan y kushishqa kanqanmi 67 watapa Jehová mandanqanta ruranampaq yanaparqan. Y wëtëkaq almendrom yarpätsimantsik Jehová Palabranta cumplinanrëkur riyëkanqanllata. Noqantsikpis allim musyantsik riyëkänapaq kaqta. Jeremïasnöpis rurëta puëdentsikmi.
[Päginapa ura kuchunchö willakïkuna]
a Jeremías 8:21: “Markäpa warmi wambran hipanqanrëkurmi alläpa llakikö. Llakishqam këkä. Pasëpa mantsakashqam këkä”.
b Jeremías 9:1: “¡Oh, pëqalla yaku këkunman, y nawïna yaku pashtaq këkunman! Tsënö kaptinqa, markäpa warmi wambrampa wanushqankunapaqmi paqasta hunaqta waqäman”.
c Jeremías 1:17-19: “Y qamqa tseqllëkitam alleq watanëki, y tsëpitam sharkur llapan mandanqäkunata parlapänëki. Ama pëkunapitaqa ichikllapis mantsapakunkitsu, pëkunapa puntanchö noqa mana mantsakätsinäpaq. Y noqam qampita kanan rurarqö mana ishkeq markata, y hierropita huk columnata, y cobrepita perqakunata kë nacionpa contran, Judächö reykunapa, principenkunapa, sacerdotenkunapa y Patsachö nunakunapa contran. Qampa contrëkiqa peleayanqam, pero manam qamtaqa venceyäshunkitsu, ‘noqam qamwan këkä libranaqpaq— këtam Jehová nin’”.
d Jeremías 12:5: “Chakipa correq nunakunawanmi cörrerqunki, y pasëpam utitsiyäshurqunki, tsëqa, ¿imanötaq cabällokunawan kanan cörrinkiman? Si alli patsachöpis segürotsu sientikunki, ¿imataraq rurankiman Jordan kuchunchu montikunachönäqa?”.
¿Yarpankiku?
• ¿Imanötaq Jeremïasta kuyakïnin yanaparqan mana punukashpa Jehová mandanqanta cumplinampaq?
• ¿Imanirtaq Jehová kallpata qomänata wanantsik?
• ¿Imataq Jeremïasta yanaparqan kushikïnin mana ushakänampaq?
• ¿Imanirtaq imëpis riyëkänantsik?
[26 kaq päginachö dibüjukuna]
¿Chikimashqapis yachatsikïkäshunllatsuraq?