BIBLIAPITA TAPUKÏKUNA
¿Llapan religionkunaku Diospita shamun?
Noticiakunata wiyarqa, itsa cuentata qokurqunki höraqa imëka mana allikunata rurayänampaq religionta utilisäyanqanta. Rasumpa kaqchöqa, manam llapan religionkunatsu Diospita shamun (Mateu 7:15). Cäsi llapan nunakuna engañashqa kawakuyan. (Leyi 1 Juan 5:19.)
Tsënö kaptimpis, Diosqa musyanmi alli shonquyoq nunakuna rasumpa kaqta y alli kaqta kuyaqkuna kayanqantaraq (Juan 4:23). Tsëmi, invitan Palabran Bibliachö rasumpa kaqta ashiyänampaq. (Leyi 1 Timoteu 2:3-5.)
¿Imanötaq reqinkiman rasumpa kaq religionta?
Jehoväqa juntëkan tukïläya religionyoq nunakunatam. ¿Imanö? Rasumpa kaqpita y juknimpis juknimpis kuyanakuyänampaq yachatsirninmi (Miquëas 4:2, 3). Tsëmi, rasumpa kaq religionchö pikuna këkäyanqantaqa reqinki kuyanakuyanqampita. (Leyi Juan 13:35.)
Jehoväqa rasumpa kaq religiontam utilisan tukïläya nunakunata juntanampaq. (Salmu 133:1)
Diosta rasumpa sirweqkunaqa Bibliapa yachatsikïninmanmi creiyan y mandakunqantam cäsukuyan (2 Timoteu 3:16). Diospa jutintam respetayan (Salmu 83:18). Jina, Diospa Gobiernunlla nunakunapa problëmankunata altsamunampaq kaqtam yachatsikuyan (Daniel 2:44). Y Jesus ruranqannöllam, lamparin aktsikoq cuenta nunakunata yanapëkäyan (Mateu 5:16). Tsëmi, vecïnïkikunata watukarnin Diospa Gobiernun imëka allikunata ruramunampaq kaqta yachatsikuyaptin, pëkunata mas fäcil-lla reqirinki. (Leyi Mateu 24:14; Hëchus 5:42 y 20:20.)