Këmi herenciantsik

1. ¿Imatataq Jehová kanankamayaq katsishqa nunakunata kuyarnin?

“MANA ushakaq y kawëkaq Dios” Jehovämi nimantsik mana wanushpa kawëta tarinapaq imata ruranatapis. Tsënö nimanqantsikqa manam imëpis cambianqatsu, porque “Jehová parlanqankunaqa imëkamayaqpis tsarakunmi” (1 Ped. 1:23-25, NM). ¡Alläpam agradecikuntsik tsë parlanqankunata Bibliachö kanankamayaq Diosnintsik kuyamarnintsik katsinqanta!

2. ¿Imatataq Palabran Bibliachö Jehová katsishqa markan utilizänanrëkur?

² Diosnintsikqa sirweqninkuna jutinta utilizäyänantam munan, tsëmi Palabran Bibliapita mana jorqayänampaq cuidashqa. Bibliachöqa Diospa jutinta tarir qallëkuntsik “ciëlokunapaq y patsapaq” willakïllachönam (Gén. 2:4). Y chunka mandamientokunata katseq läja rumikunamampis atska kutipam qellqakarqan. Punta kaq mandamientom kënö nir qallan: “Noqam Jehová Diosniki kä” (Éx. 20:1-17). Satanás y nunakuna chipyëpa ushakätsita munëkäyaptimpis, Ciëlochö y Patsachö Autoridadyoq Jehoväqa, Palabranta y jutinta kanankamayaq katsishqa (Sal. 73:28).

3. ¿Imatataq Jehová cuidashqa kanan witsan aktsimänantsikpaq?

³ Jina Palabranchö këkaq rasumpa kaqtam, imapis mana ushakätsinampaq Jehoväqa cuidashqa. Y kushikuntsikmi, rasumpa kaqwan aktsimanqantsik nänipa ëwar (lei Salmo 43:3, 4a). Llapan nunakuna mana rasun kaq yachatsikïkunawan paqaschönö këkäyaptimpis, noqantsikqa Diospa rasumpa kaq yachatsikïninwan aktsiyoq cuenta këkantsik (1 Juan 1:6, 7).

IMAWAMPIS MANA IGUALAQ HERENCIANTSIKMI KAPAMANTSIK

4, 5. ¿Ima jutipanataq reqishqa karquntsik 1931 watapita patsë?

⁴ Rasumpa kaq cristiänokunapaqqa imawampis mana igualaq herenciantsikmi kapamantsik. Këta maslla entiendirinapaq, juk markallachö täraq nunakunapaqa, portakïninkuna, costumbrenkuna, y kawakïninkunachö imatapis rurayanqanqa casi igual-llam kanman. ¿Imanir?, teytankuna y awilunkuna tsënö kawakuyänampaq yachatsiyashqa kayaptin. Tsëtam herencia kanqanta nintsik. Tsënöllam Jehová qomanqantsik herenciachöqa këkan, Palabranta alleq entiendinqantsik y kikimpita y munënimpita rasumpa kaqta alleq claro musyanqantsik. Jina tsëpitapis masran, juk shumaq herenciantsik kapamantsik.

⁵ Tsë herenciantsik ima kanqantaqa musyarirqantsik Columbus (Ohio) nishqan markachö, 1931 wata juk asamblea rurakanqanchömi. Tsë asamblëapa programanchömi JW letrakuna këkarqan. Juk panim këta nirqan: “Turikuna y nanakunaqa tsë letrakuna ima ninan kanqanta musyëta munarmi adivinëta procurayarqan”. Pero 26 de julio domingo junaqmi ima ninan kanqan musyakärirqan. Mananam Bibliata Estudiaqkuna nishpanatsu reqishqa kanantsik karqan, sinöqa Biblia ninqannömi, Jehoväpa testïgonkuna nishpana (inglés idiömachöqa Jehovah’s Witnesses ninmi). ¡Kushikïpaq junaqmi karqan! (Lei Isaías 43:12.b) Juk wawqim këta yarpan: “Tsë localchö këkaqkuna alläpa kushikuyanqanta y pasëpa paqchiyanqantaqa o taqllayanqantaqa manam imëpis qonqashaqtsu”. Tsënö jutishqa këtaqa manam juk religionkunaqa munayarqantsu, pero noqantsikqa 80 watakunapitapis masnam tsë jutipa reqishqa këkantsik. ¡Imanö kushikïpaqmi Jehoväpa testïgon këqa!

6. ¿Ima willakïkunataq herenciantsik kayan?

⁶ Jina juk herenciantsikqa, pasakunqantanölla willakoq y precisaq willakïkunata Bibliachö tarinqantsikmi. Abrahanman, Isaacman y Jacobman pensarishun. Kë nunakunaqa y familiankunaqa parlayarqanchi Jehoväta imanö kushitsiyänampaq kaqta. Tsëchi Josëqa Potifarpa warmin punukushun niptin munarqantsu, y tsënöpa Diospa contranchö ‘jutsallakurqantsu’ (Gén. 39:7-9). Y apostolkuna kawayanqan witsanchöqa, cristiänokunapa costumbrenkunataqa yachatsikuyaq parlëllapa o rurëninkunawanmi, tsëtam rikantsik Señorpa Cënampaq yachatsikur congregacionkunata Pablu ninqanchö (1 Cor. 11:2, 23). Kanan witsan “Santu Espiritu yanapamashqa rasonpa” Diosta adoranapaqqa Bibliachö qellqarëkaqkunam yanapamantsik (lei Juan 4:23, 24). Llapan nunakuna Bibliapa yachatsikïninchö yanapakïkunata tarita puëdiyaptimpis, noqantsikmi tsë yachatsikïkunataqa más precisaqpaq churantsik.

7. ¿Diosnintsik imata awnimanqantsiktaq herenciantsik?

⁷ Jina juk herenciantsikqa, Jehová noqantsikwan këkanqanta rikätsikoq willakïkunam (Sal. 118:7). Publicacionkunachö tsë willakïkunata leirqa, chikir qatikachämashqapis segürom sientikuntsik. Palabranchömi Diosnintsik këta awnimantsik: “Imëka armapis contrëki churakaqqa manam imanäshunkitsu, y juk juiciochö qampa contrëki pipis parlaptinqa, condenarinkim. Këmi Jehoväpa sirweqninkunapa herencianqa, y alli rurëninkunaqa noqapitam shamun”, awmi, tsëmi herenciantsik (Is. 54:17). Satanaspa ni mëqan armampis manam ushakätsimäshuntsu.

8. ¿Imapitataq kë yachatsikïchö y qateqnin kaqchö yachakushun?

⁸ Satanasqa tukïnöpam Diospa palabranta, jutinta, y rasumpa kaq yachatsikïta ushakätsita munashqa. Pero Jehoväwanqa manam puëdintsu, tsëmi Satanaspa mana alli munëninkuna cumplikänanta Jehová permitishqatsu. Kë yachatsikïchö y qateqnin kaqchömi rikäshun, 1) Palabranta Jehová imanö cuidanqanta, 2) jutinta reqinantsikrëkur imata ruranqanta y 3) rasumpa kaqta kanan witsan katsinapaq imata ruranqanta.

PALABRANTAM JEHOVÁ CUIDASHQA

9-11. ¿Imataq rikätsimantsik tukïnöpa Bibliata ushakätsita munëkarpis mana puëdiyanqanta?

⁹ Ushakätsita munayaptinmi Jehoväqa palabranta cuidashqa. Enciclopedia Cattolica librom këta nin: “1229 wata, albigenses y valdenses nishqankunapa contran guërrata rurëkëyaptinmi, Concilio de Toulouse nishqan prohibirqan laicokuna [idïomankunachö parlaq Bibliata] mana utilizäyänampaq [...]. Jina tsënöllam rurarqan Concilio de Tarragona nishqampis, 1234 watachö Jaime I acuerdota rurariptin. [...] Y 1559 watachönam Pablo IV, Índice de libros prohibidos nishqanchö qellqariptin, Sede de Roma nishqan mandakurqan, Santo Oficio mana aprobëkaptinqa, Bibliakunata mana imprimiyänampaq ni mana katsiyänampaq”.

¹⁰ Tukïnöpa ushakätsita munëkäyaptimpis kanankamayaqmi Bibliaqa këkanlla. 1382 watakuna witsanmi John Wyclef y yanapaqninkuna, inglés idiömachö yarqamoq puntaq kaq Bibliata traduciyarqan. Jina Bibliata juk traduceqqa karqan, 1536 watachö wanutsiyanqan William Tyndale jutiyoq nunam. Wanunampaqna postechö watarëkarshi, këta ninaq: “Señor, Inglaterra reypa nawinta kichëkullë”. Tsëpitanam jurkariyarqan y ninawan kayëkurqan.

¹¹ Bibliapa chikeqninkunaqa mëtsikaqmi kashqa, pero manam ushakätsita puëdiyashqatsu. Këllaman yarpärishun, 1535 watachömi Miles Coverdale jutiyoq nuna Bibliata traducirirqan. Mushoq Testamentota y Genesispita hasta Crónicas libroyaq Tyndale traducinqampa yanapakïninwanmi traducirqan. Jina Bibliapa wakin kaq libronkunataqa, latín idiömaman traducishqa Bibliapa y Martín Lutero alemán idiömaman traducinqan Bibliapa yanapakïninwanmi traducirqan. Kanan witsampis, alleq claro kaptin, punta qellqakanqannölla kaptin y Diospita yachatsikunapaq fäcil-lla kaptinmi Traducción del Nuevo Mundo de las Santas Escrituras nishqan Bibliataqa mëtsikaq nunakuna precisaqpaq churayan. Alläpam kushikuntsik, Jehová cuidanqan Palabrantaqa, ni Satanás ni pï nunapis, ushakätsita mana puëdinqanta.

JEHOVÄMI JUTINTA CUIDASHQA

12. ¿Imanötaq Traducción del Nuevo Mundo nishqan Biblia yanapakushqa Diospa jutinta katsirnin?

¹² Jehoväqa Palabran Bibliachömi jutinta katsishqa, y tsëpaqqa Traducción del Nuevo Mundo Bibliam allipa yanapakushqa. Traduccionta rikaq comitëmi alläpa trabajashqa, y español idiomachö Bibliapa qallanan päginachömi këta nin: “Kë Bibliapa más precisaq rurëninqa, Bibliata qellqaqkuna Diospa jutinta churayanqan sitioman llapanta kutitsinqanmi. Tsëqa rurakashqa Escrituras Hebrëasman 6.973 kutikuna y Escrituras Griegas Cristiänasman 237 kutikunapa español idiömachö ‘Jehová’ nir parlakanqannö jutita churarninmi”. Traducción del Nuevo Mundo nishqan Bibliataqa, llapanta kar o pullanllata karpis 116 idiömakunamanmi traducikashqa, jina 178.545.862 Bibliakunam imprimikämushqa.

13. ¿Imanirtaq seguro kashwan nunakuna kawar qallanqampita patsë Diospa jutin reqishqa kanqanta?

¹³ Kë Patsachö nunakuna kawar qallanqampita patsëmi Diospa jutinqa utilizakashqa. Adanwan Ëvaqa tsë jutita reqiyarqanmi y Bibliapis willakunmi utilizäyanqanta. Y Apäkï Tamya kanqampita ichik tiempo pasariptinmi, Noëpa tsurin Cam portakïninwan teytanta respetarqantsu, tsëmi Noe këta nirqan: “Bendecishqa katsun Jehová, Sempa Diosnin, y Canaán [Campa tsurin] pëpa esclävon katsun” (Gén. 4:1; 9:26). Kikin Diosmi nirqan: “Noqam Jehová kä. Tsëmi jutï; y manam ni pitapis qoshaqtsu gloriäta”. Jina nirqanmi: “Noqam Jehoväqa kä, y manam jukqa kantsu. Noqallam Dios kä y manam jukqa kantsu” (Is. 42:8; 45:5). Llapan nunakuna reqiyänanrëkurmi Jehoväqa jutinta kanankamayaq katsishqa. ¿Manaku jutinta apar y Testïgon kar orgulloso sientikuntsik? (Sal. 20:5.)

14. Bibliachö Diospa jutin yuriptimpis, ¿mëchötaq más tarishwan?

¹⁴ Manam Bibliallachötsu Diospa jutinqa yurin. Inti yarqamunan lädomampa këkaq Mar Muerto nishqampita 21 kilömetroschö këkaq Dhiban (Dibón) markachö tarikashqa Estela de Mesäpaq o Piedra Moabïtapaq parlarishun. Kë rumichömi Israelpa reynin Omrí nunapa jutin y Israelpa contranchö sharkuyanqampita Moabpa reynin Mesá parlanqampis qellqarëkan (1 Rey. 16:28; 2 Rey. 1:1; 3:4, 5). Pero kë rumitaqa más precisaqpaq kanqanta rikätsikun Hebreo idiömachö chusku letrakuna o Tetragrámaton këkanqanmi, y tsë letrakunaqa Diospa jutinmi. Jina Lakispa Cartankunachöpis atska kutipam tsë Tetragrámaton yurin, tsëtaqa tariyarqan Israelchömi mankanö cösaskunapa pakipinkunachö.

15. ¿Imataq Septuaginta, y imanirtaq rurakarqan?

¹⁵ Puntata Bibliata traduceqkunaqa Diospa jutin mana qonqakänampaqmi alläpa yanapakuyarqan. Jesus manaraq shamushqan 607 watapita hasta 537 watayaqmi judïokunaqa Babiloniachö esclavo kayarqan, pero 537 watachöqa mëtsikaqmi markankunata kutikuyarqantsu. Kima pachak watakunaraq Jesus shamunampaq pishikaptinmi, Egiptochö këkaq Alejandría markachö mëtsikaq täraq judïokunaqa hebreo idiömachö qellqarëkaq Diospa palabranta, idiömankunachö kananta necesitäyarqan, porque parlayanqan griego idiömataqa atska nacionkunachömi tsë witsankunapaq parlayaq. Griego idiömaman traducïtaqa ushayarqan ishkë pachak watakunaraq Jesus shamunampaq pishikaptinmi, y tsëtam reqiyarqan Septuaginta nishpa. Tsëpita jorqayanqan wakin copiakunachöpis hebreo idiömachö Jehoväpa jutin yurinmi.

16. Willakaramï 1640 watachö punta kaq libro yarqunqanchö Diospa jutinta imanö utilizakanqanta.

¹⁶ Jina Diospa jutinqa Bay Psalm Book (Libro de Salmos de la Bahía) nishqan librochöpis yurinmi, tsë punta kaq librotaqa jorqayarqan América del Nortepa poderninchö këkaq markakunachömi. 1640 watachö rurakanqan y imprimikanqan librochöqa, tsë witsanchö parlayanqan inglés idiömaman Hebreo idiömapita traducikashqa Salmos librom këkan. Salmo 1:1 y 2 textokunachömi Diospa jutinta utilizan, y ninmi, “kushishqa nunaqa” manam mana alli nunakunapa consëjonchö purintsu, sinöqa Jehoväpa leynin ninqanta rurëtam alläpa munëkun. Diospa jutimpita masllata musyanapaqqa El nombre divino que durará para siempre nishqan follëtotam rikärishwan.

JEHOVÄQA RASUMPA KAQ YACHATSIKÏNINTAM CUIDAN

17, 18. a) ¿Qampaqqa ima ninantaq rasumpa kaq palabra? b) ¿Imataq ‘rasonpa alli willaquiqa’?

¹⁷ “Rasumpa kaq Dios” Jehovätam kushishqa sirwintsik (Sal. 31:5). Rasumpa kaq palabra ima ninan kanqantam Diccionario de uso del español de América y España nishqanmi kënö nin: “Pasakunqan kaq o rasumpa kaqmi, pensanqantsikllapitaqa alläpa jukläyam”. Hebreo idiömachö Biblia “rasumpa kaq” nirqa rikätsikun, confiakïpaq, imëpis rasumpa kanqan, imëpis cumpleq o imëpis rasumpa kaqta rikätsikoqtam. Y griego idiömachönam rikätsikun, pasakunqantanölla willakoq, alli ruraq y imëpis mana pantëpa rurë kanqanta.

¹⁸ Bibliachö këkaq rasumpa kaq yachatsikïtam Jehoväqa cuidashqa, y tukïkunatam rurashqa tsë yachatsikïkunata más entiendinapaq (2 Juan 1, 2). Tsë rasumpa kaqkunataqa mastanam entiendintsik, porque “alli ruraqkunapa kawëninqa patsa warämuptin atsikyënö[mi], y hora ëwanqanmannömi más y más atsikyan imëkapis rikakanqanyaq” (Prov. 4:18). Noqantsikpis Jesucristunömi pensantsik, pëmi Diosta mañakunqanchö këta nirqan: “Palabrëkiqa rasumpa kaqllam” (Juan 17:17, NM). Jehoväpa qellqarëkaq Palabranqa “rasonpa alli willaqui[tam]” katsin, o juk parlakïchöqa, cristiänokunapaq rasumpa kaq yachatsikïkunata (Gal. 2:14). Tsë yachatsikïkunachömi këkan, Jehoväpa jutimpita, autoridadyoq kanqampita, imarëkur Jesucristu wanunqampita, wanushqakuna kawariyämunampaq kaqpita y Diospa gobiernompita willakïkuna. Qateqninchömi rikärishun rasumpa yachatsikïkunata, Satanás tukïnöpa pakëkaptimpis Dios imanö cuidanqanta.

RASUMPA KAQTA USHAKÄTSITA MUNAYAPTINMI JEHOVÁ TSAPARQAN

19, 20. ¿Pitaq karqan Nemrod, y imata rurëta munanqantaq yarqapurqantsu?

¹⁹ Apäkï Tamya kanqampita ichik tiempo pasariptinmi, kënö parlayaq: “Nemrodnö, Jehoväpa contranchö alläpa puëdeq casador” (Gén. 10:9). Nemrodqa, Jehoväpa chikeqninmi karqan, y Jesuspa chikeqninkunanöpis Satanastam adoraq. Tsëmi Jesus kënö nirqan: “Qamcunapa tëtequicunaqa diablum. Pepa carmi, gustunta ruraquicayanqui. [...] pëchoqa [manam] ni ima rasonpa caq cantsu” (Juan 8:44).

²⁰ Nemrodqa Babelta, y Tigris y Éufrates mayu kuchunchö këkaq markakunatam controlarqan (Gén. 10:10). Capazchi 2269 watakuna Jesus shamunampaq pishikaptin, Nemrodqa mandakurqan Babel markata rurayänampaq y törrenta shäritsiyänampaq. Pero Jehoväqa munarqan nunakuna mirarnin entero Patsaman juntayänantam, pero törreta ruraqkunaqa Jehoväpa contranchö këkäyanqanta rikätsikurmi kënö niyarqan: “¡Aku! Juk markata y ciëlokunaman puntan chanqanyaq törretawan rurashun, tsënöpa jutintsik reqishqa kanampaq, entero patsapa mana ramakänantsikrëkur”. Pero Jehoväpa contranchö tsënö rurayanqanqa mana allim yarqurqan, porque Jehovämi nunakunapa parlëninkunata tukï idiömakunaman tumakäratsirqan, y tsënöpam törreta sharkatsita munaqkunaqa entero Patsapa rakikar ëwakuyarqan (Gén. 11:1-4, 8, 9). Adorayänanta munar Satanás juk religionta patsätsita munashqa kaptinqa, munëninqa pasëpa penqakïchömi quedarqan. Pero Jehoväta adorëtaqa unëpita pasëmi imapis ushakätsita puëdishqatsu, y masran mirëkampis.

21, 22. a) ¿Imanirtaq mana alli kaq religionqa rasumpa kaq religionta ushakätsita puëdishqatsu? b) ¿Imapitataq yachakushun qateqnin yachatsikïchö?

²¹ Rasumpëpaqa, mana alli kaq religionqa manam imëpis rasumpa kaq religionta peligroman churashqatsu. ¿Imanir? Porque Alli Yachatsimaqnintsikmi tukïta rurashqa qellqarëkaq Palabranta cuidanampaq, nunakuna jutinta reqiyänampaq y rasumpa kaqta yachakuyänampaq (Is. 30:20, 21). Dios munanqannö sirwirninqa alläpam kushikuntsik. Tsëmi Diospa kaqchö mäkoq mäkoqlla këkänantsik, Jehoväman chipyëpa confiakunantsik y santo espíritu pushamänantsiktapis dejanantsik.

²² Qateqnin kaq yachatsikïchömi yachakurishun mana alli creenciakuna imanö yurimunqanta, y Diospa Palabranta alleq yachakushqaqa, tsë yachatsikïkuna penqakïpaq quedanqanta. Jinamampis rikäshunmi, rasumpa kaqta katseq Jehová mëtsika yachatsikïkunawan bendecimanqantsikta y tsë herenciantsik kanqanta.