¿Religionman confiakïta puëdintsikku? Guërrachö
Albertum cäsi chunka watapa Ejercituchö sirwirqan, pëmi kënö nir willakun: “Cüram bendiciyämarnï kënö niyämarqan: ‘Diosqa qamkunawanmi këkan’. Peru Bibliachö: ‘Ama pitapis wanutsinkitsu’ nikaptinqa, ¿imanirtaq wanutsikoq ëwä? nirmi tapukoq kä”.
Ishkë kaq Jatun Guërrachömi Rayqa soldädunö sirwirqan. Juk kutim cürata kënö tapurqan: “Barcökunaman lloqarkamur soldädukunapaq y ganayänapaqmi qamqa rezakamunki. Peru ¿manaku tsënölla rurayan contramaqnintsikpa cürankunapis?”. Tsënö niptinnash nirqan señornintsikpa rurëninkunaqa mana entiendipaqnö kanqanta.
¿Manaku tsënö ninqanta entiendinki? Ama yarpachakïtsu, tsëqa manam qamllatatsu pasashunki.
¿IMATATAQ BIBLIA YACHATSIKUN?
“Nuna mayiquita cuyanqui quiquiquitano” neq juknin kaq mas precisaq mandamientu kanqantam Jesusqa nirqan (Marcus 12:31). ¿Juk nacionllapita nuna mayintsikta kuyanapaqku Jesusqa nikarqan? Manam tsëtatsu nikarqan. Discïpulunkunatam kënö nirqan: “Sitsun qamcuna jucniqui jucniqui cuyanacuyanqui, llapan nunacunam musyariyanqa noqapa disipulücuna cayanqequita” (Juan 13:34, 35). Rasumpa kuyakïninkunallam rikätsikunman karqan wakinkunapita jukläya kayanqanta. Y manam nuna (runa) mayinkunata wanutsita munayanmantsu karqan, antis pëkunarëkurmi hasta wanuriyanmampis karqan.
Y tsënömi rurayarqan. Tsëpaq parlaq juk librum kënö nin: “Iglesiata punta qallatseq Tertuliano y Orïgenes nunakunam niyarqan cristiänukunaqa, nunata wanutsita mana puëdiyanqanta, tsërëkur Röma ejercituchö sirwita mana puëdiyanqanta” (The Encyclopedia of Religion).
¿IMATARAQ NISHWAN JEHOVÄPA TESTÏGUNKUNAPITA?
Cäsi entëru nacionkunachömi Jehoväpa testïgukunaqa këkäyan. Guërra kaptinqa, Testïgukunaqa imëkatam rurayan kikinkunapura kuyanakuyanqanta rikätsinakuyänampaq.
¿Cristiänukuna imanö rasumpa kuyanakuyänampaq kaqta religionkuna yachatsikuyashqaku?
Tantiyarinapaq, 1994 wata Ruanda nacionpita hutus y tutsis kastakuna chikinakur wanutsinakuyaptinmi, Jehoväpa testïgunkunaqa ni mëqanmampis qaqäyarqantsu. Kawëninkunatapis peligruman churarmi juk kastapita Testïgukuna, juk kaq kastapita Testïgukunata pakäyarqan. Hutus kastapita ishkë Jehoväpa testïgunkunam, tutsis kastapita cristiänu mayinkunata pakäyarqan, y milicia Interahamwe nishqan soldädukuna tsëta musyëkurmi, “tutsiskunata yanapayanqëkirëkurmi kë pasayäshunki” nir ishkanta wanuratsiyarqan (Juan 15:13).
¿Imataq parecishunki? ¿Rasumpa kuyakïpaq Jesus parlanqanwan tsënö rurayanqankuna igualanku?