¿Diabluqa nunakunapa mana alli munëninllaku?

Mëtsikaqmi pensayan Diablupaq Biblia ninqanqa, nunakunapa mana alli munëninlla kanqanta. Peru tsë rasumpa kaptinqa, ¿imanirtaq Bibliaqa nin Jesuswan y Dioswan parlanqanta? Tsëpita maslla yachakurishun.

JESUSWAN PARLANQAN

Jesus Bautisakurinqampita ichik tiempullatam, Diablu kima kutipa tentarqan. Puntataqa, Satanasqa nirqan Jesus kikimpa munëninllapaq Dios qonqan kallpata utilisänampaqmi; rumita tantaman tikratsirnin. Tsëpitanam, nunakuna alabayänanrëkur kawëninta peligruman churanampaq nirqan. Y ushanampaqnam, entëru mundupa mandaqnin kanampaq änirqan, peru tsëpaqqa qonqurïkur adorëkunantam munarqan. Tsë tentacionkunapitam Jesusqa alli tsarakurqan y Diospa Palabran ninqanwanmi contestarqan (Mateu 4:1-11; Lücas 4:1-13).

¿Piwantaq Jesus parlëkarqan? ¿Kikimpa mana alli munëninwanku? Manam. Bibliaqa willakun pë jutsannaq kanqantam, tsënö karpis noqantsiknöllam tukïläya pruëbakunapa pasarqan (Hebrëus 4:15). Tsëmi, ‘pëqa ni ima jutsatapis rurarqantsu, ni ulikurqantsu’ (1 Pëdru 2:22). Jesusqa manam kikimpa mana alli munëninllawantsu parlëkarqan, porqui manam pëchöqa mana alli kantsu; pëqa jutsannaq y Diosllapaqmi karqan, tsëmi pëqa parlëkarqan rasumpa kawaq espïrituwan.

Peru manam tsë pasakunqanllatsu rikätsikun Diablu kanqanta:

• Yarpë, entëru mundupa llapan reinunkunatam Diabluqa Jesusta änirqan, tsëpaqmi pëman qonqurïkur adorëkunantam munarqan (Mateu 4:8, 9). Diablu rasumpa mana kaptinqa, manam tsëta ninmantsu kanqan. Jinamampis, Jesusqa manam negarqantsu Diablu mandakoq kanqanta.

• Jesuswan parlar usharirllam, Diabluqa “eucorqan yape cutinanpaq caqta yarparar” (Lücas 4:13). Mana alli munëlla karqa manam tsëta rurëta puëdinmantsu karqan. Juk rasumpa kawëyoqllam tsëta ruran.

• Tsëpitanam, Mateu 4:11 textu ninqannö ‘anjelcuna yurircur’ Jesusta yanapariyarqan. Këmi rikätsikun angelkuna rasumpa kayanqanta. Tsëqa, ¿imanirtaq pensashwan Diablu mana kanqanta?

DIOSWAN PARLANQAN

Kananqa yachakurishun Diospa sirweqnin Jobpita. Tsëchömi rikäshun ishkë kuti Dioswan Diablu parlayanqanta. Ishkan kutichömi Diosqa parlarqan sirweqnin pëllapaq kanqanta. Diabluqa Jobta alli reqeqnömi nirqan imatapis chaskinanrëkurlla Diosta sirwinqanta. Tsëmi, Jehoväqa jaqirqan Jobpa imëkankunata qochinanta: kapunqankunata, wamrankunata y salorninta.a Peru musyakärirqanmi Diablu ulikoq kanqan, y Diosqa bendicirqanmi sirweqnin tsarakunqampita (Job 1:6-12; 2:1-7).

¿Jehoväqa parlëkarqan mana alli munëninllawanku? Manam, Bibliaqa “llapanchö alli” kanqantam Diospaqqa nin (2 Samuel 22:31). Jina, “Santum, Santum, Santum canqui, puedeq Dios” ninmi (Apocalipsis 4:8). Santu ninanqa limpiu y jutsannaq ninanmi. Jehovä santu kaptinmi, mana alli rurëqa pëchö kantsu.

Jina wakinnam niyan, Job mana imëpis kawanqanta y pëpita Dioswan Diablu parlayanqanqa rasumpa mana kanqanta. ¿Tsënötsuraq? Manam. Jina Santiägu 5:7-11 textuchöpis Job rasumpa kanqantam rikätsikun. Tsëchömi rikätsimantsik imëkapa pasëkarnimpis markäkïnintsikchö sinchi kanapaq, y tsënö rurashqaqa Jehovä bendicimänapaq. Jobpaqwan Diablupaq Biblia ninqan mana rasumpa kaptinqa, tsë textukunaqa mana rasumpa kaqtam willakïkanman. Jinamampis, Ezequiel 14:14, 20 textuchömi willakun kimaq alli nunakunapaq, ishkaq kaqqa kayan Danielwan Noëmi, y pëkunaqa rasumpam kawayarqan. Y kima kaqnam karqan Job, tsëmi creishwan pë rasumpa kawanqanta. Pë kawashqa kaptinqa, sufritseq chikeqnimpis rasumpam karqan.

Bibliaqa clärum rikätsikun Diablu rasumpa kanqanta. Tsëmi alli kanman kënö tapukunqantsik: “¿Puëdinku noqata y familiata mana allita rurayämëta?”.

¿IMATATAQ DIABLU RURËKAN?

Pensari mana allita ruraq grüpukuna täranqëki markaman chärayämunqanman. ¿Imaraq pasakunman? Mananam segürunatsu kawakunkiman y mana alli rurëmi miranman. Kananqa pensari Diabluwan demoniukuna kë Patsachö këkäyanqanman. ¿Imataq pasakunman? Pensari entëru Patsachö pasakunqan noticiakunata rikanqëkiman.

• ¿Manaku mana alli rurëkunata ushakätsiyänampaq imëkata rurëkäyaptimpis mana alliqa mirakïkanlla?

• ¿Cuentata qokurqunkiku teytakuna yarpachakïkäyaptimpis, kanan witsanqa kushikïkunata akrayanqanchö brujerïalla mas kanqanta?

• ¿Rikarqunkiku cuidayänampaq imëkata rurëkäyaptimpis kë Patsa imanö ushakëkanqanta?

• ¿Manaku parecishunki juk mana alli espïritu nunakunata mana alliman chëkätsinqanta?

Jinamampis, Bibliaqa willamantsikmi imanir mana alli rurëkuna kanqanta, kënömi nin: “Tse culebrataqa que patsamanmi weqaparcayämorqan. Tse culebraqa unepitam cashqa, y jinantin marcacho nunacunatam engañaquican. Tseqa diablum. Petam qaqaqnin caq anjelnincunatawan sielupita weqaparcayämorqan. [...] ¡Peru allau patsacho y lamarcho quecaqcuna, porqui diablum sielupita weqaparcayämushqa captin, y pocu tiempullana engañacur carinanta musyarnin, qamcunapa contrequicuna allapa piñashqa quecan!” (Apocalipsis 12:9, 12). Rikanqantsiknömi Diablupa makinchö kë mundu këkanqanta y alläpa peligrösu kanqanta mëtsikaq cuentata qokuyashqa.

Allim kanman cuidakïta munanqantsikqa. Peru ¿imanötaq rurashwan? Qateqnin kaq yachatsikïchömi tsëta musyarishun.