‘Imatapis ganas ganaslla alli rurayänequipaq’ listo kayë
1 Reinopita willakuyänampaq manaraq yarqurmi, Jesus qateqninkunata yachatserqan (Mat. 10:5-14). Atska rurakïyoq karpis wayin wayin willakoq ewanapaq ichikllapis yachakorqa, imëka bendicionkunatam tarishun (2 Cor. 9:6).
2 ¿Imanöraq yachakushun? Willakïman apanantsik publicacionkunatam puntata alli reqinantsik. Hina yarpashwanmi marka mayintsik nunakunapaqpis. ¿Imakunamantaq yarpachakuyan? ¿Imakunaman creeqkunataraq tarishun? Reinopita Willapäkunapaq y libro Razonamiento a partir de las Escrituras nishqankunam yanapamäshun shumaq yachatsikunapaq.
3 Reinopita Willapäkïta Yachakunapaq reunionchö demostracionkunatam alli wiyakunantsik. Diospita willakïman imëpis yarqurnenqa masmi yachakushun, tsënöpam ichik tiempollatana wanashun preparakunapaq. Yachatsikïnintsikta más alliyätsir y willakïman manaraq ëwar ima ninantsiktapis yarparqa, alli yachatsikoqmi tikrashun. Hina rikapärinantsikmi wananqantsik publicacionkuna apakunantsiktapis.
4 ¿Imataraq rurashwan willakunapaq yachakonqantsikta mana qonqanapaq? Hukwan parlëkaqnömi yachakunantsik, imanö parlapäkunapaq kaqtapis mana qonqanapaq. Wakin wawqi panikunaqa familianwan yachakuyanqan höram, Diospita willakuyänampaq yachakuyan. Wakinnam, papel-llaman qellqayan manaraq punkuman charnin rikäriyänampaq.
5 Imanirtaq alli: Diospita parlanapaq yachakonqantsikqa yanapamäshun, yachatsikïnintsikta alliyätsinapaq y kushikïta tarinapaqmi. Punkuman charnin mana penqakunapaqmi yanapamantsik. Tsënöpam alläpaqa yarpachakushuntsu imata parlapänapaq kaqtapis, tsëpa rantenqa allim yachatsishun. Hinamampis publicacionkuna imapaq parlanqanta musyarqa, kushishqam yachatsikushun.
6 Bibliam kënö nimantsik: ‘Imatapis ganas ganaslla alli rurayänequipaq’ listo kayë (Tito 3:1). Kë yachatsikonqantsikpita, ¿imallapis más alli kanmantsuraq? Alli yachakorqa wiyamaqnintsikkunata y Jehovatam respetëkantsik, Pëpa sirveqnin karnin (Isa. 43:10).