‘Qamkuna yügöta apayë’
1 Jesusqa qayamantsik yügonchö yamë këta tarinapaqmi, tsëta rurarqa alläpa sasa o aja kawakïcho këkarpis alli kawëta tarishunmi (Mat. 11:29, 30). Tsë yügota aparqa manam kushikïllatatsu tarintsik, hina yamëyätsimantsikmi, tsë yügoqa nuna mayintsikta Reinopita yachatsi y yanapëmi, pëkunapis Jesuspa ankash yügonchö yamë këta tariyänampaq (Mat. 24:14; 28:19, 20).
2 Diospita willakïqa yamëyätsimantsikmi: Jesusqa manam nerqantsu lasaq apëkanqantsikman pëpatawan hanantsikman hitakurkunapaqtsu. Manam, kikintsikpa kaqta churëkurnin pëpa ankash yügonta apanapaqmi nerqan. Tsëmi noqantsiktapis pasamarqontsik, manam hipatsimantsiknatsu kë kawëchö ima yarpachakïkuna, ni ushakaq riquezakunata ashikïkantsiknatsu (Luc. 21:34; 1 Tim. 6:17). Rasumpam atska ruranantsik kan y trabajanantsikmi wananqantsikkunata tarinapaq, tsënö kaptimpis Diosta servitam kawënintsikchö puntaman churantsik (Mat. 6:33). Diospita yachatsikonqantsik shonquntsikta kushitsinampaq, y sasatanö o ajatano mana rikänapaqqa, willakïnintsik imapitapis más alli kanqantam yarpänantsik (Fili. 1:10).
3 Shonquntsikchö kanqampitam nunaqa parlantsik (Luc. 6:45). Llapan cristianokunam kuyantsik Jehová Diosnintsikta, y Reinon ruramunampaq änimanqantsikmi shonquntsikta kushiratsin. “Alli willaquita” yachatsikur purirnenqa, alläpam kushikuntsik y imëka llakikïkunatapis limpum qonqarintsik (Rom. 10:15). ¿Manaku imatapis kutin kutin rurarqa, más alli rurantsik y más kushishqa karintsik? Tsëmi imëpis Diosnintsikpita willakïman yarqurnenqa alläpa kushikushun. ¡Imanömi kushikuntsik Diospita yachatsikushqa nunakuna wiyamashqa! (Hech. 15:3.) Mana wiyamashqa o chikimashqapis, manam llakinäshuntsu yachatsikïnintsik Jehovata kushitsinqanta mana qonqarqa, y bendicionninwan imapis alli yarqonqanta yarparqa (Hech. 5:41; 1 Cor. 3:9).
4 Jesus qayëkämanqantsikta wiyakorqa rasumpa kushikïtam tarishun, pëno Jehovapa testigon karnin (Isa. 43:10; Apo. 1:5). ¡Tsënöqa manam imapis shonquntsikta yamëyätsintsu!