¿Imanötaq Yanapamantsik Diosta reqinqantsik?
Kananyaqqa Diospita atskatanam yachakurirquntsik. Bibliachöqa Diospa jutin Jehovä kanqanta, y imanö kënimpitaqa kuyakoq kanqan mas precisaq kanqantam yachakurquntsik. Jinamampis noqantsikpaq imakunata ruranqanta y shamoq tiempuchö imakunata ruramunampaq kaqtam yachakurquntsik. Tsënö kaptimpis, Diostaqa mas alliran reqita puëdintsik, peru itsa qamqa kënö tapukïkanki: “¿Precisanku Diosta maslla reqinä?”.
Reqita munar kallpachakuptikiqa, Jehoväqa reqinëkipaqmi yanapashunki (1 Crönicas 28:9). Awmi, imëkanöpa reqita munar kallpachakuptikiqa, Jehoväqa amïgun kanëkipaqmi yanapashunki (Salmus 25:14). ¿Imachötaq Diospa amïgun kanqëkiqa yanapashunki?
Kushishqa kanëkipaqmi. Bibliachöqa nin, Jehoväqa ‘kushishqa Dios’ kanqantam (1 Timoteu 1:11). Diosta mas reqirnin pënö këta procuraptikiqa, mas kushishqam sientikunki, y salornikichö, pensënikichö y imanö sientikunqëkichöpis yanapashunkim (Salmus 33:12). Diospa amïgun karninqa, allikunatam imëkanöpa rurëta procuranki, y tsëqa wakinkunawan alli kawakunëkipaqmi yanapashunki. Tsëkunata rurarninqa Salmusta escribeq nunanömi, kënö ninki: “Noqapaqqa Diospa amïgun këqa alläpa allim” (Salmus 73:28).
Diosqa cuidashunkim. Jehoväqa amïgunkunatam kënö nin: “Rikëkurnikim consejashqëki” (Salmus 32:8). Kë textuqa rikätsikun, Jehoväqa cada ünu sirweqninkunata cuidanqanta y wanayanqankunata qonqantam (Salmus 139:1, 2). Jehoväwan mas amïgu karqa, imë höra karpis pëmanmi markäkïta puëdinki.
Shamoq tiempuchö alli kawakunëkipaqmi. Jehoväqa manam kanan witsan kushishqa kanëkillapaqtsu änishunki, sinöqa shamoq tiempuchöpis alli kawakunëkipaqmi (Isaïas 48:17, 18). Bibliachömi kënö nin: “Këmi imëyaqpis kawakïman chätsikun, qam japallan rasumpa kaq Diosta reqikäyäshunqëki, y qam kachamunqëki Jesucristuta reqikäyanqan” (Juan 17:3). Dios änimanqantsik shumaq kawakï ‘següru y mana kuyoq’ kaptinmi, kë alläpa mana alli junaqkunachö tsarakunapaq yanapamantsik (Hebrëus 6:19).
Diosta reqinqantsik y amïgun kanqantsikqa, kë yachakurinqantsikkunachömi yanapamantsik. Këpita maslla musyëta munarqa, Jehoväpa testïgunkunawan parlari o manaqa, jw.org päginäkunaman yëkuri.