¿Imanötaq yanapashwan mushoq publicadorkunata?
1. ¿Imanötaq sientekurqëki yachatsikur qallanqëki witsankuna?
1 ¿Yarpankiku wayin wayin yachatsikoq yarqur qallanqëki hunaqta? Imaraq nunakuna parlapëta mantsëkurqëki. Pero Bibliapita yachatsishoqniki o huk publicador yanapashunëkipaq tsëchö këkämunqanta kushikurqëkichi. Kananqa alli yachatsikoqnam tikrashqanki, y wakinkunata yanapanëkipaqpis listonam këkanki.
2. ¿Imakunatataq mushoq publicadorkuna yachakuyänan?
2 Mushoq publicadorkunaqa, nunakunata punkunkunachö parlapëta, cada wayichö Bibliawan yachatsikïta, yachakï munaqkunaman yapë kutita y estudio Bíblico qallatsitam yachakuyänan. Hina cällekunachö, rantikuyanqan sitiokunachö y mëchö tsëchö këkar yachatsikïtapis yachakuyänanmi. ¿Imanöraq pëkunata qam yanapankiman? Imanö ruranqëkita rikätsir y imanö rurayanampaqpis nir.
3. ¿Imanötaq mushoq publicadorkunata yanapashwan?
3 Rikarninmi yachakuyanqa. Imanö yachatsikuyänampaqpis Jesusqa rurëninwanmi qateqninkunata yachatsirqan (Luc. 8:1; 1 Ped. 2:21). Pë ruranqannöllam, huk mushoq publicadorwan yachatsikoq yarqunëkipaq parlashqa karqa, nunakunata parlapaptiki yachakunampaq facil-llata preparakunëki, tsëpaqqa itsa publicacionkunapita yachakurinkiman. Wayin wayin ëwarna, rikäshurniki yachakunampaq huk o ishkë punkuchö qam parlë, y huknin kaq wayiman ëwëkarna, yachatsikunqëkipita ima ninqanta tapuri. Tsënömi mushoq publicador cuentata qokunqa ishkaqyan yachatsikoq ëwë imanir alläpa alli kanqanta, y kushishqam chaskikurinqa yachatsikunqampita imallatapis niptiki.
4. ¿Imanötaq yanaparishwan huk mushoq publicador yachatsikunqanta wiyar?
4 Shumaqlla nï, imanö ruranampaqpis. Jesusqa qateqninkunata nirqanmi imanö yachatsikuyänampaqpis (Mat. 10:5-14). Tsënölla qampis rurë. Mushoq publicador yachatsikunqan hora shumaq wiyë. Y wayipita ëwakurna, yachatsikïninta ichik más alliyätsinan pishiptimpis, imata alli ninqampita o ruranqampita felicitë. Imata pantanqantapis amaraq nitsu. Itsa mantsakurninlla pantashqa kar, yapë kaqchö yachatsikurqa pantanqanatsu. Yarpë, llapantsikpis manam igualtsu ras yachakuntsik y imatapis manam huknöllapatsu alli rurantsik (1 Cor. 12:4-7).
5. ¿Imanötaq parlapar qallashwan huk mushoq publicadorta yanapanapaq?
5 Höraqa itsa kikin publicador imanö yachatsikunampaqpis yanapanëkipaq nishunki. Mana nishuptikiqa, kikikim shumaqlla yachatsita tïranëki. ¿Imanö? Wakin unëna yachatsikoq wawqikuna y panikunaqa kënöllam tapuriyan: “¿Huknöpapis yachatsikunëkipaq nireqmanku?”, o “Noqaqa rikarqö alli ruranqëkitam, ¿ima ninkitaq qamqa?” Hina kënöpis ninkimanmi: “Yachatsikur qallaptïqa alläpa sasam o ajaram karqan..., pero... yanapamarqan.” Höraqa ishkëkikunam Razonamiento libro ninqanta rikäriyankiman. Pero mana utinampaqmi, hukllëllachöraq imachö karpis más alli ruranampaq yanapanëki.
6. Huk fierro huk fiërrota afilaq cuenta, ¿imanötaq yachatsikïchö yanapanakuntsik?
6 Huk fiërrotaqa, huk fiërrom afilan. Timoteuqa alli yachatsikoqmi karqan, tsënö kaptimpis, apóstol Pabluqa yachatsikur imëpis këkänampaq y más alli yachatsikoq tikranampaqmi nirqan (1 Tim. 4:13, 15) Yachatsikur qallanqëkipita atska watakunana pasarishqa kaptimpis, más alli ruranëkipaq yachakïta manam haqinëkitsu. Unëna yachatsikoqkunapita y mushoq publicadorkunapitapis alli yachakï. Y listo këkë mushoq kaqkunata shumaq yachatsinëkipaq, tsënöpa alli yachatsikoq tikrayänampaq (Pro. 27:17).