‘Alli willaquinïta willacuyänequim presisan’
1. ¿Imanötaq musyantsik Diospita yachatsikïta mana ni pï michänampaq kaqta?
1 Manam ni pï, ni imapis, michanqatsu Jehová munanqan rurakänanta (Isa. 14:24). ¿Piraq creinman karqan 300 soldädonkunallawan Juez Gedeón 135.000 madianïtakunata ushakätsinampaq kaqta? Jehovämi kënö nirqan “Madianpa makimpita salvankim Israelta. ¿Manaku noqa kachëkaq?” (Jue. 6:14). Y kanan witsanqa, ¿ima rurëchötaq Jehová yanapëkamantsik? Jesusmi kënö nin: “Llapan nunacunata alli willaquinïta willayänequi[m] presisan” (Mateo 24:14). ¡Tsë rurakänantaqa manam ni pï michanqatsu!
2. ¿Imanirtaq yachatsikunqantsikchö cada ünota Jehová bendecimänapaq kaqta shuyarashwan?
2 Cada ünotam Jehoväqa yanapamantsik. Musyënam llapan testïgonkunata Jehová yanapanampaq kaqqa, pero ¿cada ünota yanapamänataqa shuyarashwantsuraq? Sasa o aja kawëta pasarmi apóstol Pablu cuenta qokurqan Tsurin Jesuswan Jehová yanapanqanta (2 Tim. 4:17). Y noqantsikpis musyantsikmi pëpita yachatsikushqaqa, cada ünota bendecimänapaq kaqta (1 Juan 5:14).
3. ¿Imakunachötaq Jehová yanapamantsik?
3 ¿Imëkapaqpis yarpachakur utishqalla kaptikiku yachatsikunëkipaq gänasniki kantsu? Jehoväqa “utishqatam yanapëkan” (Isa. 40:29-31). ¿Diosta servinqëkirëkurku chikishqa kanki? Tsënö karqa, “qepi cuenta lasäshoqnikita Jehoväman churë, y pëqa yanapashunkim” (Sal. 55:22). ¿Höraqa mantsapakunkiku yachatsikoq ëwëta? Diosqa, “ëwëlla, noqam shimikita parlatsimushaq” ninmi (Éxo. 4:11, 12). ¿Qeshyapäkurku puëdenkillatsu yachatsikoq yarqïta? Jehoväqa kushikunmi shonqupita patsë wallkallatapis ruranqantsikpita, y mana kaqpaqtsu manam churan (1 Cor. 3:6, 9).
4. ¿Imataraq rurashun Jehoväman paqwë markäkur o yärakurga?
4 Jehoväpa makinmi “makyarëkämun, ¿piraq qepaman kutitsinman?” (Isa. 14:27). Yachatsikur purinqantsikta Jehová bendecimunampaq kaqta musyëkarqa, “mana ichicllapis mantsacurishpam” imëpis yachatsikushun (Hech. 14:3).