¿Imanöraq Diosnintsikqa kuyashunqëkita rikätsishunki?
Diosnintsikqa kikinlla kachakëta puëdinampaqmi cuerpuntsikta ruramushqa. Tsëmi roqukurishqa, takakurir raspakurishqa o imallatapis rurakurishqaqa, juk doctor ninqannö tsë höra cuerpuntsikchö kaqkuna funcionar qallëkun, herïdantsik kikinlla kachakänampaq. Cuerpuntsikqa rasllam imëkata ruran alläpa yawarta mana oqranapaq y tsënöpa herïdantsikkuna tsakinampaq y kachakärinampaq.
KËMAN PENSARI: Kikinlla kachakëta puëdinampaq cuerpuntsikta rurashqa këkarqa, ¿manatsuraq Diosnintsikqa shonquntsikchö alläpa llakikushqa yanapamënintsikta puëdinman? Salmus libruta qellqaqqa alleqmi musyarqan Diosnintsikqa juk herïdata vendaq cuenta shonqunkunachö nanatsikïkaqkunata yanapanqanta (Salmus 147:3). Peru, itsa pillapis pasanqantaqa qonqëta puëdintsu. Pëkunapis markäkuyanmanmi Diosnintsikqa imëpis yanapanampaq kaqta.
DIOSNINTSIKQA KUYAKOQ KANQANTAM BIBLIACHÖQA WILLAKUN
Diosmi kënö nimantsik: “Ama imatapis mantsapakïtsu, porqui noqam qamwan këkä. Ama wakman këman rikachakïtsu, porqui noqam Diosniki kä. Noqam kallpayoqta tikratsishqëki, awmi, noqam yanapashqëki” (Isaïas 41:10). Jehovä alläpa kuyamanqantsikta musyanqantsikmi yanapamantsik tranquïlu sientikunapaq y ima problëmapa pasarpis alläpa mana llakikunapaq. Tsënö tranquïlu sientikunqantsikpaqmi apostol Pabluqa nirqan ‘imëka yarpachakïkuna janampa këkaq Diospa yamë kënin’ kanqanta. Kënöpis nirqanmi: “Dios kallpata qomaptinmi imëkapaq kallpä kan” (Filipensis 4:4-7, 9, 13).
Bibliachö willakunqankunam yanapamantsik Diosnintsik änimanqantsikman mas markäkunapaq. ¿Imataraq Diosnintsik ruramunqa y imanirtaq pëman confiakushwan? Revelacion 21:4, 5 textuchömi tsëta willakurqan.
“Nawinkunapitam llapan weqita pitsanqa” Jehoväqa llapan llakitsimanqantsik y llapan yarpakachätsimanqantsik kaqkunatanam chipyëpa ushakäratsimunqa.
Ciëluchö “gobernar täkunachö tëkaq” alläpa puëdeq y llapan rikanqantsik kaqkunapa Reyninmi, poderninta utilizanqa manana sufrinapaq y wananqantsik höra ayudamänapaq.
Llapan änimanqantsikqa “markäkïpaq y rasumpa” kanqantam Jehoväqa nimantsik. Llapan ruranqankunawanmi Diosnintsikqa rikätsimantsik, änikunqankunata cumplimunampaq kaqta.
“Y nawinkunapitam llapan weqita pitsanqa, y wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu. Unë kaq cösaskunaqa pasarishqanam”. Y gobernar täkunachö tëkaq Kaqmi kënö nirqan: “¡Rikë!, llapan imëkakunatam mushoqta rurashaq”. Jina kënömi nin: “Qellqë, porqui kë palabrakunaqa markäkïpaq y rasumpa kaqmi kayan” (Revelacion 21:4, 5).
Diosnintsik imanö kanqanta alleq musyanapaqmi llapan rikanqantsikkuna y Bibliachö ninqanqa yanapamantsik. Imëka kamashqa kaqkunata rikarmi, Diospa amïgun këta munantsik, peru Bibliachöqa kënömi invitamantsik: “Diosman witiyë, y pëqa qamkunamanmi witimunqa” (Santiägu 4:8). Y Hëchus 17:27 textuchönam “manam noqantsikpita alläpa karuchötsu këkan” nin.
Diosnintsik imanö kanqanta alleq musyanëkipaq tiempïkita rakirninqa, qampaq yarpachakunqanmanmi mas markäkunki (1 Pëdru 5:7). ¿Imanötaq yanapamantsik Jehoväman confiakunqantsik?
Japonpita Toküro jutiyoq nunata pasanqanman pensari. Religiösa maman wätëkaptimpis wanutsikoq grüpumanmi yëkurirqan. Tsë nunam kënö cuentakun: “Dios chikimanqantam pensaq kä y kuyanqä kaqkunata wanutsirnin castiguëkämanqantam pensaq kä”. Tsë grüpu nunakunawan juntakurshi Toküroqa “alläpa melanëpaq y rumi shonqu” tikrarinaq. Pëmi kënö willakun: “Jövinlla wanukïta y noqapitapis mas puëdeq nunata wanutsinqärëkur reqiyämänantam munëkurqä”.
Bibliapita yachakurirmi tsë nunawan warmin Hannahqa vïdankunachö cambiarnin qallëkuyarqan y manam punta kayanqannönatsu rikakuyarqan. Hannahm kënö cuentakun: “Alläpam espantakurqä qowä cambianqanta rikarnin”. Tokürom kënö nin: “Diosqa kanmi y llapantsikpaqmi yarpachakun. Pëqa manam munantsu ni mëqantsikpis wanunantsikta, y shonqupita patsë arrepentikushqaqa perdonamäshunmi. Pëtaqa llapantam willëta puëdintsik, porqui alleqmi entiendimantsik. Jehoväqa tukï problëmakunata y sufrimientukunatam ushakäratsimunqana. Y kanannäqa masran yanapëkamantsik. Noqantsikpaqmi yarpachakun y alläpa llakishqa këkashqam shoqamantsik” (Salmus 136:23).
Tokürota pasanqanmi rikätsimantsik Diosnintsikqa imëka sufritsimaqnintsik kaqkunata y waqatsimaqnintsik kaqkunata ichikllachöna ushakätsimunampaq kaqta y kawënintsikta cambiëta puëdinqantsiktapis. Awmi, Diosqa imëka sufrimientukuna kaptimpis, kuyashunqëkitam rikätsishïnikita munan.