QARANCHÖ YACHATSIKÏPITA | JEHOVÄPA TESTÏGUNKUNAPITA MANA MUSYANQËKI
¿Imanö cläsi nunakunataq kayan?
Testïgukunaqa entëru Patsachö juk alli patsätsishqa religionmi kayä y manam juk religionkunaman qaqäyätsu. Principal oficïnäkunaqa këkan Estädus Unïduschömi. Peru mëtsikaq Testïgukunam juk nacionkunachö täräyä. Cäsi 8 millonnömi kayä entëru Patsachö, y 230 nacionkunapita maschömi Bibliapita yachatsikuyä. Tsëta rurarmi, Jesus mandakunqanta cumplikäyä, ‘llapancunata alli willaquinïta willayänequim presisan; jinantin nasioncunacho tse alli willaquita musyariyanampaq’ (Mateu 24:14).
Mëchö tärarpis, nacionnïkunapa leyninkunataqa respetayä y cäsukuyämi, peru polïticamanqa manam mëtikuyätsu. Tsëta rurarmi, Jesus mandakunqanta cäsukuyä, ‘qamcunaqa Diosman mana creicoq nunakunanötsu manam cayanqui’ ninqanta. Tsëmi polïticaman ni guërraman mëtikuyätsu (Juan 15:19; 17:16). Tsërëkurmi, Ishkë kaq Jatun Guërra kanqan witsanqa, mëtsikaq Testïgukunata carcelayarqan, maqayarqan y wakintaqa hasta wanutsiyarqan. Alemaniapita unë obispom kënö qellqarqan: “Pëkunallam nita puëdiyan, Adolf Hitler gobernanqan witsan concienciankunarëkur imamampis mana mëtikuyanqantaqa”.
Republica Chëca nacionchö juk periödicum kënö nin: “[Jehoväpa testïgunkunaqa] alläpa alli y respetakoq nunakunam kayan. Tsë nunakunatam precisaq cargukunaman churashwan, peru manam tsëta logrëta puëdishuntsu. [...] Pëkunaqa autoridäkunata respetayanmi, peru Diospa Gobiernunlla nunakunapa problëmankunata ushakätsinampaq kaqmanmi chipyëpa markäkuyan”.
Tsë ninanqa, manam wakin nunakunawan ni imachö mana juntakï ninantsu. Tsëmi Jesusqa discïpulunkunapaq kënö mañakurqan: “Mañakallämö, manam mana alli ruraq nunakunapita jorqarinëkipaqtsu” (Juan 17:15, NM). Tsëmi, wakin vecïnükunanölla trabajayä, rantipakoq y estudiaqpis ëwayä.